Plajar kusus ontoꞌk murit-murit
12
1 Waktu na baribu-ribu urak bakumpur, sampai urak nang ada ka sana bakeseꞌk-keseꞌk. Lalu Yesus mole ngajar. Pangajar Ia kusus dinuju ka murit-murit Ia. Yesus madah, “Ati-ati ngkanaꞌk ka urak-urak Parisi nang pura-pura alem, krana umpu-ia na sama bage ragi nang dinaroh ka dalap tapuk.2 Tape ape nang ada ka dalap ati umpu-ia daꞌk tabuka biabis. Krana angin banda nang tatutup nang angin daꞌk tabuka, uga angin banda nang dimunyi nang angin daꞌk kana tao. 3 Krana na, ape nang ngkanaꞌk madah ka utat nang patak, nana daꞌk tadangar ka utat nang tampaꞌk. Ape nang ngkanaꞌk madah kata cucut ka dalap kamar, nana daꞌk dinyampai sampai ka mane-mane.
4 Page ntua nang ada ka kitu, Aku madah ka ngkanaꞌk, usah ngkanaꞌk gali ka umpu-ia nang bisa munuh tubuh ngkanaꞌk, tape udah na ia angin bisa babuat ape-ape. 5 Aku daꞌk madah ka ngkanaꞌk, ka sape ngkanaꞌk arus gali. Ngkanaꞌk arus gali ka Allah, krana Ia nang bakuasa bukat cuma ontoꞌk munuh ngkanaꞌk, tape Ia uga bakuasa ontoꞌk muak ngkanaꞌk ka dalap nraka. Jaji, cuma ka Allah inyan ngkanaꞌk arus gali!
6 Tele lima iko buruk pipit dinyual duan raga dua ote duit nang paling murah, tape biar bage sana Allah angin lupa ka ia mang siko. 7 Malah buu nang ada ka ulu kau na udah kana itong. Maka nsana usah gali, krana ngkanaꞌk labih baraga taꞌk buruk-buruk pipit na.
8 Ingan baiꞌk-baiꞌk kata Aku ntu: Sape nang ngako diri ia pacaya ka Aku ka adap smua urak, Aku Anaꞌk Taleno uga ngako ia ka adap malekat-malekat Allah. 9 Tape sape nang inga ngako pacaya ka Aku ka adap smua urak, Aku inga uga ngako ia ka adap malekat-malekat Allah.
10 Urak nang njaat Anaꞌk Taleno, ia masih bisa dingampon, tape sape nang ngomong jaat tantang Roh Tuhan, ia angin bisa dingampon.
11 Kaloꞌk ngkanaꞌk kana tangkap krana pacaya ka Aku lalu dimaba ontoꞌk dingadel ka rumah sambayang wan uga dingadel ka adap pamrintah, usah kuater ape nang daꞌk ngkanaꞌk padah ontoꞌk mbela diri ngkanaꞌk. 12 Krana waktu na uga Roh Tuhan daꞌk madah ka ngkanaꞌk, ape nang arus ngkanaꞌk padah.”
Urak kaya nang baga
13 Ada urak taꞌk ntara urak banyaꞌk na bakata ka Yesus, “Guru, padah ka kamar ulu aku, supaya ia magi rata panapuꞌk ama uraꞌkitu ngan duan aku.”
14 Tape Yesus nyaut, “Angin urak nang ngangkat Aku njaji akim ontoꞌk magi rata ngkanaꞌk badua.” 15 Lalu Yesus bakata agi ka smua urak nang ada ka sana, “Ati-ati ngkanaꞌk boh, usah sampai ngkanaꞌk srakah. Krana idup taleno ngia angin tagantong taꞌk kakaya ia, biar gaꞌk rata ia balimpah-impah.”
16 Lalu Yesus madah umpama ka umpu-ia bage pitu, “Ada urak kaya, asel tanah ia balabih-abih. 17 Bapikirlah ia dalap ati, ‘Macam mane cara naroh asel tanah aku nana, krana aku angin bisi tampat agi ontoꞌk naroh ia?’ 18 Lalu ia bapikir agi, ‘Oh ku rasa bage pitu, dango padi nang ada ngan ku bungkar biabis lalu aku nggawe dango nang aya-aya. Jaji ka sana nana aku bisa naroh padi duan rata aku.’ 19 Udah na, baro aku madah ka diriku surak, ‘He, tele rata kau nang baduguk ngan! Slama bataut-taut ntu, angin mungkin daꞌk abis. Aku bisa makat-tidur, aku angin pralu bagawe agi, uga aku bisa basanang-sanang.’ 20 Tape Allah bakata ka ia, ‘He, kau urak baga! Malam ntu uga nyawa kau daꞌk kana tangkap. Lalu rata nang udah kau namut na ontoꞌk sape?’
21 Bage sanalah jaji ia duan urak nang namut rata ontoꞌk diri ia surak, tape ia angin ngago kakaya nang sbanar ia ka adap Allah.”
Usah kuater
22 Lalu Yesus bakata ka murit-murit Ia, “Krana na Aku madah ka ngkanaꞌk, usah ngkanaꞌk kuater ontoꞌk idup ngkanaꞌk, ape nang daꞌk ngkanaꞌk papaꞌk, atau ape nang daꞌk ngkanaꞌk pakai ontoꞌk tubuh ngkanaꞌk. 23 Krana idup labih panting taꞌk pamapaꞌk, bage sana uga tubuh labih panting taꞌk pakai. 24 Tele buruk gagak nang angin muat uma, angin bisi dango padi. Tape Allah miara ia. Ape agi ngkanaꞌk nang labih baraga taꞌk buruk-buruk na! 25 Sape ka ntara ngkanaꞌk nang gara-gara kuater bisa namah omor ia, biar gaꞌk scubit? 26 Jaji, kaloꞌk banda nang amuꞌk ja ngkanaꞌk angin sanggup muat ia, ngape ngkanaꞌk kuater ka banda nang lain?
27 Tele kambang-kambang nang tumuh ka dalap utat, ia angin bagawe uga angin muat pakai ia surak. Tape Raja Salomo nang mbada kaya ja angin makai pakai nang cega bage kambang na. 28 Kaloꞌk rumput nang bakambang ka dalap utat ari ntu ada, nalap ia dinunu. Tape Allah tatap nyolek ia. Ape agi ngkanaꞌk! Ngape ngkanaꞌk kurang pacaya? 29 Jaji usah ngkanaꞌk kuater ape nang daꞌk ngkanaꞌk papaꞌk duan ape nang daꞌk ngkanaꞌk cocoꞌk. 30 Krana banda nsanalah nang malar dimlaga ulih bangsa-bangsa nang angin nganal Allah. Maka Ama ngkanaꞌk nao ape nang ngkanaꞌk mralu.
31 Tape ngkanaꞌk arus brusaha muat ape nang Allah mao, supaya Ia mrintah ka idup ngkanaꞌk. Maka nsana Allah daꞌk namah ka ngkanaꞌk ape nang ngkanaꞌk mralu.
32 Biar mbalah ngkanaꞌk iniꞌk, ngkanaꞌk usah gali. Krana Ama nang ka sruga udah nyiap tuah taꞌk Krajaan Ia ontoꞌk ngkanaꞌk. 33 Jual biabis nang ada ka ngkanaꞌk, lalu duit ia dibere ka urak kodo! Kaloꞌk ngkanaꞌk babuat bage sana, ngkanaꞌk naroh ape nang ada ka ngkanaꞌk ka tampat nang angin bisa rusaꞌk, tampat na sruga. Rata na angin bisa ilang krana pancuri angin bisa nangkap ia, uga ane angin bisa mapat ia. 34 Krana ka mane rata ngkanaꞌk, ka sana uga ati ngkanaꞌk ada.”
Malar siap
35 Lalu Yesus bakata agi, “Ngkanaꞌk arus malar siap bagawe ontoꞌk mlayan Tuhan, sama bage pambantu nang malar makai baju nang langkap, uga malar nompoꞌk plita ia. 36 Ngkanaꞌk uga arus bage anaꞌk buah nang nunggu tuan ia pulak taꞌk gawe urak kawen, supaya waktu ia datak ngador pintu, ngkanaꞌk bisa capat nukas pintu na. 37 Brontong pambantu-pambantu nang masih bajaga waktu tuan ia datak. Krana tuan na daꞌk nyiap diri ia ontoꞌk bagawe bage pambantu, lalu ngundang umpu-ia duduꞌk, uga mpara umpu-ia. 38 Kaloꞌk tuan na datak tangah malam atau dini ari lalu namu pambantu-pambantu na masih bajaga, maka nsana banar-banar brontong umpu-ia.
39 Tape ngkanaꞌk arus ingan: Kaloꞌk tuan rumah na nao jam brape pancuri daꞌk datak, ia pasti nunggu rumah ia supaya angin kana bungkar. 40 Maka nsana ngkanaꞌk arus siap-siap uga, krana waktu Anaꞌk Taleno daꞌk datak, waktu ia angin bisa ditao.”
41 Lalu Petrus batanya, “Tuhan, sape nang dimaksut duan umpama ntadi, uraꞌkitu atau smua urak?”
42 Tuhan nyaut, “Jaji sape pambantu nang taat nang bisa dipacaya ontoꞌk njaji pangurus rumah tuan ia? Ia nalah nang dingangkat ulih tuan ia njaji kapala ontoꞌk pambantu-pambantu nang lain supaya ia bisa mere umpu-ia makat pas waktu ia. 43 Brontong pambantu nang dinamu tangah bagawe, waktu tuan ia datak. 44 Aku madah ka ngkanaꞌk: Pasti tuan na daꞌk ngangkat ia njaji pangawas ontoꞌk smua rata ia. 45 Tape macam mane sigaꞌk pambantu na jaat? Ia daꞌk bakata dalap ati, ‘Tuan aku angin pulak-pulak.’ Lalu ia mole mopoꞌk pambantu-pambantu nang ada ka sana. Udah na ia basanang-sanang sampai mabuꞌk. 46 Lalu tuan ia daꞌk datak waktu nang angin dinyangka. Tuan na daꞌk munuh pambantu na wan muat nasib ia sama bage urak-urak nang angin stia.
47 Stiap pambantu nang nao kamao tuan ia, tape ia angin nyiap diri ia, uga angin nnurut kamao tuan ia, ia kana popoꞌk nang koat ulih tuan ia. 48 Tape, urak nang angin nao kamao tuan ia, lalu muat banda nang salah, ia kana popoꞌk uga tape angin asa koat. Krana urak nang banyaꞌk kana bere, banyaꞌk uga nang diminta ka ia. Bage sana uga urak nang banyaꞌk dimere kapacaya, banyaꞌk uga nang dingarap taꞌk ia.”
Yesus maba pamisah
49 “Aku datak ontoꞌk maba api ka dunia, mbada baiꞌk kaloꞌk api na udah idup. 50 Tape masih barat sangsara nang arus Ku ngadap, Aku arus nanggong siksa, jaji ati Aku mbada glisah sampai waktu na datak.
51 Usah ngkanaꞌk ngira Aku datak ka dunia ngia ontoꞌk maba damai, tape Aku datak maba urak njaji balawan. 52 Krana mole kinintu, kaloꞌk ada lima urak ka dalap rumah na, umpu-ia bisa balawan, nang batege mlawan nang badua, nang badua mlawan nang batege. 53 Ama mlawan anaꞌk ia nang laki, anaꞌk nang laki mlawan ama ia. Indo mlawan anaꞌk ia nang bini, anaꞌk nang bini mlawan indo ia. Datu nang bini mlawan manantu ia nang bini, bage sana uga manantu nang bini mlawan datu ia nang bini.”
Nganal tande jaman
54 Yesus bakata uga ka urak banyaꞌk, “Kaloꞌk ngkanaꞌk nele muaramang dah patak ka sbala barat, ngkanaꞌk bakata, ‘Tele ari daꞌk ujat,’ lalu ari na banar-banar ujat. 55 Kaloꞌk ngkanaꞌk nele ari malar nyaru taꞌk slatan, ngkanaꞌk bakata, ‘Ari ntu daꞌk panas.’ Lalu ari na banar-banar panas. 56 He, urak nang pura-pura alem! Waktu ngkanaꞌk nele model langin wan bumi, ngkanaꞌk bisa ngira cuaca nang daꞌk tajadi. Tape waktu ngkanaꞌk nele tande-tande jaman kinintu, ngape ngkanaꞌk angin ngrati ape nang daꞌk tajadi waktu ntu?
57 Ngape ngkanaꞌk angin mutus surak ape nang banar? 58 Sigaꞌk kau dimaba ontoꞌk pakara ulih munsuh kau ka adap pamrintah, kau arus brusaha badamai duan ia waktu gi ka tangah jalat. Supaya kau angin kana baba ka adap akim. Kaloꞌk angin, akim na daꞌk nyarah kau ka plisi, lalu plisi nama kau ka panjara. 59 Kaloꞌk tajadi bage sana, Aku madah ka kau: Kau angin bisa kluar taꞌk panjara na kaloꞌk kau giangin mayar danda nang udah dinantu ulih akim.”