Jud 1

Kiŋwaati ki

Jud

Ə mi Jud mbɛɛ nimi Jisho Kleto, ndùŋ dɨŋ Jɛŋ. Mbīeŋ kiŋwaati kɨhŋ bə bəne bbəŋ Chu Tah diila bə́ lə yee bə́ dūŋh ə kinleki kiih mə, bə́ dùhŋ ə kwáŋ ŋə Jisho Kleto mə. 2 Yee hlɨŋ yi kwônə yi Chu bə kindunshiiŋ maa kinleki duŋ bə bəŋ gbaaŋ, ki gə̀ŋ fwi fwi.

Bəne bə keehnə bə yo kaalənə

3 Bəmbweŋ bəŋŋ bə tɔ́ŋ, mmaa nhlē gbaaŋ lə nlə mbieŋ bə bəŋ ki kinfukwoo kkɨŋ be bənhliŋ kəna, nja ŋŋəŋ lə fi fie kinwaakə gbaaŋ lə mbieŋ ŋkɔnɔ bəŋ lə yee bə jū bənfwɔŋ kah bə kimbemi kkɨŋ bə́ mà nə bə be bbəŋ kkə dùŋ bie bəne bə Chu. Ə fieŋ ffɨŋ bə́ mà nəə bə be cha mi, fi ka lə. 4 N'yɔ̄ɔ nəni yulahalə bəne bədi wɛɛna bwo lɛɛ ə bəŋ mə, ə duŋ bbəŋ bə́ mà bieŋna ki bə́ ə kaani foo lə Chu chiee ŋgə bə́. Bəhŋ lə bəne bbəŋ bə́ nɨ̀hŋ Chu bu nɨhŋnə, bə́ jə̀ kinleki ki Chu bə́ chùu fieŋ ffɨŋ bə́ lə yee bə́ kə̄ə go ŋəbə mu bə́ fə̀ nyɛninə, bə́ nɨ̀hŋ dəŋ Che Kwoo ya Baba Jisho Kleto nnu ə bà yo kwaa wu.

5 Fidiɛɛ ŋkiɛɛ lə mbaa ŋŋoo bəŋ ki bieŋ bidi maa ye bə kəla lə ki bi kinwaa. Baba mà fwoo bəne biih ə kitɨŋ ki Ijip mə, bə́ fukwoo ə ŋgə mə, kwaalə i fiimə bwo laa bəne bbəŋ bə́ mà kə yii lə tɔŋ ə wu mə kə. 6 Ə duŋ dəŋ ye bənchinda biih bbəŋ bə́ mà kə lemi bie ə dɔhɔ kkɨŋ i mà chi kie bə́, mà shee bidɔhɔ bibə bi duŋnə bi yəəŋ, ə duŋ i yiila bəmbini bie ə fíaŋ yí kə kaa mə, ə dɔhɔ kkɨŋ ki dùŋ ə jɨbə ki fiii mə, dɔhɔ kkɨŋ bə́ lə yee bə́ dūŋ həmə gəŋ bwii Butuu buŋkuntaŋ bbuŋ bu duŋ bwe bu nhlaah. 7 Ə duŋ dəŋ lə yəəŋ ye i mà tɔŋ kitɨŋ ki Shɔdɔŋ bə ki Gɔmɔla bə bwii wi kə kaa, maa bibalaki bbɨŋ bi mà duŋ baha ə bi go, bbɨŋ bi mà duŋ dəŋ ə kinduŋh ki kiwaali mə, kkɨŋ bəkwɛɛ bə bənəə jə dəŋ go ŋəbə yee bə́ fə̄ bə ŋə ə kə duŋ nə ə jé yyɨŋ Chu mà fə mbɛɛ lə yee i fə̄ bə wi kə. Fɨhŋ fieŋ lə kinfɛhiŋ ki fieŋ ffɨŋ fi yá duŋ bə bəne bbəŋ bə́ dùŋ ə dɨŋ kɨhŋ kinduŋh mə.

8 Maa ye fi duŋ lə nəni, bəne bəhŋ jəə kwaa ə duŋ fwɔ we. Bə́ bìhi go ŋəbə, bə́ nɨ̀hŋ mbɛɛ nnu i hlàah bə́, bə́ tò bəfiana bə buh. Bə́ fə̀ nəni, bə́ yɔ̀ɔ lə ə yulahalə bə́ ŋə̀ŋ bieŋ ə yobutuu mə. 9 Bwɔɔ nnu Maykɛl nnu i dùŋ yo kwoo ki bənchinda bə Chu màa i kpə̄nə ə kiŋwuuni ki Mushe bəŋ, bə́ bəə fiŋkwini kpənə ə ki bəŋ, i mà kə fwoo lə maa die waha ji yɔɔ dəŋ bə fiŋkwini kə, i mà chuu kwaa bə fi lə, “Ə Baba nnu i yá hlaah wə.”^ª 10 Bəne bəhŋ tò bieŋ binhliŋ butonə bbɨŋ bə́ kə kələ ye bi dùŋ lə kə. Bə́ fə̀ bieŋ ye ŋgɔŋ məbə kìɛɛ lə ye nyáŋ yí nji lə. Ə bieŋ bɨhŋ bbɨŋ bi bìhi bə́. 11 Ŋgə ŋkuntaŋ dùŋ bə́! Bə́ jəə wuh ŋə Kɛŋ. Bə́ jaa yee bə́ kōŋ kpo hlə lɛɛ ə yiwaha mə ye yi Balaŋ lə. Bə́ tà bikuu dəŋ yəəŋ ye Koola lə, kpe dəŋ yəəŋ ye Koola mà kpe lə. 12 Bəne bəhŋ yìhi bəŋ bwɔɔ nnu bə dì chɔnɔ ki kinleki kieeŋ. Bə́ bà bənfə ye bwí lə ə bwɔɔ bidinə bəŋ, mbɛɛ kèe kwaa ə duŋ gbo wiih giaali hləŋ. Bə́ dùŋ ye joonə lə bwɔɔ nnu ki buma kə nəə jaŋ, fwee fɨɨŋkə bwo hlahi ki. Bə́ dùŋ dəŋ ye bite bbɨŋ bi dùŋ kə chɔŋ nə sháŋ maa ə bwɔɔ bujaŋ mə. Bə́ dùŋ ye bite bbɨŋ bə́ bwaa. Bə́ kpee baa kpe. 13 Bə́ dùŋ ye nɔ nnu kɨmə ki ŋgwiŋ fɛ̀ɛ wu i bìhiŋ buh, fwɔ wibə wi mbee gbo dùŋ ye fuu wwuŋ kifwuŋ fɛ̀ɛ ki bìhiŋ buh ə ŋgwiŋ bəŋ. Bə́ dùŋ ye muntoola mmuŋ mu jaaŋka lə woo woo. Chu bwɛɛla dɔhɔ kkɨŋ ki dùŋ nəni fiii bwɔɔ mənhliŋ chi yu bə́.

14 Enɔk nnu ŋkaani wi mà duŋ yo ə chá bəŋ fumanyaaŋ chɔɔ jə ə Adaŋ go, i mà hlaa yɔɔ ye mbɛɛ hlɨŋ Chu lə ki bəne bəhŋ, i yɔɔ lə, “Bə kee ŋəŋ, Baba yá yi bwo bə kintu ki bənchinda biih bə wɛɛŋ bbəŋ bə́ dùŋ ə bənchuku mə bənchuku mə, 15 bənhlaah mbɛɛ mənhliŋ. I yá bwo nyii fwɔ wiwaha winhliŋ wwuŋ bəne bənhliŋ bbəŋ bə́ dùŋ kə kələ Chu màa bə́ fə̄ ye bə́ mà nɨhŋ lə wu bu nɨhŋnə maa díe yí ŋaŋanə yinhliŋ yyɨŋ bə́ màa bə́ bā bən'yɔɔ ki Chu.” 16 Dɨŋ bəhŋ bəne lə bbəŋ bə́ bà bəŋwuunə ə ŋwuunə mə bwɔɔ mənhliŋ, bə́ lòh bə bəne bədi, bə́ bə̀lə kwaa ə duŋ fieŋ ffɨŋ go ŋəbə ŋənshi kìɛɛ, bə́ jə̀ go ŋənya, bə́ fìhi bəne bə yó yí njənjə fo bə́ lə bənə bieŋ bbɨŋ bə́ kìɛɛ.

Keehnə ki bieŋ bbɨŋ bi yá duŋ

17 Kwaalə bəmbweŋ bəŋŋ bə tɔŋ, bə hle bieŋ bbɨŋ bəne bə faŋnə bə Baba ya Jisho Kleto mà yɔɔ bə bəŋ lə bi yá yi duŋ. 18 Bə́ mà yɔɔla bə bəŋ lə, “Bwɔɔ nnu ə yáa ə dūŋ butuu bu həŋgbɔŋ, ə bəne bəfenə yá duŋ bbəŋ bə́ dùŋ kə duŋ nə kinduŋh kkɨŋ Chu kìɛɛ, bə́ fə̀ ə duŋ bieŋ biwaha bbɨŋ go ŋəbə ŋənfwinə kìɛɛ.” 19 Bəhŋ bəne lə bbəŋ bə́ bwò bə kiŋga ə bəne mə, bə́ bə̀lə ə duŋ kinhle kkɨŋ ki bwò ə bə́ fí, kə kənə Fiana Chu ə bə́ mə kə. 20 Kwaalə Bəmbweŋ bəŋŋ bə tɔŋ, bə wɛɛ go ŋieeŋ yee bə lēmi kwaa ə duŋ ə kimbemi kieeŋ mə kkɨŋ ki dùŋ ba wɛɛŋ, yee bə chêe Chu bwɔɔ mənhliŋ ə muŋgeni mu Fiana Wɛɛŋ mə. 21 Bə ba kwaa yee bə dûŋ ə kinleki ki Chu mə, bə kè Baba ya Jisho Kleto nnu i yá kwo yo hlɨŋ, fə ə bə lɛɛ ə kinduŋh ki kə kaa mə. 22 Yee bə kwô hlɨŋ bə bəne bbəŋ bə́ kàani ə naamənə mə. 23 Yee bə kpâ bə jə̀ bəne bbəŋ bə́ dùŋ ə bwii mə bə fwòo bə́, fo bə́ lə fukwoo. Yee bə kwô hlɨŋ bə bəne bədi, kwaalə, bwɔɔ nnu bə kwò hlɨŋ, yee bə jə̂ bwɔɔ. Yee bə lôh maa dəŋ bə bindu bibə bbɨŋ bə́ yiha bə fwɔ wibə wiwaha.

Chu cheenə kindohi

24 Yee kindohi dûŋ bə Chu! Ə wu nnu i dùŋ ə yee i fwōŋ bəŋ, lə bə kə gbee kə, i yá bwo bə bəŋ ə kiŋkuntaŋ kiih fwi ə yee bə dūŋ wɛɛŋ gbenə hləŋ maa bə kintɨŋ. 25 Yee kkə nə̂ kiŋkohi bə Chu nnu i dùŋ yo Nchuu Fwoo ya nnu ə ba yo kwaa wu, kah ə Jisho Kleto Baba ya mə. Muŋkɨŋ bə nhlaah maa muŋgeni yee ə kə̄nə kwaa wu Chu chɔɔ jə ye mbiŋ mà chɔɔ bə fidiɛɛ maa bwɔɔ mənhliŋ kə kaa. Yee fi Dûŋ lə.