Yesus dimaba ka adap Pilatus
23
1 Udah na urak-urak nang ngadel Yesus na kajah badiri lalu maba Ia ngadap gubunur Yudea nang badama Pilatus. 2 Ka sana umpu-ia kajah nnyalah Yesus, sambel bakata, “Uraꞌkitu namu urak ntu udah nyasat urak-urak nang ada ka bangsa uraꞌkitu. Ia mbojoꞌk urak supaya usah mayar pajak ka Kaisar, Ia uga ngako diri Ia Kristus, raja urak Yahudi.”3 Lalu Pilatus batanya ka Yesus, “Banarkah Maꞌksana na raja urak Yahudi?”
Yesus nyaut, “Bage nang kau madah na.”
4 Lalu Pilatus bakata ka kapala-kapala imam wan urak-urak nang ada ka sana, “Aku angin namu kasalah mang scubit ka urak ntu.”
5 Tape umpu-ia mukin ndasak Pilatus duan bakata, “Ia mbojoꞌk urak-urak ka sloroh Yudea duan pangajar Ia, mole taꞌk Galelea, waktu ntu udah cacah kitu.”
6 Nangar bage sana Pilatus batanya, “Urak Galeleakah Ia ngia?”
7 Waktu Pilatus nao kaloꞌk asal Yesus na taꞌk daerah Galelea, ia nyuruh urak maba Yesus ngadap gubunur Galelea nang badama Herodes, krana waktu na Herodes ada ka Yerusalem.
Yesus dimaba ka adap Herodes
8 Waktu Herodes nele Yesus, ia mbada sanang. Krana udah lama ia nangar kesah tantang Yesus wan kapengen nele Ia. Herodes uga kapengen nele Yesus muat banda-banda nang ajaib. 9 Banyaꞌk nang Herodes nanya ka Yesus, tape Yesus angin nyaut mang sapatah. 10 Nele Yesus angin nyaut, kapala-kapala imam wan guru-guru agama Yahudi maju ngaga Yesus lalu nodoh Ia nang bukat-bukat ontoꞌk mbarat Ia.
11 Herodes wan tantara-tantara ia mole ngolo wan mleceh Yesus. Lalu ia masang baju jubah raja ka Yesus. Udah na ia nyuruh urak maba Yesus babaleꞌk ngadap Pilatus. 12 Waktu ari na uga, Herodes wan Pilatus njaji bakawan. Maka giangin kajadi na umpu-ia bamunsuh.
Yesus dimaba agi ngadap Pilatus
13 Lalu Pilatus ngumpur kapala-kapala imam, pamempen-pamempen Yahudi wan smua urak. 14 Ia madah ka umpu-ia, “Ngkanaꞌk udah maba urak ntu nang dinodoh nyasat urak banyaꞌk ka adap aku. Ngkanaꞌk nele surak kaloꞌk aku udah mriksa Ia. Tape sama sakali aku angin namu kasalah ka Ia bage nang ngkanaꞌk nodoh na. 15 Bage sana uga duan Herodes, maka nsana ia mulak agi urak na ka kitu. Jaji angin mang sote kasalah urak ntu nang pantas muat ia kana ukum mati. 16 Maka nsana aku daꞌk nyiksa Ia, udah na nglapas Ia.”
18 Tape urak-urak nang ada ka sana kajah ngampaꞌk, “Bunuh Yesus, lapas Barabas ontoꞌk uraꞌkitu.” 19 Barabas dinama ka dalap panjara krana ia mlawan pamrintah kota na, uga krana ia udah munuh urak.
20 Lalu Pilatus bakata agi duan kata nang nyarek ka adap urak-urak na, krana ia daꞌk nglapas Yesus. 21 Tape umpu-ia kajah ngampaꞌk, “Saleb Ia, saleb Ia!”
22 Pilatus bakata nang katege kali ka umpu-ia, “Sbanar ia ape salah urak ngia? Krana angin mang sote aku namu kasalah Ia nang pantas muat ia kana ukum mati. Jaji aku daꞌk nyiksa Ia, udah na nglapas Ia.”
23 Tape umpu-ia kajah ngampaꞌk minta supaya Yesus disaleb. Krana umpu-ia kajah ngampaꞌk, umpu-ia manang. 24 Lalu Pilatus mutus ontoꞌk ngabol ape nang umpu-ia nuntut. 25 Pilatus nglapas Barabas, urak nang dinama ka dalap panjara krana mlawan wan munuh urak, bage nang umpu-ia nuntut. Tape Pilatus nyarah Yesus supaya umpu-ia muat ape nang umpu-ia mao ka Ia.
Yesus dimaba ontoꞌk disaleb
26 Waktu umpu-ia maba Yesus, umpu-ia nahan Simon urak Kerene, nang baro datak ka kota na, lalu maksa ia nyaat saleb sambel nuna tombok Yesus bajalat.
27 Banyaꞌk urak nuna tombok Ia. Ka ntara urak banyaꞌk na, ada mbini-mbini nang nangis wan ngrai Ia. 28 Yesus ngiloꞌk nele mbini-mbini na lalu bakata, “O, mbini-mbini Yerusalem, usah ngkanaꞌk nangis ontoꞌk Aku, tape tangis diri ngkanaꞌk wan anaꞌk-anaꞌk ngkanaꞌk! 29 Krana daꞌk datak waktu ia urak daꞌk bakata, ‘Brontong mbini nang ugu, nang ngkala buntik, uga nang ngkala nyusu anaꞌk ia.’ 30 Waktu na uga urak daꞌk bakata ka gonong-gonong, ‘Ruruhlah ninih uraꞌkitu!’ Uga ka bukit-bukit, ‘Bubul uraꞌkitu!’ 31 Krana kaloꞌk urak babuat bage sana ka Aku, kayu nang idup, jaji ape agi nang daꞌk urak muat duan kayu nang mati?”a
32 Waktu na ada uga dua iko panjahat nang dimaba ontoꞌk diukum mati sama-sama duan Yesus.
Yesus kana saleb
33 Waktu cacah ka utat nang dindama Tangkorak, umpu-ia nyaleb Yesus duan dua urak panjahat ka sana, nang siko ka sbala kanan nang siko agi ka sbala kiri Ia. 34 Lalu Yesus bakata, “O, Ama, gampon umpu-ia, krana umpu-ia angin nao ape nang umpu-ia muat.” Lalu tantara-tantara na cabut undi ontoꞌk milih sape nang pantas ngulih baju Yesus.
35 Urak-urak nang ada ka sana badiri kajah nele. Pamempen-pamempen Yahudi ngoloꞌk Yesus duan bakata, “Urak lain Ia nylamat, coba waktu ntu Ia nylamat diri Ia surak, kaloꞌk Ia na banar-banar Raja Tukang nylamat nang dimilih ulih Allah!”
36 Tantara-tantara uga kajah ngoloꞌk Yesus. Umpu-ia mere anggor nang macam ka Ia 37 sambel bakata, “Kaloꞌk Maꞌksana na raja urak Yahudi, coba dislamat diri Maꞌksana na!”
38 Ka pucuꞌk ulu Yesus dinulis: Ngintu raja urak Yahudi.
39 Siko taꞌk panjahat nang dinyaleb na ngoloꞌk Yesus, lalu bakata, “Bukatkah Maꞌksana na Raja Tukang nylamat? Coba dislamat diri Maꞌksana wan uraꞌkitu.”
40 Tape panjahat nang siko agi nagor page ia na, lalu bakata, “Anginkah kau gali ka Allah, maka kau nrima ukum nang sama duan Ia? 41 Diri memang pantas diukum, krana diri nrima sasuai duan pabuat diri, tape urak ngia angin babuat salah.” 42 Lalu ia bakata ka Yesus, “Yesus, ingan ka aku boh, kaloꞌk Maꞌksana datak njaji Raja.”
43 Yesus nyaut, “Aku madah ka kau, ari ntu uga kau ada sama-sama duan Aku ka Pirdaus.”b
Yesus mati
44 Waktu na kira-kira jam dua balas tangah ari, utat njaji patak klamat ka sloroh banua na sampai jam tege nurut ari, 45 krana mata ari branti basinar. Lalu tirai nang ada ka Rumah Allah tabala dua.c 46 Lalu Yesus ngampaꞌk duan kata nang nyarek, “Ama, ka Maꞌksana Aku nyarah nyawa Aku.” Udah bakata bage sana, Yesus ngabis singan Ia.
47 Waktu kapala tantara na nele ape nang dah tajadi, ia muji Allah duan bakata, “Urak ntu memang urak banar.”
48 Urak banyaꞌk datak ka sana ontoꞌk nele Yesus kana saleb, lalu udah nele kajadi na umpu-ia kajah pulak sambel nyakit diri krana umpu-ia nyasal. 49 Urak-urak nang kanal ka Yesus wan mbini-mbini nang nuna Ia taꞌk Galelea badiri taꞌk jauh nele kajadi na.
Yesus dingubur
50 Ada urak nang badama Yusup, siko taꞌk rombong Pangadel agama Yahudi nang baiꞌk wan jujur. 51 Ia angin stuju duan ape nang dimutus ulih Pangadel agama na. Ia na taꞌk kota Arimatea, sabuah kota nang ada ka Yudea. Ia na uga tangah nunggu Krajaan Allah datak. 52 Ia ampus ngadap Pilatus minta bangke Yesus ontoꞌk dikubur. 53 Lalu Ia nurut bangke Yesus, bangke Yesus na dimungkus duan blacu. Udah na nggurik Ia ka dalap kubur nang dimuat ka bukit batu. Kubur na gi mpalah. 54 Ari na ari Jumat, ari urak Yahudi nyiap diri ontoꞌk ari Sabat nang daꞌk datak.
55 Mbini-mbini nang datak sama-sama duan Yesus taꞌk Galelea, ampus uga ngantat bangke na. Umpu-ia nele kubur na wan nele bangke Yesus dinggurik. 56a Udah na umpu-ia pulak ka kota na lalu nyiap rampah-rampahd wan minyaꞌk wangi.