Zãn 5

Bòo lɛ ɛ́ Yiezu dàa wiɛniɛ nùún dɔ̀ lɛ tɛkɛà lɛ̀

1 Ɛ́ pemù máahṹ ɛ̀ ɓɛ̀ Zuifuɓɛ ɛ́ dàa sɛ́rí dɔ̀. Ɛ́ Yiezu ɛ́ yòó van Zerizalɛmu. 2 Ɛ́ hɔ́ Zerizalɛmu lóo hũn, ɛ́ zĩínù ɲunù dɔ̀ hṹn wi yɔ́n ɛ́ ɓɛ́ piriè wóò bènin ɛ̀ dàa zɔ hɔ lóo hũn. Ɛ̀ lè saà dɔ̀ ɛ́ wi le zĩínù ɲunù mu sɛnù lɛ ɓɛ́ wóò ve àá Eburu níi nɛ Bɛtizata, kɛ́ ńzɛ̃hɛ̃ hùanú dɔ̀ ɛ́ kíríkɛa lè ǹ. 3 Dɔriè cɛ̀rìɛɛ ɛ́ hṹn dũmɛkɛasí hĩ́ ńzɛ̃hɛ̃ mu fìe hũn: ɓɛ̀ dɔ̀ iè muàɓɛ̀ ɛ̀ ɓɛ̀ dɔ̀ iè lóohĩ́ ɛ̀ ɓɛ̀ dɔ̀ iè ɓɛ̀ lɛ tɛkɛà lɛ̀. [Ɓɛ̀ hàarí ɛ́ hɔ̀ ɲumu sànbɔ̀níkɛrɔ́ ɛ̀ hìé; 4 iè mù lɛ ɛ́ Dɔfĩn Mɛlɛkɛ dɔ̀ ɛ́ hàarí wóò wé à ɓen síɛ hɔ́ saà mu hũn ɛ̀ síɛ zɛ̀kɛ̀ní mú ɲumu. À hán dɔrɔ lɛ wóò síɛ zɔ hɔ saà, hɔ̀ ɲumu lɛ ɛ́ sànbɔ̀níkɛ hũn ɛ́ wóò wɛ, hɛ̀ri kɛ́ piè duiè ɛ́ hṹn dĩ̀ kɛ wiɛ.] 5 Ɛ́ nùún dɔ̀ lɛ dɔ lɛ iè pemù lɔ́líe ɓénlé àá pírú àá bòo hùɔtĩ ɛ́ hṹn wi yɔ́n. 6 Ɛ́ mu lɛ ɛ́ Yiezu mɛun ɔ̀ kɛ́ á dũmua, á dũnɛ kɛ́ á dɔ hàarí, á zɔn ɔ̀ dìenin nɛ: « Kɔ́ cɛ̀ ɛ̀ kɔ̀ yí tɛkɛ-hiè? » 7 Á dɔrɔ mu ɛ́ zɔn bie lɛ́ à ǹ nɛ: « Ɲunsɔ, ń yí dàa nìnbírɔ lɛ ɛ́ mìí mi ɛ́ síɛ dé hɔ́ saà hũn lè yìi lɛ kɛ́ mu ɲumu ɛ́ zɛ̀kɛ wɛ̀, ɛ́ ń ɓen nin kɔ̀kɔ́kɛ ɛ̀ vɛ dɛ̃, búrɔsí à dɔ̀ ɛ́ dú niǹ híɛhɔ́ ɛ́ síɛ zɔn. » 8 Ɛ́ Yiezu zɔn khɛ́ lɛ́ à ǹ nɛ: « Síɛ hĩ́ní mìí kɔ́ dɛmu dìɛ ɛ̀ kɔ̀ vɛ lan. » 9 Ɛ́ pemù laà hũn, á nùún yóò wan, á húnà mɔ̀ mí dɛmu dìɛ à ɛ́ vɛ cɔ́. Kɛ́ mú pe sí den wɔ́ ɓɛ́ Zuifuɓɛ ńvũùnín sí dɔ̀ zɔn.

10 Ɛ́ ɓɛ́ Zuifuɓɛ hán-díe ɛ́ khie ɛ́ bie àá ɔ́pe lɛ ɛ́ Yiezu wiɛniɛ ɛ́ nɛ: « Zoòni iè ńvũùnín sí, ɛ́ kɔ́ yí fɔ́ɓáǹ ɛ̀ kɔ̀ tìé kɔ́ dɛmu dìɛ wɛ̀. » 11 Á zɔn khɛ́ lɛ́ ɓà ǹ nɛ: « Ɔ̀pe lɛ ɛ́ te mi wiɛniɛ ɛ́ bie lɛ́ mi ǹ nɛ n hĩ́ní mìí niǹ dɛmu dìɛ ɛ̀ ǹ vɛ lan. » 12 Ɛ́ ɓɛ́ zɔn ɔ̀ dìenin nɛ: « Ɔ̀ iè wie temu khɛ́ lɛ́ kɔ̀ ǹ nɛ kɔ mìí kɔ́ dɛmu dìɛ ɛ̀ kɔ̀ vɛ lan? » 13 Kɛ́ á pe nùún lɛ wan ɛ́ den yí dũ ɓàasɔ lɛ tie wiɛniɛ wɛ̀ iè mù lɛ ɛ́ Yiezu zɔn vúnun ɓɛ̀ nì-zã̀amá lɛ hṹn wi le viì mu hũn. 14 Ɛ́ pemù máahṹ ɛ̀ Yiezu zɔn yú ó lè Dɔfĩn zunù hũn á bie lɛ́ à ǹ nɛ: « Kɔ́ lò loo kɛ́ kɔ́ wo wan, ɛ́ kɔ́ bí bĩni wé bɔ̀-koohɔ́, bòo lɛ ɛ́ wé ɛ̀ kɔ̀ lɔ̀n bí bĩní be ɛ̀ pɔní mú pe sí wɛ̀. » 15 Á nùún mu ɛ́ cɔ́ van khɛ́ ɛ́ lɛ́ ɓɛ́ Zuifuɓɛ hán-díe ǹ nɛ a iè Yiezu ɛ́ te mí wiɛniɛ. 16 Ɛ́ sí iè pemù bòo hũn ɛ́ ɓɛ́ Zuifuɓɛ dàa ɛ́ cɛ̀ nɛ ɓɛ́ ɛ̀ wé bɔ̀-koohɔ́ àá Yiezu, mù bòo lɛ á wɔ́ hɔ́ peɓɛ̀ ńvũùnín sí zɔǹ bòo hũn.

17 Ɛ́ Yiezu zɔn bie lɛ́ ɓà ǹ nɛ: « Kìe Yàá wi mí tɔnlɔ́ hũn fúu, ɛ̀ ǹpe lò ɓìɛ ɛ́ tɛ́. » 18 Ɛ́ Yiezu bòo lɛ á bie bòo hũn ɛ́ lɛ́ ɛ́ ɓɛ́ Zuifuɓɛ hán-díe ɛ́ wookɛa ɛ́ cɛ̀ nɛ ɓɛ ɓí é; kɛ́ mú den yí mú lɛ á yí mɛ̀ndɛ̃ peɓɛ̀ ńvũùnín sí mí-dòonún bòo hũn, kɛ́ á bĩniɛ nɛ Dɔfĩn iè ɓá kùrú Yàá, iè bòo á nɛ mípe àá Dɔfĩn ɛ́ màamán.

Dɔfĩn Yɛ̀nù Yiezu pànkɛ́ ɛ́ lé àá hɔ́ pe Dɔfĩn viì

19 Ɛ́ Yiezu zɔn bie lɛ́ ɓà ǹ ɛ́ nɛ: « Nin khɛ́ mú lɛ́ miɛ ǹ àá bɔ̀bín: ǹpe Yɛ̀nù ɛ́ yí dɛ̀ bòo dɔ̀ ɛ́ yá wé niǹte ǹ wɛ̀. Kɛ́ mú bòo lɛ ɛ́ ń wóò wé iè mù lɛ ɛ́ ń mɛun kɛ́ kìe Yàá ɛ́ wóò wé. Ɛ̀ kìe Yàá bòo lɛ á wóò wé mí-kùi ɛ́ ńpe Yɛ̀nù ɛ́ ɓiɛ̀ wóò wé. 20 Iè mù lɛ á Yàá ɛ́ wɛ a Yɛ̀nù, ɛ́ mù bòo lɛ á wóò wé mí-kùi á wóò zɛ̃́ní ɛ̀ lɛ́ à pe Yɛ̀nù ǹ. Ɔ̀ ɓén bĩní zɛ̃́ní ɛ àá bòo dɔ̀ kɛ́ mú ɓàakɛa ɛ́ pɔ mu pe lɛ, ɛ́ mú wo ɓén yòokɛ mi lɔ̀n. 21 Kɛ̀a bòo lɛ á Yàá dàa wóò vìení ɓɛ́ nì-hiè à lɛ́ lé mɛkɛ̃nì ɓà ǹ, ɛ́ sí iè mu pe ɓà ńmaà á Yɛ̀nù ɓiɛ̀ wóò lɛ́ lé mɛkɛ̃nì ɓɛ̀ nìnbirìe lɛ á wɛ nɛ mii lɛ́ lé nin. 22 À Yàá lò den yáà lè nìnbírɔ dɔ̀ lìe wɛ̀, hĩ̀ lìe lènlɔ́ mí-kùi á dɔ́ á Yɛ̀nù núnú hũn, 23 bòo lɛ ɛ́ wé ɛ̀ ɓɛ̀ nìnbirìe ɓɛ́-kùi ɛ̀ ɓàaní ɛ́ Yɛ̀nù ǹ kɛ̀a bòo lɛ ɛ́ ɓɛ́ dàa ɔ̀ Yàá ɛ̀ ɓàanínin. Nìnbírɔ lɛ ɛ́ yá ɔ̀ Yɛ̀nù ɛ̀ ɓàanínin, ɛ́ ɓiɛ̀ yá ɔ̀ Yàá lɛ ti e tɔrɛ ɛ̀ ɓàanínin wɛ̀. 24 Nin bie mu lɛ́ miɛ ǹ àá bɔ̀bín: nìnbírɔ lɛ ɛ́ niǹ biehĩ́ ɛ̀ ɲí, à dũmuasɛ̃̀ à lɛ te mi tɔrɛ ǹ, ɛ́ yú lé mɛkɛ̃nì lɛ yá vé. Ɛ́ piè lìe ɛ́ yá bĩní lè wɛ̀, kɛ́ á den lɔ́ mú húmú hũn ɛ́ khie yú lé mɛkɛ̃nì. 25 Nin khɛ́ mú lɛ́ miɛ ǹ àá bɔ̀bín: lè yìi dɔ̀ ɛ́ vaá ɓen, ɛ̀ lè den wĩ̀niɛ ɓen dɛ̃un vɔ́, lɛ ɛ́ ɓɛ́ nì-hiè ɓén ɲí hɔ́ Dɔfĩn Yɛ̀nù tɛmu, ɛ́ ɓɛ́ lɛ ɛ́ ɲɛ́ lé ɛ́ yìe ɓén kań. 26 Kɛ̀a bòo lɛ á Yàá dàa iè mɛkɛ̃nì ɓàasɔ, á ɓiɛ̀ lɛ́ á Yɛ̀nù iè mɛkɛ̃nì ɓàasɔ. 27 Á lɛ́ lé núnú ɔ̀ Yɛ̀nù ǹ nɛ a teń hĩ́ lìe ɛ̀ lè, iè mù lɛ á iè ɔ̀ nìnbírɔ Yɛ̀nù. 28 Mì bí lɛ́ nɛ mu yòokɛ mi lɔ̀n wɛ̀, iè mù lɛ ɛ́ yìi dɔ̀ vaá ɓen, ɛ̀ ɓɛ̀ lɛ húrunkɛ ɛ́ wi hĩ búo hũn ɓɛ́-kùi ɛ́ ɓén ɲí piè tɛmu, 29 ɛ́ ɓɛ́ zɔ́ lé ɓɛ́ búo hũn. Ɛ́ ɓɛ́ lɛ wɔ́ bɔ̀-tente ɛ́ ɓén vìé ɛ́ yí lé mɛkɛ̃nì lɛ́ yá vé, kɛ́ ɓɛ́ lɛ ɛ́ wɔ́ bɔ̀-kòohɛ̃ ɛ́ ɓén vìé ɛ́ ɓɛ́ khíi lè lìe. 30 Ń yí dɛ̀ bòo dɔ̀ ɛ́ yáà wé niǹte ǹ wɛ̀. Kɛ́ Dɔfĩn bòo lɛ hɔ́ bie lɛ́ mi ǹ iè pe ɛ́ ń dàa wóò lè hĩ̀ lìe, ɛ̀ hĩ̀ lìe lɛ ɛ́ ń wóò lè ɛ́ térén, iè mù lɛ ɛ́ mú yí niǹ tĩì bòo ɛ́ ń wóò cɛ̀ wɛ̀, kɛ́ á lɛ tɔ̀rɛ mi tĩì bòo iè pe ɛ́ ń wóò cɛ̀.

Mù bòo lɛ ɛ́ hɔ̀ tìɲɛ́ ɛ̀ munkɛ Yiezu bòo hũn

31 Kɛ́ ń ɓen te niǹ kùrú bòo ɛ́ khɛ́, ɛ̀ mù pe lɛ ɛ́ nin khɛ́ ɛ́ yí be wɛ̀. 32 Kɛ́ á dɔ̀ ɛ́ wi yɔ́n ɛ́ te niǹ bòo ɛ́ bie ɛ́ ń dũ kɛ́ mú bòo lɛ á khɛ́ niǹ bòo hũn ɛ́ bɔn. 33 Ɛ́ mí pe ɛ́ tɔrɛ ɓɛ̀ nìnbirìe ɛ́ ɓɛ́ van ɔ̀ Zãn viì, á van munkɛa hɔ̀ tìɲɛ́ mí-kùi niǹ bòo hũn ɛ́ lɛ́ ɓà ǹ. 34 Ǹpe vìi, ɛ̀ mù yí ɓɛ́ nìnbirìe bòo lɛ ɛ́ ɓɛ́ bie niǹ bòo hũn ɛ́ temu mii zɛ̃́ní kɛ́ niǹ bòo lɛ ɛ́ nín bie ɛ́ bɔn wɛ̀. Kɛ́ nin mù khɛ́ ɛ̀ lɛ́ miɛ ǹ bòo lɛ ɛ́ wé ɛ̀ mì yí lé fuerɛ̀. 35 Ɔ̀ Zãn hṹn kɛ kɛ̀a lè pɛ̃̀ntíní lɛ ɛ́ ɓɛ́ ɲiɛ ɛ́ lé ɛ́ cĩ̀ ɛ́ mù ńpiemu ɛ̀ leń; ɛ́ mí tɛ̀ piè bòo ɛ̀ mì wɛniɛ mìte pɛ̃̀hṹ dɛ̀-cíi hũn piè ńpiemu mu bòo hũn. 36 Kɛ́ ńpe niǹ bòo lɛ nín wé ɛ́ hɔ̀ tìɲɛ́ ɛ̀ munkɛ niǹ bòo hũn ɛ́ pɔ a Zãn bòo lɛ á bie niǹ bòo hũn. Mù bòo lɛ nín wé ɛ́ iè mù pe lɛ á Yàá lɛ́ mi ǹ nɛ n wé tíiní ɲunù. Ɛ́ mú pe temu ɛ́ zɛ̃́ní kɛ́ á Yàá ɛ́ te mi tɔrɛ. 37 À Yàá lɛ te mi tɔrɛ lò ɓiɛ̀ ɛ́ hɔ̀ tìɲɛ́ munkɛ niǹ bòo hũn. Kɛ́ mí ɲɛùn yí ɲí piè tɛmu, ɛ̀ mì lò ɲɛùn yí mi piè híɛhɔ́ wɛ̀. 38 Ɛ́ mí yáà tɛ̀ dàá piè biehĩ́ mì tĩɛ̀ hũn, iè mù lɛ ɛ́ mí yí dɛsì ɔ̀pe lɛ á pe Yàá ɛ́ tɔrɛ ǹ wɛ̀. 39 Mí wóò ɓɛ́ɓɛ́ lé Dɔfĩn bienù vɛ̃hṹ ǹ ɛ̀ kɛ̀rán sãàní iè mù lɛ ɛ́ mí tĩì ɛ̀ mì nɛ mí ɓén yí lé mɛkɛ̃nì lɛ yá vé pe pelè hũn. Ɛ́ lé pe Dɔfĩn bienù vɛ̃hṹ mu ɛ́ te hɔ tìɲɛ́ ɛ́ munkɛ niǹ bòo hũn. 40 Kɛ́ mí lò yí tɛ̀ nɛ mí ɓen niǹ viì, bòo lɛ ɛ́ wé ɛ̀ mì yí lé mɛkɛ̃nì lɛ yá vé.

41 Ɓɛ̀ yí ɓɛ́ nìnbirìe ɛ́ ń nín cɛ̀ nɛ ɓɛ ɓàaní mi ǹ wɛ̀. 42 Ń den dũ miɛ, ń dũ kɛ́ mí yí wɛ Dɔfĩn wɛ̀. 43 Ǹpe ɓɛrɛ kìe Yàá ɲunù lɔ̀n ɛ́ mí pɛ̃́ niǹ bòo. Kɛ́ nìnbírɔ dɔ̀ ɛ́ ɓen ɓɛrɛ mí kùrú ɲunù lɔ̀n, ɛ̀ mì den tɛ̀ piè bòo. 44 Mí ɓen ɛ́ ɓán khóoníkɛ, ɛ̀ mì wɛ mite. Kɛ́ mí den yáà cɛ̀ nɛ mi wé bòo dɔ̀ lɛ ɛ́ lɛ́ ɛ́ Dɔfĩn ɛ́ dàá ɓàaní ǹ miɛ wɛ̀. Ɛ́ mí yí dɛ̀ yá dɛsĩ̀ mi ǹ lò. 45 Ɛ́ mí bí lieníkɛ ɛ̀ mì bie nɛ ńpe temu ɓén khɛ́ á Yàá Dɔfĩn híɛhɔ́ nɛ mí wɔ́ khɔn wɛ̀. Ɔ̀ pe Moyiizi lɛ ɛ́ mí síeniɛ àá mí ɲún nɛ ape te miɛ ɓén yíiní ɛ́ temu ɓén khɛ́ á Yàá híɛhɔ́ nɛ mí wɔ́ khɔn. 46 Kɛ́ mí hṹn dũmuasɛ̃̀ à pe Moyiizi ǹ àá bɔ̀bín, ɛ́ mí ɓiɛ̀ hṹn ɓén dɛsĩ̀ mi ǹ iè mù lɛ á Moyiizi ɛ́ bie niǹ bòo mí vɛ̃hɛ̃ hũn. 47 Kɛ́ mú lɛ ɛ́ mí yí dɛsĩ̀ à pe Moyiizi bòo lɛ á wɛ̃́ ǹ, ɛ́ mí yí dɛ̀ yá dɛsĩ̀ mi ǹ lò. »