1 Pita 5

Ki shɔ́ŋ yí Chu

Nhlə n'yee ŋkīɛɛ bənnə keehnə bə bəche kimbumə ki bəne bə kimbemi ə bəŋ mə. Mi ye mbɛɛ ə kintu ki bəche kimbumə mə, mmà ŋŋəŋna bə díi ŋəŋŋ ye Kleto mà wo ŋgə lə, nduŋ dəŋ mbɛɛ nnu ndùŋ ə mbənə ə kiŋkuntaŋ kkɨŋ i yá bwo kie bə ki. 2 N'yee ŋkēeh lə, yee bə fwôŋ shɔ́ŋ yí Chu yyɨŋ i chiee yé ə bəŋ kwáŋ kinwaa. Bwɔɔ nnu bə fwòŋ, bə kə yee bə fwôŋ ye bə́ yəələ bəŋ bu yəənə kə. Yee bə fwôŋ bə kinleki ye Chu kìɛɛ lə. Bə kə yee bə fwôŋ bə kə̀nə díi ŋəŋge ŋə kpo kə. Yee bə kə̂nə ŋgɨŋ ə duŋ ə nimi mə. 3 Bə kə yee bə shîi ə nshii mə ə shɔ́ŋ yyɨŋ Chu chiee yé ə bəŋ kwáŋ lə yee bə fwōŋ yí kə. Yee bə nyîi ə duŋ fwɔ winwaa wwuŋ bə́ lə yee bə́ ŋə̄ŋ bə́ bə̀lə. 4 Ə yee bə fə̄ nəni, ə bwɔɔ nnu Kwoo ki Bənfwoŋ shɔ́ŋ kie yá fu bwo, ə bə kənə kinfwili ki kiŋkuntaŋ kkɨŋ ki yá ba həmə kə kpee nche kə.

5 N'yɔ̄ɔ dəŋ bə hlɔŋ lə, bə nə go ŋieeŋ bə bəche kimbumə ki bəne bə kimbemi kinwaa. Yee bəŋ bənhliŋ bwɔ̂kwe ə bəmwaa bieeŋ fwi. Yee bə kə̂lə lə, “Chu bà bəmbwuŋ kinhlaŋ bə mbɛɛ nnu i bìhiŋ gbo wiih buh, kwaalə i nyìi tɔŋ linwaa bə mbɛɛ nnu i bwɔ̀kwe.”

6 Bə bwɔkwe bə go ŋieeŋ ə muŋgeni mu Chu mə, bwɔɔ nnu bwɔɔ lə wunə, ə i bihiŋ bəŋ buh. 7 Bə chì bieŋ binhliŋ bbɨŋ bi fɨ̀hɨŋ bəŋ ə wu kwáŋ, yulahalə i yo bə ŋgɨŋ weŋ. 8 Yee bə fwôŋ bikuu bieeŋ, bə kèe kinwaa yulahalə mbɛɛ weŋ nnu i lòh yo bə bəŋ dɛbulu yu jāa i wɛ̀ɛni ye tuntunu nnu i hlùŋ lə, i kìɛɛ mbɛɛ lə i bwini di. 9 Bə yii muŋgeni ə wu dɨŋ, yii kwaa ə duŋ tɔŋ ə Chu mə gbaaŋ, bə hle lə bəmwaa bieeŋ bie bə wō dəŋ ŋgə nəni ə mbiŋ nte. 10 Ŋgə nu duŋ kwaa ə bwɔɔ bəŋ chɛɛ, Chu lə fə ə bə chu yee bə dūŋ ye bə maa bə dūŋ lə, nə bəŋ muŋgeni, fə ə bə lemi ntakə. Chu duŋ nnu i nə̀ kinhləmə kinhliŋ bə bəne. I diila bəŋ bənlɛɛ ə kiŋkuntaŋ kiih ki kə kaa mə yu bə duŋ bəne bə Kleto. 11 Muŋgeni munhliŋ ba yee mwi dûŋ mwii bwɔɔ mənhliŋ kə kaa. Yee fi Dûŋ lə.

Cheenə

12 Mbīeŋ fi kiŋwaati fɨhŋ bə bəŋ ə chɨnə Shila^ª nnu i duŋ ŋgwoŋ ya. Ye ŋŋəŋ lə lə i dùŋ mbɛɛ nnu duŋ ə mbɛɛ yii bufe ə wu mə. Mbieŋna bəntahi bəŋ go, baa fə dəŋ lə bə kələ lə fieŋ finhliŋ ffɨŋ mbìeŋ nnyìi kichɛɛŋ ki kinchɨnə kkɨŋ ki dùŋ kie ki Chu. Yee bə lêmi ə fi bəŋ ntakə. 13 Kimbumə ki bəŋgwoŋ biaa ki Babilɔŋ kkɨŋ Chu mà shaa dəŋ cheela bəŋ. Ŋiaa Maak, ə kimbemi mə cheela dəŋ bəŋ. 14 Bə chee go ŋieeŋ, kwaamə go ŋieeŋ bə kinleki. Yee kindunshiiŋ dûŋ bə bəŋ bənhliŋ bbəŋ bə dùŋ bie ə Kleto mə.