ZAN
Dɔfĩn Ben-tĩnù vɛ̃hṹ lɛ
á Zãn ɛ́ wɛ̃́
Zãn vɛ̃hṹ wĩ́nlɔ́ ɲún
Lɛ iè Yiezu Kirisa Ben-tĩnù vɛ̃hṹ lɛ á Zãn ɛ́ te wɛ̃́.
Zãn ɛ́ hàarí iè Yiezu Kirisa kɛ̀rán-zɛ̀ɓɛ̀ pírú àá nìɛ-ɓɛ̀-ɲu dɔ̀. Àpe ɛ́ temu hàarí ɛ́ yàndɛ́a ɛ́ kɛ́sí Yiezu sɛnù lè yìi lɛ á pe Yiezu àá mí kɛ̀rán-zɛ̀ɓɛ̀ pírú àá nìɛ-ɓɛ̀-ɲu mu ɛ́ dàa kɛsí ɛ́ ɓɛ́ mɛ́-dínlɔ́ ɛ̀ dí. (13.23) À ɓen mii bie mí yɛ̀rɛ́ bòo à wóò nɛ Yiezu kɛ̀rán-zuú lɛ á wɛ (21.20, 24)
Zãn ɛ́ wɛ̃́ lé pe vɛ̃hṹ mu lɛ bòo lɛ ɛ́ wé ɛ̀ ɓɛ̀ nìnbirìe ɛ̀ dũń sãàní kɛ́ Yiezu Kirisa ɛ́ iè pe Masiya, ɔ̀ fuenírɔ lɛ ɛ́ hɔ́ Dɔfĩn hàarí bie bòo nɛ mí ɓén tɔn á ɓen hɔ̀ dímíɲɛ́ hũn. Kɛ́ á lɛ ɛ́ dũmuasɛ̃̀ à ǹ á yí hɔ́ fuenírɔ́.
Zãn vɛ̃hṹ fìi ɓánlén, á Yiezu ɛ̀ zɛ̃́ní. À zɛ̃́niɛ nɛ Yiezu iè lè Dɔfĩn bienù lɛ wɔ́ míte àá nìnbírɔ ɛ́ ɓɛrɛ síɛ lè sṹsũ̀nù, ɛ́ síɛ kɛrɛ ɓɛ̀ nìnbirìe tĩ́ihṹ. Zãn ɛ́ bĩniɛ bie Yiezu bòo lɛ á hṹn wé lé sṹsũ̀nù: bòo lɛ á dàa hàarí wóò khɛ́ lé Ben-tĩnù ɛ̀ lɛ́ ɓɛ́ nìnbirìe ǹ, à wiɛní ɓɛ́ dɔriè, à ɲɛ ɓɛ ńɲíkĩ́nìɛ ɛ̀ líení ɓɛ́ nìnbirìe ǹ, à wé mú yéréké bòo bɔ̀-kuì lɛ wóò yòokɛ ɓɛ nìnbirìe lɔ̀n, fúu ɛ́ van dɛ̃un piè húmú àá piè vìerɔ́.
Zãn vɛ̃hṹ wĩ́nlɔ́ ɛ́ yí mɛnkɛ lé ɓán àá Matiye àá maaki àá Liike bòo lɛ ɛ́ ɓɛ́ dàa wɛ̃́ ɓɛ́ hɔ́n wɛ̀. Ɓɛ̀pe ɛ́ bie mù Yéréké bɔ̀-kùi lɛ ɛ́ Yiezu wɔ́ bòo. Kɛ́ Zãn pe wɔ́ mú yéréké bòo mu ɲúnhɛ̃ hùoɲu dɔ̀ mí-dòonún bòo á bie, à ɓiɛ̀ zɛ̃́niɛ nɛ mu bòo lɛ bòo hie iè mù lɛ ɛ̀ ɓɛ̀ nìnbirìe ɛ̀ dũń mú pe yéréké bòo mu ɲún sãàní.
Ɛ́ Zãn lò ɓiɛ̀ bie Yiezu bòo dɔ̀ lɛ á wɔ́ bòo kɛ́ Matiye àá Marike àá Liike ɛ́ pe yí bie mu wɛ̀. Mù pe bòo mu dɔ̀ ɛ́ iè hĩ̀ lɛ:
Hɔ̀ yaamu lɛ ɛ́ can hɔ̀ Kana lóo hũn bòo (2.1-12),
Yiezu àá Nikodɛmu bòo (3.1-21),
Yiezu àá ɔ́ Samari hṹnu bòo (4.1-12),
Ɔ̀ Bɛtizata nùún lɛ tɛkɛ̀a lɛ̀ wiɛnírɔ́ bòo (5.1-18),
Ɔ̀ nùún lɛ ɛ́ tɔn vaá lé àá iè mui wiɛnírɔ́ (9.1-41).
Lazari vìerɔ́ bòo (11.1-41)
Ɛ́ bòo lɛ á Zãn ɛ́ wɛ̃́ sɛ̃̀mɛ́kɛa ɓán mí vɛ̃hṹ hũn ɛ́ iè mù lɛ:
1 Yiezu Kirisa ɛ́ iè Dɔfĩn bienù lɛ ɛ́ te bòo mí-kùi ɛ́ wɔ́ (1.1-18)
2 Zãn Batiisi bòo lɛ á buie (1.19-34)
3 Yiezu hán kɛ̀rán-zɛ̀ɓɛ̀ leńkɛrɔ́ (1.35-51)
4 Yiezu yéréké bòo ɲúnhɛ̃ hùoɲu lɛ á wɔ́ bòo (2.1-12.50)
5 Yiezu mɛ́n-wihĩ́ lè sṹsũ̀nù lɔ̀n: piè lìe lènlɔ́ àá piè húmú (12.1-19.42)
6 Yiezu vìerɔ́ àá piè te zɛ̃́nírɔ́ mí kɛ̀rán-zɛ̀ɓɛ̀ ǹ (20.1-21.25)