Tibɔŋman dàkatam
2
1 Ama sii ń dàkà tibɔŋman kii tì nín sá puee, 2 kí tùkù bijaŋkpilib bí ŋúb́ bi-ba binib ń nīn tɔ́-bi. Bí nīn cáá iciin, bi-neendi nì bi-mɔtiiki nì bi-fookiiu ń nīn pɔ̄ɔ̄. 3 Míǹ ní kí tùkù binimpucikitikaabee yii bi-bimbim ń nīn sá binib bin bí circiree bimbim. Baa máaǹ kí nīn sòoǹ ki bíiĺ binib, kí taa nín̄ sá ndaam yumbui, ama bí nīn sá bin tìì isaŋkimɔntee. 4 Mimmee, bi ŋūǹ kí dàkà binimpupɔmbee bí béé bi nín máaǹ kí nīn néeń bi-calib nì bi-biyaamu miŋyee. 5 Bí nīn cáá iciin kí nīn ŋúb́ bi-ba, kí nīn nyí kudii poon tundi tiŋan, kí nīn sá bilaŋŋaŋfitiibi, kí nīn tɔ́ bi-calib, binib ń taa ká bi-pu ikpiti iba kí nīn cáa sòoǹ ki bíiĺ Unimbɔti bɔti.6 Míǹ mbaantiim, á sāŋkì binaacimpɔmbi yii bí nīn cáá mbimbimɔntiim. 7 Tikɔkɔ poonee, sii a-ba ń tɔ̄ atummɔnti kí dàkà báà ŋma bi mun ń nīn ŋáań míǹ. A-dàkatam ń nīn sá mbaamɔn ki kítì. 8 Á nīn sòoǹ anyɔɔbummɔnti ŋin pu baa ŋūǹ kí kpákáǹ-see, ní icoo ń cúú ti-nannanliibi, kun puee baa làá ká ti-pu ikpiti iba kí sòoǹ.
9 Á sāŋkì iyumbu í nīn tɔ́ i-dindambi tikɔkɔ poon, kí nīn ŋáań tin ŋān̄ i-dindambi ceeyee, kí taa nín̄ lì min kaa fáatì-bee. 10 Í taa yɔ̀ i-dindambi wanti báà tiba, ama i máaǹ kí nīn dàkà i-deedeebítam mmɔntiimin iyunti kɔkɔ, kí ŋmā kí tīī Unimbɔti ti-Fiiliu bɔti tin bi dàkèe tinyool an kɔkɔ pu.
11 Unimbɔti ŋanti tin cáań binib kɔkɔ difiilee nyáń mpaampiin pu. 12 U-ŋantee di dàkà-ti tí fá ti-bimbikpitim nì duulinya doo nimbitaataam. Ŋyunti ŋun poon ti bí nee, ti máaǹ kí nīn ŋúb́ ti-ba, kí nīn bí deedee ki nóó Unimbɔti mmɔntiimin, 13 kí nīn cí dipɔɔpindi wiiŋŋu ŋun pu ti cɔ́tée. Ŋwiin gbanti ní Yeesu Kriisitoo, ti-Nimbɔtiu un sá-ti ukpaan ki sá-ti ufiilee, làá dāá nyāntí u-nyootee. 14 Úǹ di dū u-ba ki tīī ki dá-ti ki nyántì ikpiti kɔkɔ poon, ní ki dū-ti ki kpántì dinikitil din sá úǹ baba yal, ki bí circir, ki cáá difaŋgiil ki tūǹ atummɔnteea.
15 A nín máaǹ kí dàkà miŋyee dee, kí tīī-bi kunyannyaau, kí kpìin̄-bi nì mpɔn, kí taa yàntī ubɔ ń kpèè kí sìŋkīǹ-si.