15
1 Waktu na, banyaꞌk tukang nagih pajak duan urak-urak nang dinganggap badosa datak ontoꞌk nangar Yesus ngajar.2 Maka nsana urak-urak Parisi wan guru-guru agama Yahudi basungun-sungun, lalu umpu-ia bakata, “Ngape Ia nrima urak-urak nang badosa? Uga takaꞌk makat srakat duan umpu-ia!”
Umpama domba nang ilang
3 Lalu Yesus madah umpama ka umpu-ia na bage pitu, 4 “Kaloꞌk ngkanaꞌk bisi domba saratus iko, lalu ka ntara nang saratus na ada siko nang ilang. Sape ka ntara ngkanaꞌk nang angin ngago domba nang ilang na? Ngkanaꞌk pasti napuꞌk domba nang smbilan puluh smbilan na ka utat taya rumput lalu ampus ngago domba nang sasat ntadi sampai tamu. 5 Kaloꞌk ia udah namu domba nang siko ntadi, pasti ia naroh ka bau ia duan ati nang sanang. 6 Cacah ka rumah, ia nyaru page-page wan urak-urak nang ada ka samaꞌk rumah ia lalu bakata: ‘Jon basanang-sanang duan aku, krana domba aku nang ilang udah tamu!’ 7 Aku madah ka ngkanaꞌk: Bage sana uga smua nang diap ka sruga daꞌk mbada sanang waktu ada siko urak nang badosa batobat, ketimbang urak nang smbilan puluh smbilan nang ngrasa diri ia banar wan angin pralu batobat.”
Umpama duit perak nang ilang
8 “Umpama ada mbini bisi duit perak sapuluh ote,a lalu duit ia ilang sote. Ia pasti nompoꞌk plita lalu nyapu rumah ia sambel ia ngago duit perak ntadi sampai tamu. 9 Kaloꞌk ia udah namu duit perak ntadi, ia nyaru page-page wan urak-urak nang ka samaꞌk rumah ia, lalu bakata, ‘Jon basanang-sanang duan aku, krana duit aku nang ilang udah tamu.’ 10 Aku madah ka ngkanaꞌk: Bage sana uga malekat-malekat Allah mbada sanang, krana ada siko urak badosa nang batobat.”
Umpama anaꞌk nang ilang
11 Yesus bakata agi, “Ada urak bisi anaꞌk dua iko, anaꞌk ia na nang laki. 12 Lalu anaꞌk nang bunsu na bakata ka ama ia, ‘Ma, bere sabagi taꞌk rata manaꞌk na nang njaji hak aku.’ Lalu ama ia magi rata na ka anaꞌk ia nang badua ntadi. 13 Angin lama udah na, anaꞌk bunsu na langsong nyual rata nang dimagi ulih ama ia tadi biabis. Lalu anaꞌk bunsu ntadi ampus ka nagari nang jauh. Ka nagari na ia ngabis duit ntadi duan idup bapoya-poya. 14 Waktu duit ia udah abis, tajadilah musim apat gantek ka sloroh nagari na, lalu anaꞌk bunsu na mole mlarat. 15 Lalu anaꞌk bunsu na ngago pagawe ka urak nang ada ka nagari na. Urak na nyuruh ia ampus ka uma ontoꞌk nunggu babi-babib ia. 16 Waktu ia ngrasa parut ia mbada lapar, ia daꞌk mapaꞌk ngkanan babi nang ada ka sana, krana angin urak nang mao mere ia makat.
17 Lalu ia sadar, ia bapikir dalap ati ia, ‘Kuli-kuli ama aku sampai balimpah-impah pamapaꞌk ia, tape aku kitu daꞌk mati klayung.’ 18 Kaloꞌk bage pitu, aku arus pulak ngaga ama aku, lalu bakata ka ia, ‘Ama, aku minta ampon, krana aku udah badosa ka adap Allah, bage sana uga ka adap ama. 19 Aku angin pantas agi njaji anaꞌk ama, tape anggap ja aku ntu kuli ama.’ 20 Lalu ia lumpat, pulak ngaga ama ia. Waktu ia masih jauh, ama ia nele anaꞌk ia na, lalu tarasa kasih ama ia ka anaꞌk ia na. Ama ia langsong batalama ngaga anaꞌk ia na, lalu ngapak ia wan nyium ia. 21 Lalu anaꞌk na bakata ka ama ia, ‘Ama aku minta ampon, krana aku udah badosa ka adap Allah wan ka adap ama, aku angin pantas agi njaji anaꞌk ama.’ 22 Tape ama ia bakata ka pambantu-pambantu ia, ‘Capat baba kitu pakai nang cega na, dipasang ka tubuh ia, pasang uga kingkit ka tunyuꞌk ia wan kasut na ka batis ia. 23 Udah na tangkap anaꞌk sapi nang mono lalu dimbeleh. Biar manaꞌk mapaꞌk sama-sama sambel basanang-sanang. 24 Krana anaꞌk aku ntu udah mati, tape idup agi. Ia udah ilang, kinintu aku namu ia agi.’ Lalu umpu-ia muat gawe wan basanang-sanang.
25 Waktu na, anaꞌk ntua nang tua na, masih bagawe ka uma, lalu ia pulak. Waktu dah samaꞌk rumah, ia nangar bunyi soleng, bunyi urak nyanyi wan urak nari. 26 Lalu ia nyaru pambantu ia nang ada ka sana ontoꞌk batanya, ape nang tajadi ka rumah na. 27 Pambantu na nyaut, ‘Adi kau udah pulak, lalu ama kau mbeleh anaꞌk sapi nang mono, krana ia namu adi kau baleꞌk duan tubuh nang baiꞌk.’
28 Anaꞌk nang tua na langsong manas, ia inga tama ka dalap rumah. Lalu ama ia kluar, ngomong duan ia. 29 Tape anaꞌk nang tua na nyaut, ‘Udah bataut-taut aku bagawe mantu ama, aku uga gi ngkala mlanggar printah ama. Tape siko anaꞌk kambing ja gi ngkala ama mere ka aku ontoꞌk basanang-sanang duan page-page aku. 30 Tape anaꞌk ama nang baro pulak ngan, nang udah ngabis rata ama duan placor-placor, malah ama mbeleh anaꞌk sapi nang mono na ontoꞌk ia.’