Nasehat-nasehat
17
1 Yesus bakata ka murit-murit Ia, “Nana pasti moncol panyabap-panyabap urak babuat dosa, tape claka urak nang muat urak lain babuat dosa. 2 Sigaꞌk ada urak nang bage sana, labih baiꞌk tangkap batu gilingana nang aya, dintolot ka tege ia, lalu ia dipangkalok ka dalap laot supaya ia angin agi nyasat urak-urak nang lamah kapacaya ia. 3 Jaga diri kau! Kaloꞌk ada urak nang sama kapacaya ia duan kau lalu babuat dosa, gingan ia. Tape kaloꞌk ia nyasal taꞌk dosa nang dah ia muat, gampon ia. 4 Bage sana uga kaloꞌk ia malar babuat dosa ka adap kau tape ia malar datak ngaga kau minta ampon, kau arus ngampon ia.”
5 Lalu rasol-rasol Yesus bakata, “Tuhan, tamahlah kapacaya uraꞌkitu supaya mukin koat!”
6 Tuhan nyaut, “Kaloꞌk kapacaya ngkanaꞌk aya bugi sasawi, ngkanaꞌk bisa mabut batak ara taꞌk tanah ntu, lalu minah ia ka laot, pasti batak ara na nnurut ka printah ngkanaꞌk.”
Tuan wan pambantu
7 Lalu Yesus bakata agi, “Misal ia ka ntara ngkanaꞌk ada nang bisi pambantu nang tukang nyangkol paya atau nang tukang nunggu domba. Waktu ia pulak taꞌk pagawe ia, adakah ngkanaꞌk bakata ka ia: Jon, langsong makat? 8 Pasti angin! Malah ngkanaꞌk bakata ka pambantu na, ‘Disiap dulu nasi wan ngkayu na ontoꞌk aku, kau uga arus siap nunggu aku sampai aku udah makat. Udah na, baro kau bisa makat.’ 9 Ngkanaꞌk uga angin pralu batrimakaseh ka pambantu na, krana ia dah muat ape nang dinyuruh ka ia.
10 Bage sana uga duan ngkanaꞌk. Sigaꞌk ngkanaꞌk udah muat sgala banda nang dinyuruh, ngkanaꞌk arus bakata ka diri ngkanaꞌk surak, ‘Uraꞌkitu ntu pambantu-pambantu nang angin patut nrima puji, uraꞌkitu cuma nggawe ape nang dinyuruh ka uraꞌkitu.’ ”
Yesus nyambuh sapuluh urak nang sakit kusta
11 Waktu Yesus tangah bajalat nuju Yerusalem, Ia namu batas ntara daerah Samaria wan Galelea. 12 Waktu Ia tama ka kampong, ada sapuluh urak nang bapanyakit kusta datak ngaga Ia. Umpu-ia badiri agaꞌk jauh, 13 lalu mpue Ia, “Yesus, Guru, kasihlah ka uraꞌkitu!”
14 Yesus nele urak nang bapanyakit kusta na lalu bakata, “Coba ngkanaꞌk ampus ngaga imam-imam, suruh umpu-ia nele tubuh ngkanaꞌk apekah ngkanaꞌk banar-banar udah baiꞌk.”b
Gi ka tangah jalat urak nang bapanyakit kusta ntadi nele tubuh umpu-ia udah baiꞌk. 15 Waktu siko taꞌk ntara umpu-ia nele tubuh ia udah baiꞌk, ia baleꞌk ngaga Yesus sambel muji Allah duan kata nang nyarek. 16 Ia sorong sambah ka adap Yesus lalu basokor. Urak nang basokor na, urak Samaria. 17 Lalu Yesus bakata, “Tadi ada sapuluh urak nang dinyambuh, ka mane nang smbilan? 18 Ngape umpu-ia angin baleꞌk muji Allah, takaꞌk cuma siko urak luar ntu?” 19 Lalu Yesus bakata ka urak luar na, “Badiri kau, pulak ja. Krana kau pacaya ka Aku, kau sambuh.”
Krajaan Allah daꞌk datak
20 Waktu urak-urak Parisi batanya ka Yesus, mila Krajaan Allah daꞌk datak, Yesus nyaut bage pitu, “Waktu Krajaan Allah daꞌk datak angin si tande nang bisa tatele. 21 Urak uga angin bisa madah, ‘Tele Krajaan Allah ada ka kitu!’ Atau ‘Krajaan Allah ada knaan!’ Krana sbanar ia Krajaan Allah ada ka ntara ngkanaꞌk.”
22 Udah na Yesus bakata ka murit-murit Ia, “Datak waktu ia nana, ngkanaꞌk daꞌk kapengen nele waktu Anaꞌk Taleno datak nang kadua kali ia, tape ngkanaꞌk angin daꞌk nele ia. 23 Lalu urak-urak daꞌk bakata ka ngkanaꞌk, ‘Tele, Ia ada knaan!’ Uga ‘Ia ada ka kitu!’ Usah kau ampus knaan, kau uga usah nuna ia. 24 Krana sama bage kilat mancar langin taꞌk ujuk nang sote ka ujuk nang lain, bage sana uga nana, waktu Anaꞌk Taleno daꞌk datak. 25 Tape Ia arus nanggong banyaꞌk sangsara labih dulu, uga kana tulaꞌk ulih urak-urak jaman kinintu. 26 Sama bage nang tajadi jaman Nuh ndulu, bage sana uga nang daꞌk tajadi waktu Anaꞌk Taleno dataꞌk nana. 27 Krana umpu-ia angin nyangka kaloꞌk ae lato daꞌk datak. Umpu-ia makat wan cocoꞌk, umpu-ia kawen-dingawen bage nang biase. Jaji waktu Nuh tama ka dalap prau nang mbada aya, gogo lato datak ngabis umpu-ia nang angin tama ka dalap prau na. 28 Bage sana uga nang tajadi waktu jaman Lot, umpu-ia makat wan cocok, ada nang bajaja ada uga nang mali, ada nang bauma ada uga nang ndiri rumah. 29 Tape waktu Lot kluar taꞌk kota Sodom, turut ujat api wan ujat mrerang taꞌk langin ngabis umpu-ia nang ada ka dalap kota na biabis. 30 Bage sana uga nana waktu Anaꞌk Taleno datak duan kuasa Ia.
31 Sape nang ada ka atas rumah ari na, usah turut ontoꞌk nangkap barangape nang ada ka dalap rumah. Bage sana uga urak nang ada ka uma, usah pulak ka rumah ia. 32 Ingan ape nang tajadi duan bini Lot! 33 Sape nang ncoba nahan idup ia, ia daꞌk ilang idup ia. Uga sape nang rela ilang idup ia, ia nylamat diri ia.
34 Aku bakata ka ngkanaꞌk: Waktu malam na ada dua urak tidur sapangkeng, nang siko dimaba, nang siko dinapuꞌk. 35 Ada dua iko mbini mmasen gandum sama-sama, nang siko daꞌk dimaba, nang siko daꞌk dinapuꞌk.” [ 36 Kaloꞌk ada dua urak bagawe ka uma, nang siko daꞌk dimaba, nang siko agi daꞌk dinapuꞌk.]
37 Lalu murit-murit batanya ka Yesus, “Tuhan, ka mane daꞌk tajadi na?”
Yesus nyaut, “Ka mane ada bangke, ka sana uga ada buruk pamapaꞌk bangke datak ngrubu ia.”