Sakari 7

Isirayeel yab baasii bōob̀ kinyɔkɔ Unimbɔti pu níii?

1 Daariyusi nín jíń dibeel dibinnanaatiil uŋmawawati, an dàkà yii uŋmal un bi yíì Kiisileefee iwiin inaa dal ní ti-Dindaan sòon̄ nì Sakari tibɔti nee. 2 Beeteel yab nìn tú Sareeseer nì Reegeem-Meeleeki ní ki lēē binib ki kútì bi-pu bí cùú gbàam̀ ti-Dindaan ú sɔ̄ bi-saai. 3 Binib gbanti nìn máaǹ kí bàlifì ti-Dindaan Mpɔŋkɔdaan saraaŋaliibi bin bí kunimbɔtidiinee nì u-bɔnaatiliibi yii: «Tí nīn gbíntìi sūǹ ki bōob̀ kinyɔkɔ uŋmaŋmooŋmooti poon kii ti nín pée kpààa ŋáań abin ŋin jítèe pueeyaaa, tí taa ti ŋá?» 4 Niinee ní ti-Dindaan Mpɔŋkɔdaan sòon̄ nì mi tibɔti nee 5 ḿ bàlifì kitiŋ nee pu yab kɔkɔ nì bisaraaŋaliibi yii:

«Ni nín bōob̀ kinyɔkɔ

ki sūǹ ki yáliŋkí uŋmaŋmooŋmooti nì

uŋmaluluúti^a kamaa áli abin imuŋku ita nì saalaayee,

ni ŋá míǹ án mɔ̄ɔkiǹ-mi níii?

6 Ni yaa nìn tí bíi jīǹ ki nyùee,

kaa nìn sá nimbi ni-ba

ní ni jīǹ ki tììii?»

7 Ŋyunti ŋun Jeerusaleem yab nì ntimu mun māntìi tú-kèe yab nìn dáá bí nsɔŋfinee, nì ŋyunti ŋun binib nìn dáá kóò Neegeeb teekun nì Seefeelaa paal puee, ti-Dindaan nìn yāntì u-bɔnaatiliibi dooooyee yab báakì ki kpáafì binib tibɔti gbanti.

8 Ti-Dindaan nìn sòon̄ nì Sakari yii: 9 «Man ni-Dindaan Mpɔŋkɔdaan nín sòon̄ puee sèé yii:

<Ní sòoǹ ni-juti bɔti nì mbaamɔn,

ní báà ŋma ń dàkà u-juti dineendi nì disaasɔl.

10 Ní taa mùul̀ ukpiipu nì ditaŋkpiibil,

nì unicaan nì bisoodambi.

Ni-kansikin ubɔ ń taa dàkafì

u-juti pu nlandɔkɔkpiti.»

11 Ama bi nìn yíì kaa pílifì, ki pɔ́ɔkì bi-pɔbiliŋ. Bi nìn kpáá bi-tafaliŋ kí taa gbìl̄. 12 Bi nìn pɔ́ɔkì bi-pɔbiliŋ kii ditaŋkpalee. Baa nìn là kí pīlifì ti-Dindaan Mpɔŋkɔdaan bɔti nì u-dakal din u-Fam nìn dī u-bɔnaatiliibi dooooyee yab pu ki tīī-bee. Niinee ti-Dindaan Mpɔŋkɔdaan gíí bi-pu diŋuul ŋkpitim pu. 13 An pu ní ti-Dindaan Mpɔŋkɔdaan lī yii:

«Kii man nín yíiń-bi

baa pílifiǹ-mee,

míǹ mbaantiim ní bi yíiń-mi

ní ma mun kaa pílifiǹ-bi.

14 M jìn̄-bi bi yàl̄ ki kɔ́

atimbun ŋin kɔkɔ baa nyée poon.

Kitiŋ kin bi yíkìi yāntèe,

bi nāaǹ-kì,

ní ubɔ kaa ti cá ki-naaa,

ubɔ kaa ti nyēē ki-ni.

Kitiŋ kin nìn sá kimɔntii ki mɔ̄ ŋkaayee

dūu kpántì kuteeu.»