1 Pita 4

Kinduhŋ ki bəne bə Chu kifwɔ

Ye Kleto mà wolə ŋgə ə gbo wiih go, yee bə kə̂nə dəŋ dɨŋ limbini le tɔŋ llɨŋ i mà kənə le bəŋ'wo dəŋ ŋgə, yee bə ŋôo lə mbɛɛ nnu i mà wo ŋgə ə gbo wiih go duŋ bə bəə yiwaha baala kənə fieŋ kə. 2 Kwaalə i baalə yee i dūŋ ə fwɔ wi yaŋ kwe wuhŋ mə, i bə̀lə yiwaha yyɨŋ gbo wiih kìɛɛ kə. I dùŋ fidiɛɛ i bə̀lə ə duŋ bieŋ bbɨŋ Chu kìɛɛ. 3 Yee bə kə̂lə lə bwɔɔ nnu bə màa bə fə̄ bieŋ bi bəne bbəŋ bə́ dùŋ kə kələ Chu ba ba bənfə wuna nəni. Bə mà duhŋ ə kinduŋh ki nyɛninə ki kiwaali mə, bə bə̀lə go ŋieeŋ ŋənshi choo, bə ŋwì mbihŋ mə ŋkwò bəŋ, bə fə̀ bichɔni bə dì kindi kinfili, bə ŋwì bə bə̀ŋ, bə fə̀ ye bwí lə. Bə màa bə dūŋ dəŋ nəni bə fə̀ bieŋ biŋwi gbo bənchee bə bəcheh bənya ə duŋ fieŋ fiŋwi gbo. 4 Fidiɛɛ gəə kie ki ŋɨ̄ŋ bəne bbəŋ bə́ dùŋ kə kələ Chu, ye bə kə baa lə bumə lə ə kintu mə bə bə́ bə fwɔ wwuŋ wi duŋ we ye wi nyáŋ lə, bə́ hlə fiimə yee bə́ tō bəŋ. 5 Kwaalə bə́ yá yi lemi nhlaah go ŋəbə ə Chu fwi nnu i yu kē yo lə i yá hlaah bəŋkee bə bəŋkpi. 6 Fiee fieŋ ffɨŋ fi mà fə fie bə́ hlə dontə dəŋ hlɨŋ nwaa bə bəne bbəŋ bə́ mà kpee. Bə́ mà dontə nəni fo bə́ yá hlaah bə́ yəəŋ ye bə hlàah'lə mbɛɛ mənhliŋ, ə yee bə́ dūŋ kwaa ə fiana mə ye Chu duŋ lə.

Yee mbɛɛ nɨ̂ŋ bə nnə liih ə je nwaa mə

7 Bwɔɔ nnu fieŋ finhliŋ lə yee fi kāh yo baha baha. Nəni, yee bə dûŋ kwaa bə bufe bweeŋ, bə kə̀nə go ŋieeŋ, fo bə lə yee bə chēe Chu. 8 Fieŋ ffɨŋ fi kah bieŋ binhliŋ duŋ kwaa lə yee mbɛɛ lēki maani bə tɔŋ liih linhliŋ yulahalə kinleki bwo ki kəə yíwaha yi kiŋaŋ. 9 Ə mwaa ju la wə jiinə, wə tɨŋ jə wu, wə kə yee wə ŋwûunə kə. 10 Ye Chu nə lə bəŋ nnə́ chili chili, yee mbɛɛ jə̂ liih nnə i nɨ̀ŋ bə li ə bəne bədi go. Yee bə nɨ̂ŋ bə kinhləmə kkɨŋ Chu nəə kɨhŋ bəŋ ə jé mə kiŋaaŋkə ye bəne bbəŋ Chu chiee nimi liih ə bə́ kwáŋ lə yee bə́ nɨ̄ŋ li kinwaa kə. 11 Ə mbɛɛ yee i yɔ̄ɔ fieŋ fi Chu, yee i yɔ̂ɔ kwaa ə duŋ fieŋ ffɨŋ fi fù ə Chu jə kibɛɛ. Ə mbɛɛ nɨ̀ŋ bə bəne bədi yee i nɨ̂ŋ kwaa ə duŋ bə muŋga mmuŋ Chu nəə wu. Yee bə fə̂ nəni, fo ə fieŋ finhliŋ mə ffɨŋ bə fə̀, ə kiŋkohi yee ki gə̄ŋ bə Chu ki bwò ə Jisho Kleto go. Kiŋkuntaŋ bə muŋgeni munhliŋ ə kənə wu bwɔɔ mənhliŋ kə kaa. Yee fi Dûŋ lə.

Bəŋ'wo ŋgə ye bəne bə Kleto lə

12 Bəmbweŋ bəŋŋ bə tɔ́ŋ, gəə kə ŋɨŋ nə bəŋ maa bə bishi bbɨŋ bi bwò ə bəŋ go bəmɔŋ bəŋ kə. Fi kə duŋ nə ye fieŋ fiŋwi gbo ffɨŋ fi duŋna bə bəŋ kə. 13 Yee bə lêki ə nleki mə lə bə bie bə wō ŋgə ye Kleto mà woo lə, fo bwɔɔ nnu i yá fu bwo bə kiŋkuntaŋ kiih, ə yee bə tɨ̄ŋ, bə wò njənjə. 14 Ə bəne lə to bəŋ yu yii li Kleto, kəə njənjə ŋkuntaŋ duŋ weŋ. Fɨhŋ nyìi lə kiŋkuntaŋ ki fiana nnu i duŋ fiana Chu yo ə bəŋ bəŋ. 15 Ə mbɛɛ yee i wô ŋgə, i kə yee i wô ŋgə yulahalə i jiila mbɛɛ kə, ləkə lə i yiee fieŋ fi mbɛɛ ju kə, ləkə lə i fəə fieŋ fidi fiwaha, ləkə lə i yiila biwu ə fieŋ fi bəne bədi mə kə. 16 Kwaalə, ə mbɛɛ lə ŋəŋ ə bəŋgə go yulahalə i dùŋ mbɛɛ Kleto, gbo kə yee wi bêe wu kə. Yee i kôhi ə duŋ Chu lə i kəna yii le. 17 Yee bə fə̂ nəni yulahalə bwɔɔ yo bwoo nnu Chu lə hlaah bəne, mə lə chɔɔ ə duŋ bə chəŋ yi. Ə mə chɔɔ bə be nəni, ə fi duŋ ləhəŋ bə bəne bbəŋ bə́ nɨhŋna bie bəmbələ hlɨŋ nwaa Chu lə? 18 Bə́ bieŋna ə Kiŋwaati ki Chu mə lə,

“Ə fi lə ta bə bəne bəntiiŋ bənfu kwoo,

ə fi duŋ ləhəŋ bə bəne bbəŋ bə́ dùŋ kə kələ Chu kə, bə́ duŋ bəne bbəŋ bə́ fə̀ yíwaha lə?”

19 Nəni, bəne bbəŋ bə́ wò ŋgə ye Chu kìɛɛ lə lə yee bə́ wō, bə́ fə̀ ə duŋ bieŋ bintiiŋ, bə́ chì go ŋəbə ə Chu Kinfə Bieŋ kwáŋ nnu i bà yo bənlemi kwaa ə ŋkaachi wi bəŋ.