Eefeesi 3

Pɔɔl tundi bin kaa nyí Unimbɔtee cee

1 An puee, man Pɔɔl bí ki mèé Unimbɔti. M sá Yeesu Kriisitoo sarkadaaŋwu ki tūǹ ditundi ki tìì nimbi bin kaa sá Juuda yabee. 2 Ni nyí yii Unimbɔti ŋá-mi tiŋan ki tīī-mi ditundi ḿ tɔ̄ kí tīī-ni. 3 Unimbɔti bīitì tibɔbalkaal tin nìn bí dooooyee pu, ki dàkā-mi ní m béè. Tíǹ ní m ŋmàn̄-ni nì anyɔɔbuŋkaaŋkaa nee. 4 Ni yaa bíi kàaǹ tin m ŋmàn̄ nee, ni làá ká yii m béè Kriisitoo bɔti tin nìn bí dibalinee. 5 Dooooyee, Unimbɔti kaa nìn nyántì an bɔtee ki dàkā binib. Kɔŋkɔnnee u dī u-Fam pu ki yāntì u-circir kpambaliŋ nì u-bɔnaatiliibi béè-tì. 6 Tíǹ di sá tigaajati tin Unimbɔti tìì Juuda yabee. Ni mun làá fōō-tì, ni nì Juuda yab kɔkɔ kpántì unibaanti ní. Unimbɔti nín pōoǹ tin kí tīī bin sá Yeesu Kriisitoo yabee, u làá tīī ni mun kudɔŋu, Tibɔmɔntiil tin ni fōō ki kííyee pu.

7 Unimbɔti ŋá-mi tiŋan ki tīī-mi ditundi din sá ḿ nīn sòoǹ Tibɔmɔntiil ki tìì binibee. Nì u-pɔŋŋu ní u ŋá míǹ. 8 Unimbɔti yab kɔkɔ kansikinee, man di sá bin sá ŋwaamuee waaki^a. Nì míǹ kɔkɔee, Unimbɔti pú-mi diyimɔɔl ḿ sòoǹ nì bin kaa sá Juuda yabee Kriisitoo gaajati tin sá tikpaŋkpaandi, kaa cáá dikúntilee bɔti. 9 U pú-mi diyimɔɔl ḿ dàkà binib ń béé tin Unimbɔti nìn lēē kí ŋá an nìn dáá bál̀ u-ni dooooyee. Unimbɔti un náań tikɔkɔee di dū-tì ki bál̀ áli ki dāa sāā ŋyunti ŋun bí nee^b. 10 Ama kɔŋkɔnnee Unimbɔti yāntì Kriisitoo nikitil puee, ituun nì bin kɔkɔ sá bipɔndambi^c ki bí yilpuee béè Unimbɔti ciiŋyi nín wīikí ki bí tɔbin puee. 11 Míǹ ní u dī ti-Dindaan Yeesu Kriisitoo pu ki ŋá kii dooooyee u nín kaa nìn dáá náań duulinya ki lēē yii u làá dāá ŋá miŋyee. 12 Ti nín fōō Yeesu Kriisitoo ki kíí ti nì u ŋá ubaantee puee, ti ŋūǹ kí sútí kí pìl̄ Unimbɔti sɔkɔmii nì dimákal poon. 13 Míǹ puee, m mèé-ni yii m nín bíi jīǹ falaa ni-puee, ni-wunti ń taa yɔ̀tī. M-falaauee sá-ni tinyool ní.

Yeesu Kriisitoo neendi

14 An pu ní m gbàantí ti-Baa Unimbɔti nimbiin ki mèé ni-pu. 15 Úǹ cee ní bin bí yilpuee nì bin bí taapuee kíǹ ki nyí kubaatiiu. 16 Úǹ di sá tinyooldaan ki cáá tikɔkɔ, an puee ní m mèé-u án nín làá ŋá pu u-Fam ń tīī-ni mpɔn tikpil ni-pɔbiliŋinee. 17 M gíti mèé-u yii Kriisitoo ń nīn bí ni-pɔbiliŋin, kun puee ni fōō ki kíí. M mèé-u yii ú yàntī ní nīn néeń tɔb kí báań inyaan, kí nīn yú ki pɔ̄ɔ̄, 18 ní ni nì Unimbɔti yab kɔkɔ ń ŋmā kí ká mpɔn kí gbìl̄ Kriisitoo neendi nín lālim̀ ki gbí ilaan kɔkɔ puee. 19 Nì min kɔkɔ u-neendi wīikí tikpil ki jítiǹ unil nín ŋūǹ kí gbìl̄ miŋyee, m mèé-u yii ú yàntī ní béé, án nín làá ŋá pu tin kɔkɔ bí Unimbɔtinee ń nīn bí ni mun nee.

20 Úǹ Unimbɔti di ŋūǹ nì u-pɔŋŋu ŋun bí ti-ni ki tūǹ ditundee, kí ŋá tikɔkɔ án jītíǹ min ti mèé-uee nì min ti dàkafēe pu. 21 Yeesu Kriisitoo puee, Kriisitoo Nikitil ń tīī Unimbɔti tinyool ŋyunti kamaa kí nīn pée cáa cá jaanjaan! Ameeni.