Fiiliipi 1

Kugbɔŋu kun Pɔɔl ŋmàn̄ ki tīī

Fiiliipi

yabee

Ijaam

1 Man Pɔɔl nì Tiimootee, timbi bin sá Yeesu Kriisitoo tɔntɔnliibee, di ŋmàn̄ kugbɔŋu nee.

Ti ŋmàn̄-ku kí tīī nimbi bin sá Unimbɔti yab ki kóò Fiiliipi tiŋkin ki fōō Yeesu Kriisitoo ki kííyee, ki kpáaǹ bin kpòotī Kriisitoo nikitilee nì bin tútúǹ ditundi Kriisitoo nikitil kansikinee. 2 Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Pɔɔl mēē ki tīī Fiiliipi tiŋki yab

3 Ŋyunti sá kamaa, m yaa bíi dàkafī ni-bɔtee, m jáaḿ Unimbɔti ni-pu. 4 Ŋyunti kamaa m yaa bíi mèé ni-kɔkɔ puee, m mèé nì dipɔɔpindi ní. 5 Di sá ni nìn tútuǹ-ti, kí yòon̄ ŋwimpeepeekaa^a ŋun ni fōō Yeesu ki kííyee ki dāa dūu sāā díǹ, tí ŋmā kí sòoǹ Tibɔmɔntiil ajan kɔkɔ pu. 6 M nyí yii Unimbɔti un kíĺ ki bíi tūǹ ditummɔntiil nee ni-pɔbiliŋ poonee kaa làá gbèen̄. U làá nīn pée gbíntìi tūǹ míǹ ní kí nīn pée cí Yeesu Kriisitoo gítintam wiiŋŋu^b. 7 An kítì ḿ nīn dàkafī ni-kɔkɔ pu míǹ ní, kun puee ni-bɔti kɔ́-mi tiŋan. Di sá yii, m yaa bí sarkanaaa, m yaa tí bí ki dàkà ki cántí Tibɔmɔntiilee baamɔŋyi nín sá pueeyaaa, ni-kɔkɔ kútí m-pu ki fòol̄ diyimɔɔbaantiil din Unimbɔti tīī-mee. 8 Unimbɔti u-ba nyí yii m néeń ni-kɔkɔ nì dineembaamɔndi din nyánní Yeesu Kriisitoo ceeyee ní.

9 M nín mèé ni-pu tiŋyee di sá yii Unimbɔti ń yàntī ni-neendi ń nīn wīintí ki cá baabadal, ní nīn mɔ̀tīi béetí ibaamɔn ki gàntī tiŋan nì tikpitil, 10 án nín làá ŋá pu ní ŋmā kí lēē tin kítèe. Ní Kriisitoo gítintam wiiŋŋu dalee, ní dāá nīn bí circir, bí taa ká ni-pu tiba. 11 Yeesu Kriisitoo puee, ni làá dāá lòoǹ abil tikpil ŋin sá deedee tuuŋŋi ŋin tìì Unimbɔti tinyool nì inyɔŋkee.

Kriisitoo di sá dimaŋfal

12 Nnabiyaamu, m là ní béé yii sarka un bi cúú-mi nee di yāntì ní Yeesu bɔti sòontam cūtì nyɔkɔpu malaa. 13 Di sá yii gɔminakpaan kàliŋkpilib kɔkɔ nì bin kɔ kíǹee béè yii an sá Kriisitoo un m nóóyee pu ní m bí sarkan^c. 14 Áli gba, man sarkau nee pu ní ti-nabiyaamu tikpil mɔ̀tīi dù bi-mákal ki ŋáań ti-Dindaan ni, ki kāntí kunyannyaau ki sòoǹ Unimbɔti bɔti, kaa fàŋkí.

15 Ama bi-kansikin bibee, an sá kináŋ kin bi cáá m-puee di yì-tì ní bi sòoǹ Kriisitoo bɔti ki kpākantí-mi, ní bin kíǹee, bíǹ baasii sòoǹ Unimbɔti bɔti nì nlandɔkɔmɔnti. 16 Bin sòoǹ Unimbɔti bɔti nì nlandɔkɔmɔntee, bíǹ néeń-mi ní ki nyí yii Unimbɔti lēē-mi ḿ nīn dàkà yii Kriisitoo bɔti sá ibaamɔn. 17 Ama bin béeyee, bíǹ sòoǹ Kriisitoo bɔti nì ilandɔkɔkpiti ki là kí kpákáǹ-mi, ki nyàab̀ kí gíti kɔ́ǹ-mi digìńdi kí kūtì sarka un poon m bí nee.

18 Bi yaa sòoǹ Unimbɔti bɔti ki là kí kpákáǹ-maaa, an yaa tí sá nì dipɔɔmɔntiilaaa, tíǹ kaa wù-mi. An sá man dipɔɔpindi ní ki làá nīn pée mɔ̄ǹ-mi ki cá, kun puee Kriisitoo bɔti ní bi-kɔkɔ sòoǹ. 19 Di sá m nyí yii, nì ni-wimmeem pu, nì Yeesu Kriisitoo Fam tūtuntam puee, m làá ká difiil. 20 M nín là tiwan tin ki cí tikpil ki cɔ́tí ti-puee di sá icoo ń taa cúú-mi tiba pu. Ama kɔŋkɔnnee kí nīn cée, m yaa làá kpúɔɔɔ, m yaa làá nīn tí báaa, ḿ mɔ̀tīí nīn cáá dipɔbil, m-wunti ń tīī Kriisitoo tinyool. 21 Ama mamee, Kriisitoo di sá man maŋfal, ní ŋkúm cāabìń-mi ipaati. 22 An yaa tí sá ḿ nīn bí dimaŋfal poon kí ŋmā kí tɔ̄ atummɔnti abaaa, maa nyí laakin m làá lēēyee. 23 Ajan gbanti liitil bí ki dátí-mi, m bàà là kí kpú kí cùú nīn kā Kriisitoo cee, míǹ di bàà ŋān̄ tikpil. 24 Ama, nimbi puee, an gíti páb́ ki lákatì yii ḿ nīn dáá bí dimaŋfalin. 25 M nín béè yii an sá mimmee, ní m nyí yii m làá nīn bí dimaŋfalin, man nì ni kɔkɔ làá nīn bí, ḿ tūtuǹ-ni ní ŋmā kí cù nyɔkɔpu, kí nīn bí dipɔɔpindin Unimbɔti saŋŋu poon. 26 Mimmee m yaa fātìi tí gítìń ni-kansikinee, man puee, án làá dāá nīn mɔ̄ǹ-ni ki gíti lákatì ni nì Yeesu Kriisitoo nín ŋá ubaantee pu.

27 Tin páb́ee di sá ni-bimbim ń nīn táá nì Kriisitoo Bɔmɔntiiti, ní báà m yaa dɔ́miń ni-ceeyaaa, m yaa kaa dɔ́mińaaa, ḿ nīn gbìl̀ bi sòoǹ ni nín pēē kinyɔkɔ pu ki báaǹ inyaan, ki jáà nì dipɔbil diba Tibɔmɔntiilee ń cù nyɔkɔpuee. 28 Ní taa yàntī ni-nannanliibi ń fàaǹ-ni tiba poon. Ni nín bí miŋyee di làá dàkà bíǹ yii bi wáŋkì, ní kí dàkà nimbi yii ni yú difiil saŋŋu pu. Unimbɔti di làá yàntī bí béé míǹ. 29 Di sá yii u pú-ni diyimɔɔl ní nīn nóó Kriisitoo kí taa fōō-u kí kíí ŋmaniŋma, ama ní jī falaa mun u-pu. 30 Kɔŋkɔnnee, man nì ni kɔkɔ di kpáfì ki bí dimool poon. Dooooyee ní ni nìn ká yii m bí dimool gbantin^d, ní ni gbìl̄ yii m dáá gbíntìi bí ki mɔ̀ áli nìn díǹ.