Yesus idup agi
24
1 Alap ari Minggu na, mbini-mbini bakalap ampus ka kubur Yesus maba rampah-rampah wan minyaꞌk wangi nang udah umpu-ia nyiap. 2 Ka sana umpu-ia nele batu ontoꞌk nutup kubur Yesus udah tabuka. 3 Waktu umpu-ia tama, umpu-ia angin namu bangke Tuhan Yesus. 4 Tangah umpu-ia badiri, umpu-ia kajah eran mikir ape nang tajadi, tampe-tampe ada dua urak badiri ka samaꞌk umpu-ia duan pakai nang basinar. 5 Umpu-ia mbada gali, lalu sorong sambah duan mua sampai ka tanah. Tape urak nang badua na bakata ka umpu-ia, “Ngape ngkanaꞌk ngago urak nang udah idup taꞌk ntara urak mati? 6 Ia angin agi kitu, Ia udah idup agi. Ngkanaꞌk arus ingan ape nang Ia madah waktu ngkanaꞌk masih ka Galelea, 7 kaloꞌk Anaꞌk Taleno arus disarah ka urak-urak nang badosa, lalu Ia kana saleb, tape Ia daꞌk idup agi ka ari nang katege.”8 Lalu umpu-ia ingan ape nang udah Yesus madah.
9 Udah na umpu-ia pulak napuꞌk kubur na, umpu-ia ngesah ape nang dah tajadi ka sabalas rasol wan urak-urak nang pacaya ka Yesus.10 Mbini-mbini nang madah ka rasol-rasol na, ia na Maria Magdalena, Yohana, Maria indo Yakobus, uga mbini-mbini nang lain nang sama-sama duan umpu-ia.11 Tape rasol-rasol na nganggap kesah na angin masok akal. Umpu-ia angin pacaya ka mbini-mbini na.
12 Tape biar bage sana, Petrus lumpat, lalu ia batalama ampus ka kubur. Waktu ia nele ka dalap, nang ada cuma kain blacu. Lalu ia pulak, ia uga mangam mikir ape nang dah tajadi.
Yesus muat diri Ia tatele ulih murit nang lain ka jalat nuju Emaus
13 Waktu ari na uga dua urak murit Yesus ampus ka kampong Emaus, kira-kira sabalas pal taꞌk Yerusalem. 14 Sambel bajalat umpu-ia bakesah tantang smua nang udah tajadi. 15 Waktu umpu-ia tangah bakesah sambel batukar pikir, Yesus datak nyamaꞌk umpu-ia, lalu sarayuk duan umpu-ia. 16 Umpu-ia nele Yesus, tape ntah macam mane umpu-ia angin kanal ka Yesus.
17 Yesus batanya ka umpu-ia, “Ngomong ape bah ngkanaꞌk na?” Lalu umpu-ia branti, tape ae mua umpu-ia tatele sabal.
18 Lalu siko taꞌk ntara umpu-ia nang badama Kleopas nyaut, “Maꞌksana na pandatangkah ka Yerusalem? Ape takaꞌk angin nao ape nang udah tajadi dua-tege ari ntu?”
19 Yesus batanya, “Ada ape maka?”
Umpu-ia nyaut, “Kajadi tantang Yesus urak Nasaret bah. Ia na banar-banar nabi, nang bakuasa dalap pabuat Ia wan kata-kata Ia, mao ka adap Allah bage sana uga ka adap taleno. 20 Tape kapala-kapala imam wan pamempen-pamempen uraꞌkitu udah nyarah Ia ontoꞌk diukum mati ka atas kayu saleb. 21 Maka uraꞌkitu udah ngarap kaloꞌk Ia na datak ontoꞌk mbebas uraꞌkitu, bangsa Israel. Tape waktu ntu dah lewat tege ari, taꞌk waktu kajadi na. 22 Tape mbini-mbini taꞌk rombong uraꞌkitu maba kesah nang ngkajut uraꞌkitu: Alap ari buta, umpu-ia udah ampus ka kubur. 23 Umpu-ia angin nele bangke Yesus. Lalu umpu-ia pulak maba kabar kaloꞌk umpu-ia batamu duan malekat-malekat nang madah ka umpu-ia, Yesus na udah idup agi. 24 Lalu dua-tege urak taꞌk ntara uraꞌkitu ampus ka kubur na. Memang banar nang dimadah ulih mbini-mbini na, tape umpu-ia angin nele Yesus.”
25 Lalu Yesus bakata ka umpu-ia, “He, ngkanaꞌk urak-urak nang baga, aso banar ngkanaꞌk bapikir, sampai ngkanaꞌk angin pacaya ape nang udah dimadah ulih nabi! 26 Sbanar ia ngkanaꞌk arus nao, giangin Kristus, Raja nang Tukang nylamat, nrima kaduduꞌk nang Mbada tingi wan dingromat, Ia arus sangsara dulu.” 27 Lalu Yesus madah ka umpu-ia ape nang dinulis ka dalap Kitab Suci tantang Ia, mole taꞌk kitab Musa sampai ka kitab nabi-nabi.
28 Waktu umpu-ia dah samaꞌk kampong nang umpu-ia nuju, Yesus bage daꞌk nglanjot pajalat Ia. 29 Tape umpu-ia nahan Yesus duan bakata, “Bamalam bah dulu wan uraꞌkitu, krana ari dah nyalah, uga mata ari daꞌk tangalam.” Lalu Yesus tama ka kampong na bage daꞌk bamalam duan umpu-ia.
30 Waktu Yesus duduꞌk makat duan umpu-ia, Ia nangkap roti, Ia basokor, udah na Ia mala-mala roti na lalu Ia magi-magi ka umpu-ia na tadi. 31 Waktu na umpu-ia sadar, umpu-ia langsong nganal Yesus, tape waktu na uga Yesus angin tatele agi ulih umpu-ia.
32 Lalu umpu-ia bakata ka siko duan nang lain, “Waktu gi ka tangah jalat tadi Ia nyampai isi Kitab Suci ka diri, smangat ja rasa ati bage api nang bagaur!”
33 Udah na umpu-ia langsong lumpat lalu baleꞌk ka Yerusalem. Ka sana umpu-ia batabo duan sabalas murit-murit Yesus nang tangah bakumpur duan page-page nang lain. 34 Lalu murit-murit na bakata ka dua urak ntadi, “Memang banar Tuhan udah idup agi, Tuhan udah muat diri Ia tatele ulih Simon.”
35 Lalu urak nang badua ntadi uga ngesah ape nang tajadi ka tangah jalat waktu umpu-ia nuju Emaus, uga bage mane umpu-ia bisa nganal Yesus waktu Ia mala-mala roti.
Yesus moncol ka adap murit-murit Ia
36 Waktu umpu-ia tangah bakesah tantang ape nang udah tajadi, tampe-tampe Yesus moncol ka tangah umpu-ia lalu madah salam, “Tananglah ati ngkanaꞌk!”
37 Umpu-ia takajut wan gali, krana umpu-ia ngira, umpu-ia nele antu. 38 Tape Yesus bakata ka umpu-ia, “Ngape ngkanaꞌk gali? Ngape ati ngkanaꞌk ngrasa ragu? 39 Tele langan wan batis Aku ntu, ntu nyan bah Aku, coba dipigak lalu tele banar-banar, krana antu angin si isi wan angin si tulak, bage nang ngkanaꞌk nele nang ada ka Aku ntu.”
40 Sambel bakata, Yesus nyolor langan wan batis Ia supaya umpu-ia nele banar-banar. 41 Umpu-ia giangin asa pacaya, tape umpu-ia ngrasa sanang wan masih eran. Lalu Yesus batanya ka umpu-ia, “Adakah ngkanaꞌk bisi pamapaꞌk ka kitu?” 42 Lalu umpu-ia mere satataꞌk ikat nang udah dinunu ka Ia. 43 Yesus nangkap ikat na lalu Ia mapaꞌk ka adap umpu-ia.
44 Udah na Yesus madah ka umpu-ia, “Kata Aku ntu, kata nang udah Aku madah ka ngkanaꞌk waktu Aku masih sama-sama duan ngkanaꞌk ndulu. Ape nang dinulis ka dalap kitab Musa, kitab nabi-nabi uga ka kitab Masmur tantang Aku, arus tajadi.”
45 Lalu Yesus muka pikir umpu-ia, supaya umpu-ia ngrati isi Kitab Suci. 46 Ia madah ka umpu-ia, “Ada dinulis bage pitu, ‘Raja Tukang nylamat arus sangsara, tape ari nang katege Ia idup agi taꞌk ntara urak nang mati. 47 Ka dalap dama Ia, kabar tantang taleno arus batobat supaya dosa-dosa ia dingampon, arus dipadah ka sloroh bangsa, mole taꞌk Yerusalem.’ 48 Ngkanaꞌk nang udah nele kajadi na, ngkanaꞌk uga nang arus nyampai kabar na ka urak lain. 49 Aku daꞌk ngutus ka ngkanaꞌk Roh Tuhan bage nang udah dinjanyi ulih Ama Aku nang ka sruga. Tape ngkanaꞌk arus diap ka kota ntu sampai ngkanaꞌk dinguasa ulih kuasa taꞌk Allah nang Mbada tingi.”
Yesus trangkat ka sruga
50 Lalu Yesus maba umpu-ia kluar taꞌk Yerusalem, ampus ka samaꞌk Betania. Ka sana Yesus ngangkat langan Ia, lalu mere tuah ka umpu-ia. 51 Waktu Ia tangah mere tuah ka umpu-ia, Ia tapisah taꞌk umpu-ia lalu trangkat ka sruga. 52 Umpu-ia sorong sambah nyambah Ia, lalu umpu-ia pulak ka Yerusalem duan ati nang mbada sanang. 53 Umpu-ia malar ada ka dalap Rumah Allah wan muji-muji Allah.