Yoona 3

Yoona báakì ti-Dindaan nyɔɔbundi Niiniifi tiŋkin

1 An ŋá mimmee ní ti-Dindaan sòon̄ nì Yoona nliliitiim ki bí-u yii: 2 «Yīkì kí cù Niiniifi kitiŋkpaaŋŋi poon kí dū tibɔti tin m dūu ŋúbiǹ-see kí bāakì kí tùkù niin yab.» 3 Niinee ní Yoona yíkì ki nín cá Niiniifi tiŋkin, ki nóó nì ti-Dindaan nín bí yii ú ŋá puee. Niiniifi tiŋki gbanti nìn sá kitiŋkpaŋkpaaŋŋi ní, an kaa cáá bí lì. Iwimmɔn ita kɔkɔ ní unil nìn dùŋfī ní kí còom̀ kí pùntī-kì. 4 Yoona kɔ́ kitiŋin ki kíĺ ki cōom̀ ŋwiin ŋubɔ ní ki báakì ki lī yii: «An gíti kíǹ iwiin imuŋku ili Niiniifi tiŋki làá kúntí!» 5 Niiniifi yab nìn fōō Unimbɔti bɔti tin u sòon̄ee ki kíí^a, ní bi yóoǹ yii báà ŋma ń bóob́ kinyɔkɔ. Di sá kí yòon̄ bikpilib kí tin cáá sāā ŋwaamuee, báà ŋma nìn dū kutuku ki pēeǹ kí dàkà yii bi fá bi-kpitii ki kpántì bi-ba. 6 Tibɔti dūu bàn̄ Niiniifi bɔtiu ceeyee ní u yíkì u-beejal pu, ki cúú dibeebɔkutil din u pēēyee ki pēetì, ki dū kutuku ki pēeǹ ní ki kāl̀ ŋfantamin^b. 7 U ŋée ní ki yāntì bi báakì Niiniifi tiŋki kɔkɔn ki lī yii: «Ubɔti nì u-kpambaliŋ yóoǹ mara yii binib nì tiwaŋkuti, inaa nì ipii nì iŋoobu, báà ubɔ ń taa jī tijinaaa, kí taa nyɔ̀ nnyim mun. 8 Binib nì tiwaŋkuti kɔkɔ ń dū kutukub kí pèen̄ kí tīminsì kí yíiń Unimbɔti nì bi-pɔŋŋu kɔkɔ. Báà ŋma ń dū isaŋkpiti in u còom̄ee nì tipɔmbɔti tin u ŋáańee kí fá. 9 Án yaa yíì Unimbɔti làá kpántí u-landɔkɔŋu, kí yàntī u-ŋuukpaandi din u gíí ti-puee ń sɔ̀ŋkì ní tí ŋmátí kí taa kpú!»

10 Unimbɔti nín ká yii Niiniifi yab pɔ́ɔǹ bi-ba ki dū isaŋkpiti in bi nóóyee ki fée, ní u kpántì u-landɔkɔŋu kaa ti dáaĺ bi-tafal kii u nín bàà là kí ŋá puee.