Kooloosi 2

1 M nyàab̀ ní béé yii m bíi mɔ̀ dimool an pɔ̄ɔ̄, nimbi nì Lawoodiisee yab nì bin kɔkɔ kaa láá pée ká-mi dalbee pu. 2 Di sá yii m là bí ká kunyannyaau bi-pɔbiliŋin, kí nīn néeń tɔb, kí nīn cáá nnyɔɔpee, kí nīn nyí an kɔkɔ taapu kí nīn cáá dimákal mmɔntiim. Mimmee, bi làá béé tin tin Unimbɔti nìn ŋúb́ dibalinee mbaamɔm, an dàkà yii Yeesu Kriisitoo, 3 un ni ní iciin nì dinyil kɔkɔ bál̀ ki kēe. 4 M tùkù-ni tibɔti nee ní kpèè tiŋan, ubɔ ń taa dū kinyɔɔmɔɔi kí ŋmàtiǹ-ni. 5 Báà m yaa kaa bí ni-kansikin, m-landɔkɔŋu bí ni-cee, ní an mɔ̄ǹ-mi m nín ká yii ni kpáfì mbaantiim ki sí deedee ki gbíntìi cáá dimákal Yeesu Kriisitoo puee.

Tí nīn gbíntìi nóó Kriisitoo

6 Kii ni nín nìn fōō ti-Dindaan Yeesu Kriisitoo puee, ní nīn gbíntìi nóó-u míǹ. 7 Ní báań inyaan u-ni kí nīn wīintí, kí nīn ŋúb́ tin bi nìn dàkā-ni ni fōō ki kííyee mpɔn, kí nīn jáaḿ-u u-ŋanti pu tikpil.

8 Ní kpèè tiŋan ubɔ ń taa dū u-nyil nì u-bɔfanti tin tɔ́kɔ́ binib koobiliŋ nì duulinya marab pu^a kaa tɔ́kɔ́ Kriisitoo puee kí ŋmàtiǹ-ni. 9 Di sá yii Unimbɔti bimbim kɔkɔ bí Kriisitoo wuntin, 10 ní nimbi kāntí tikɔkɔ u-cee, kun puee úǹ di sá ubɔti tin kɔkɔ cáá ipɔnee pu. 11 Ŋyunti ŋun ni nì Yeesu Kriisitoo ŋá ubaantee, u gíí-ni nì digiil din kaa sá tiwun gíitamee, ki gíí ki lēē ni-bimbikpitim. 12 Kii bi nín síb̀ bin kúùyee puee, míǹ ní ni nì Kriisitoo nìn kpíì, ní bi síb́-ni ŋyunti ŋun bi nìn fùl̄-ni Unimbɔti nyimee. Boonee, ni nì u fīkitì, kun puee ni fōō ki kíí yii Unimbɔti cáá mpɔŋkpaan ki ŋúń ki fīkitì Kriisitoo^b. 13 Dooooyee, ni-kpitii pu, nì ni nín kaa sá Juuda yab kaa gíí dikpancandee puee, naa nìn cáá dimaŋfal. Kɔŋkɔnnee, ni nì Kriisitoo nín ŋá ubaantee puee, Unimbɔti fīkitì-ni. U dū ti-kpitii kɔkɔ ki pú-ti, 14 ní ki fōō kugbɔŋu kun poon bi nìn ŋmàn̄ ti-kpitii ki bóob́ yii bí dáaĺ ti-tafalee, ki kpītì ki dū ki kpáá Yeesu dɔpuntikaaŋu pu. 15 Unimbɔti gbákal̀ arasiniibi nì ŋfaŋkpitim pɔŋyi. U cáań-bi ki dàkā báà ŋma ń kpèè bin pu u jíń dinyandee. U-Jipɔɔn dɔpuntikaaŋuee di sá u-nyandi gbanti.

16 Mimmee, bi yaa bíi sòoǹ ni-pu^c yii naa kòó tijikaal tiba, kaa kòó tinyɔkaal tiba mun, nì ni nín kaa kàal̀ iwiin in bi nìn yóoǹee, kaa kàal̀ iŋmapɔɔn nì iwiŋŋuŋfikaa puee, ní taa yàntī án nīn páb́-ni. 17 Di sá yii akoobilee di nìn dàkà tin dáá bí boon ki dòońee, an dàkà yii Kriisitoo. 18 Ubɔ ń taa ŋmàtiǹ-ni yii ni yīntì ni nín kaa là kí sìntī ni-ba taapu kí nīn jáaḿ Unimbɔti tuuŋyee. Di sá bi là kí lì yii bíǹ wāĺ ní. Ama baa máaǹ kí dàkà bi-ba kii bi nín yòontí bi-ba yilpu min nee, kun puee bi-landɔkɔi nyēeń bi-bimbikpitimin ní ki sá nniyaamin. 19 Baa ŋúb́ Yeesu Kriisitoo bɔti. Úǹ di sá diyil ki tīī tiwun kɔkɔ, ki tūkuntí akpab ní ki nɔ̀b̀ igiin, ki kpīintí tiwun ki yàntī tí nīn wīintí kii Unimbɔti nín là puee.

Kpú nì Kriisitoo kí nīn bí dimaŋfalin nì u

20 Ni nì Kriisitoo nín kpíì, u fīī-ni ki nyántì-ni duulinya marabinee, ba ŋá ní ni bí kii ni gíti sá taapu doo yabee^d? Ba ŋá ní ni gbíntìi dì akoobil ŋin sá yii: 21 «Taa cúú doo, taa dáká tinee, taa gbēē tin kíǹee.» 22 An bɔtee sá binib marab nì bi-dàkatam ní. Ni yaa gíti dáá dū tijin gbanti ki jíńee, tì bíil̀ dee, an kaa cáá yii án làá ŋá-ni tiba. 23 Ibaamɔn, a yaa kpēē marab gbantee, a làá lì yii bi cáá iciin ŋyunti ŋun bi bí yii binib ń dī dipɔ́ɔǹdi saŋŋu, kí sìntī bi-ba taapu, kí yàntī án píĺ bi-wuntee, ama marabee kaa cáá mpɔn kí cúú tiwun ń taa ŋá min kaa kítèe.