Seefaniya 1

Kugbɔŋu kun sòoǹ

Seefaniya

puee

1 Tibɔti tin ti-Dindaan nìn sòon̄ nì Seefaniya ŋyunti ŋun Amɔn jipɔɔn Joosiyaasi nìn sá ubɔti Juuda tiŋkinee sɔ̀. Seefaniya gbanti nìn sá Kuusi naakookun, Geedaliya jipɔɔn, ki sá Amariya naantiiu, ní ki sá Eeseekiyaasi naantitɔntɔkɔl.

Juuda nì Jeerusaleem yab tafadaaldi

2 Ti-Dindaan bí yii:

«M làá kúntí tin kɔkɔ

bí kitiŋ puee.

3 M làá kúntí binib nì tiwaŋkuti,

nì inoon in bí kutaa puee

nì ijɔm in bí dimɔɔlinee.

M làá kúntí bitɔŋfitiibi

nì tin yàntī bi tūǹ atuŋkpitee.

M làá kúntí binib kɔkɔ kitiŋ pu.

Ti-Dindaan di lī míǹ.

Unimbɔti làá jáǹ Juuda nì Jeerusaleem tiŋki

4 M làá já nì Jeerusaleem

nì Juuda yab kɔkɔ.

M làá kúntí awaatuun ŋin kíǹee mpaan nee pu,

ní kí kúntí awaa tɔntɔnliibi nì ŋi-tandambi.

5 M làá kúntí bin tɔ̄kɔntí adibɔ̀bikaa yilpu

ki jáaḿ iŋmalbijaayee.

M làá kúntí bin gbàantí man bi-Dindaan nimbiin,

ní ki gíti pùtī diwaal Mooleeki yindee^a.

6 Man ni-Dindaan, m làá kúntí

bin fàtī bi-boon ki tìì-mi

kaa nyàab̀-mi

ní kaa bàlifī-mi isaŋkee.»

7 Ní ŋmīĺmaan díkí diki ti-Dindaan Unimbɔti nimbiin,

di sá yii u-ŋuul wiiŋŋu tóobiń.

Ti-Dindaan bɔ́ntì saraa,

kí ŋá bin u yíińee circir.

8 Ti-Dindaan bí yii:

«M-saraau wiiŋŋu gbanti dalee,

m làá dāá já nì bikàliŋkpilib nì abɔtibil,

nì bin di pèentí tiwan kii binicambee.

9 Yaadal wiiŋŋuee m làá dāá dáaĺ

bin di yùkufī ki lákatí kunimbɔtidii punyɔkɔkee tafal^b.

M làá dāá dáaĺ bin kɔkɔ fìkì binib

ki mùul̄-bi ki fòol̄ tiwan

ki gbēentí bi-waadiikuee.

10 Ti-Dindaan bí yii,

ŋwiin gbantee, Jeerusaleem tiŋkinee,

bi dāa gbìl̀ ibiil Ijɔm punyɔkɔ watil,

ní ikuŋkuunti tùm̀ kitimpɔŋ watil,

ní kuwookpaaŋŋu gà ŋgbantamu pu.

11 Makteesi yab, nín̄ kūuntímaan!

Di sá yii binyampoobi kɔkɔ làá kpú,

bin ŋmàntī animbilee làá kúntí.

12 Ŋyunti gbantee, m làá dāá tūū fitila

ní kí kɔ́ Jeerusaleem tiŋkin kí kpùkul̀ an kɔkɔ pu.

M làá dāá dáaĺ binib bin kā kaa ŋáań tibee tafal

kii tidakpati nín dɔ̀ ndaam taapu puee.

Bi dàkafī yii: <Ti-Dindaan kaa ŋūǹ kí ŋá tiŋanaaa,

kaa tí ŋūǹ kí ŋá tikpitil mun!>

13 Too, bi làá dāá fūkul̀ bi-gaajawanti

ní kí kpēelikì bi-diiŋŋi.

Bi māā adiin, ama baa làá kɔ́-ŋi.

Bi kù fiinyi sufii kpaaŋŋi,

ama baa làá ká i-daam kí nyɔ̀.»

Ti-Dindaan wiiŋŋu dal

14 Ti-Dindaan wiŋkpaaŋŋu^c tóobiń,

ŋu tóobiń, ŋu dòoń malaa malaa.

Ŋwiin gbantee, binib làá dāá gbá ibiil

nì dinimbinaamandi.

Bibaatandambi gba làá dāá gbá ibiil

ki nyàab̀ dijòońdi.

15 An dāa sá diŋuul wiiŋŋu ní,

dinimbinaamandi nì kufaaŋŋu wiiŋŋu,

asaluu nì ŋkúm wiiŋŋu,

kunyeeu nì dibɔmbɔndi wiiŋŋu,

atagbambɔn nì dipɔ̀ńdi wiiŋŋu ní an dāa sá.

16 Ŋwiin gbantee, bi làá dāá gbìl̄

bijanjaliibi búǹ dikantándi,

ní kí fáá ijanjakuŋkuunti

kí já nì ntimu mun bi máń digundi ki túee

nì mu-sintil difɔkɔŋi.

17 Ti-Dindaan bí yii:

«M làá dāá kɔ́ǹ binib dinimbinaamandin,

ní bí nīn còom̄ kii bijɔfubee,

kun puee bi yīntiǹ man bi-Dindaan.

Bi-fatikuu làá dāá kpáatí kí fá kitiŋ kii dibulee,

ní bí cáá bi-wunti kí fá kii titampummoolee.»

18 Bi-nimbiliŋ nì bi-sindaariyab

kaa dāa ŋūǹ kí fīī-bi.

Ti-Dindaan ŋuul dalee,

u-ŋuukpaandi ŋmiŋu dalee,

kitiŋ kɔkɔ làá dāá wà kí céetí.

Tiŋman, u làá dāá kpɔ̀ kí céetí

binib kɔkɔ kitiŋ pu.