Bi nàn̄ Jeerusaleem kunaau
4
1 Ba pu ní sindaariya bɔ̄ntì míǹ kaa ti jìl̀?Ba pu ní sindaariyamɔnti gáń míǹ?
Ba pu ní ataŋkpee ŋin bi dūu sú Unimbɔtee
dɔ̄ ki yàl̄ an kɔkɔ pu míǹ?
2 Ba pu ní Siiyɔn bɔtiijab bin náań nì
sindaariyamɔntee kpántì kii
kuyɔkɔu booŋŋi ŋin uyɔɔmaati
dū u-ŋalii ki máńee míǹ?
3 Kpèèmaan iŋɔkɔ, i tìì i-biyaamu
dibiil i ŋáaḿ.
Ama man nibul sá ubinaati un cáá ntoomee,
àá kii taataabi bin bí kuteeunee ní.
4 Nnyinnyoo cúú kinaŋgbammaŋ
ki-limbil nákáǹ ki-nyɔkɔ poon ki kūń.
M-biyaamu bàlifī tijin pu
ubɔ kaa tìì-mu.
5 Bin nìn jīǹ tijimmɔntiilee
bí ki kúù ŋkùm adan pu.
Bin bi nìn lōō nì bisatamɔntiibee
dɔ̄ titampummoolin.
6 M-nibul yab kpitii wīikí
ki jítiǹ Soodoom yab yai.
Bi nìn nāaǹ kitiŋ gbanti dicilpu dicilpu
ní ubɔ kaa ŋúń ki ŋá tibaa.
7 Siiyɔn yab bɔtiijab
nìn jìl̀ kii ntaayimee ní,
ní bi-wuŋgbaŋŋu pīiǹ káŋkaŋ kii nnaabiimee.
Bi-wunti nìn jɔ̀m̀ kii ataŋkpanyaan
ŋin bi yíì kɔrayee
ní bi-nimbiiŋyi jìl̀ kii ataŋkpanyaan
ŋin bi yíì safiiree.
8 Ama kɔŋkɔnnee bi-nimbiiŋyi bɔ̄ntì
kútí kuti kii dinaŋkansimbɔndee.
Bi yaa ká-bi adan puee baa ti nyí-bi,
bi-wuŋgbaŋŋu kūń kii ndɔee ní.
9 Á kpú dikɔ̀ndin sɔ́ǹ
ŋkùm ń kpɔ̀-si,
á páĺ tijin kpátam pu.
10 Dinimbinaamandi din jéetì m-nibul puee
yāntì binimpoobi bin
kaa mɔ̄ bi-biyaamu puee
tɔ́kɔǹ-mu ki ŋmɔ́b.
*
11 Ti-Dindaan kpáatì u-ŋuukpaandi kɔkɔ,
ki tūū Siiyɔn tiŋkin ŋŋmi
ní an wùn̄ ki tin kpáaǹ ki-nyeel.
12 Ubɔti ubɔ àá unil ubɔ kitiŋ pu
kaa fōō ki kíí yii
unannanli ŋūǹ kí dī
Jeerusaleem punyɔmmu pu kí kɔ́.
13 Unimbɔti bɔnaatiliibi kpitii
nì bisaraaŋaliibi yìntitam
di yì nnaabu gbanti,
kun puee bi kūū
bi-timmun maanyiibab.
14 Ama kɔŋkɔnnee, bi còom̄ ki táfí
kii bijɔfubee, fatiku táká-bi.
An puee ubɔ kaa máaǹ
kí gbēē bi-wampeeŋkaati.
15 Bi tátí ki sòoǹ bi-pu yii:
«Kàkatīmaan kí wàatī-bi, bi kɔ́ tijɔkɔndi!
Kàkatīmaan! Kàkatīmaan!
Ní taa gbēēmaan-bic.»
Bi bíi sáń kaa nyí laakin bi cée.
Ama ní atimbun ŋíǹ kíǹee lì yii:
«Baa ŋūǹ kí kàl̄ timbi cee doo!»
16 Ti-Dindaan u-ba kaa ti là kí wāl̀-bi
ní ki jìn̄-bi ki yàl̄ an kɔkɔ.
Niinee baa ti dū bisaraaŋaliibi ki yíiń tiba,
kaa súń bijaŋkpilib mun saai.
*
17 Ti kpēē a-pu á dāá jòoń-ti
ti-nimbiliŋ lóoĺ.
Ti gāā isupaa ki kāl̀ ki cíitì ditimbundi
din kaa ŋūǹ kí fīī-tee ń bàà dāan̄d.
18 Ti-nannanliibi cɔ́ŋkí ki kpèé ti-tabɔbiliŋ,
taa ti ŋūǹ kí nyā ti-mɔŋkijaai pu.
Ti-kúntitam tóobiń
tiŋman, ti-wiiŋŋu sāā.
19 Bin jì-tee yáb̀ ki jítiǹ
ukaabu un ŋàaǹ yilpuee.
Bi pá ti-boon ki jì-ti ajoon pu,
ki cūtìi nɔ̄kɔǹ kuteeun ki cí-ti.
20 Un ti-Dindaan lēē ki kāaǹ
ú nīn sá ti-bɔtiuee,
un di yì ti-maŋfalee, bi cúú-u.
Úǹ pu ní ti nìn sòoǹ yii:
«Un pu ti làá ŋùŋfì
atimbun kansikinee sèé.»
*
21 Eedoom yab, nimbi bin kóò Uusi tiŋkinee,
ni ŋūǹ kí nīn fàal̀ ki ŋōō!
Ama ni mun làá nyɔ̀
ti-Dindaan ŋuul kɔŋkɔnnyɔkaau poon.
Ni làá gbí ní kí lòotī ki dɔ̄ dicancaŋgbeel.
22 Siiyɔn tiŋki, a-tafadaaldi kúntì,
baa làá ti cùnnì-si kuyuŋu.
Ama nimbi Eedoom yab,
ti-Dindaan làá dáaĺ ni-tafal ni-yìntitam pu,
ní kí nyāntí ni-kpitii kí páań mpaampiin pu.