Yeesaya 66

Bin yú nì Unimbɔti deedeeyee nì bin kaa yúee

1 Ti-Dindaan nín lī puee sèé:

«Yilpu di sá m-beejal

ní kitiŋ sá m-taaŋi tɔkɔnlaŋki^a.

Kudii kulɔkɔ ní ni làá gíti mā-mi?

Mpaan ŋulɔŋu pu ní m làá ŋmā kí ŋùŋfì?

2 Nì m-ŋalii ní m dūu náań tin kɔkɔ bí nee.

Man di yì tíǹ gbanti kɔkɔ^b,

man ni-Dindaan di lī míǹ.

Ama unil un m làá fàtīí kpèèyee

di sá ufalaadaan un sīntiǹ u-ba taapuee,

unil un di yaa gbìl̄ m-nyɔɔbundi,

dì cáá-u tifaandi u jìkèe.

3 «Unil làntī unaja kí ŋá saraa,

ama ní kí fáá kí kpɔ̀ u-nijuti.

Unil làntī upii,

ama ní kí dū kibɔkɔ kí ŋá saraa.

Unil cāabìń-mi tijimpin saraau,

ní kí cáań ugbeeti fatikuu mun kí ŋá saraa.

Unil tùutī talaalutuukaa kí ŋá-mi saraa,

ama ní ki bí ki jáaḿ awaa.

Binib gbanti lēē kí ŋá tin fáatiǹ bíǹ bi-bee,

ní an mɔ̄ǹ-bi bí nīn tūǹ

ntimbiil tuuŋŋi gbanti.

4 Ma mun lēē kí dū-bi

kí líiǹ bi-landɔkɔkpitii.

M làá cáań dinyoondi kí tɔ̄ bi-pu.

Di sá yii m yíiń ní báà ubɔ kaa kíí,

m sòon̄ ní baa ubɔ kaa pílifì.

Bi ŋá tin kaa ŋān̄ m-ceeyee,

bi lēē kí ŋá tin kaa fáatiǹ-mee.»

Tin ti-Dindaan làá ŋá kí lūŋkèe

5 Pīlifìmaan ti-Dindaan nyɔɔbundi,

nimbi bin fòol̄ u-nyɔɔbundi nì kufaaŋŋuee:

Ni-nabiyaamu biba ná-ni,

ní ki jìn̄-ni man pu.

Bi sòoǹ ki bèel̄-ni yii:

«Ti-Dindaan ń dàkà u-nyooti

ní tí ká ni nín làá nīn fàal̄ puee!»

Ama bíǹ ní icoo làá cúú gbòooo.

6 Pīlifìmaan kuwoou kun nyánní kitiŋinee,

kuwoou kun di nyánní kunimbɔtidiinee.

An sá ti-Dindaan di bíi pà

u-nannanliibi tipaal tin bi máaǹee.

7 Jeerusaleem màl̄ kibiki ki dóò

ní ki nín gbìl̄ imatiŋween pu,

u màl̄ kibininjabiki

ní kí nín gbìl̄ iween pu.

8 Ŋma pée gbìl̄ an bɔti ki ká dalba?

Ŋma di pée ká an wanti gbanti dalba?

Bi ŋūǹ kí màal̀ kitiŋ ŋwimbaantaaa?

Bi ŋūǹ kí màal̀ ditimbundi dicilpuɔɔɔ?

Ama Siiyɔn úǹ nín ŋá puee dee.

Waa láá kíĺ imatiŋween

ní ki pūtì kpáàa dūu màl̄ u-jipɔmbi!

9 Ti-Dindaan di bālifì dinyɔɔbundi nee yii:

«Man yaa pú nsan unimpu ń cáá dipool iŋmal iwee,

m làá pìin̄-u nsan ú taa màal̀aaa?

Man di yaa yàntī unimpu màal̀,

m làá gíti pìin̄ nsan kibiki ń taa nyānnáaa?»

10 Nimbi bin di néeń Jeerusaleem tiŋkee,

ni nì kì ń kpāfì kí fàal̀,

ní nīn bí dipɔɔpindin ki-pu.

Nimbi bin nìn kāl̀ dikpool ki súń ki-puee,

ni nì kì ń kpāfì kí làntì.

11 Án nín làá ŋá pu ní

ní ŋāam̀ ki-biil din tìì

dipɔɔsɔŋkilee kí díkí,

kii mbiyaamu nín ŋáaḿ

mu-na biil din cáá mbiimee

nì mmɔn puee.

12 Di sá yii ti-Dindaan di lī yii:

«M làá yàntī ŋgbansɔŋfi ń pùubìń

kii mbunee kí dāan̄ kí kɔ́ ki-ni,

kí yàntī atimbun nyooti ń fùntīń

kii ŋkpin ŋun gbée kí dāan̄ ki-ni.

M làá kpèè-ni tiŋan

kii ubinaati nín kpèé kibiki

kin u tìì dibiilee puee.

U dù-kì kí lìb̄

ní kí dū-kì kí páań u-taaŋi pu ki càab̀-kì.

13 Kii ubinaati nín ŋmēentí u-biki puee,

míǹ mbaantiim ní ma mun làá dāá ŋméeǹ-ni.

M làá ŋméeǹ-ni Jeerusaleem tiŋkin.

14 Ni yaa láa ká mimmee,

ni-pɔbil làá dāá pīil̀

ní ni-kpabiŋ ń dāá fàtīí

pɔ̀ntī kii timɔsɔnee.»

Ti-Dindaan làá dāá dàkà u-pɔŋŋu

ama ní kí dāá dàkà

u-nannanliibi u-ŋuul.

15 Ní kpèèmaan, ti-Dindaan

di kāń ŋŋmi poon ki dòońee,

u-janjatɔrɔkub náań nì

kunaakpaabuŋŋu ní.

U dòoń kí dàkà u-ŋuukpaandi,

ní kí dū aŋmilimbil

kí tāā kí bīikì binib pu.

16 Di sá yii ti-Dindaan làá dāá dū ŋŋmi nì kitàataajiki

kí sòoǹ inifunaan kɔkɔ bɔti.

Binib tikpil làá dāá kpú.

17 M sòoǹ nì bin ŋáań bi-ba circir,

ní kí nín kɔ́ circir kpaaŋŋinee,

nì bin pāantí unil ubɔ un bí

bukpaa kansikinee boonee ní.

Bi ŋmóò ugbeeti àá usiibɔ àá ntimbiil wanti.

Binib gbanti kɔkɔ làá dāá kpú dicilpu ní.

Ti-Dindaan di lī míǹ.

Dikpafikpaandi diluŋkikaal

18 Ti-Dindaan bí yii: «Man nyí bi-tuuŋŋi nì bi-landɔkɔi kɔkɔ. M dòoń kí kóoǹ atimbun kɔkɔ nì isoon kɔkɔ nib kí kpāfì. Bi làá dāan̄ kí ká m-nyooti. 19 M làá dāá ŋá kudaaŋŋu kubɔ bi-kansikin. M-bɔsooŋyi boon bin yaa láa kíǹ kaa kpíìyee, m làá dāá dū-bi kí tɔ̄ Taarsiisi nì Puul nì Luudi yab bin sá bipintɔliibee timmun. M làá dāá dū-bi kí tɔ̄ Tubaal nì Yafan timmun nì ntimu mun nnyim māntìi túee poon, laakin binib bin kaa gbìl̄ bi sòon̄ m-puee, laakin baa ká m-nyooti ki kée. Bíǹ di làá dāá yàntī atimbun gbanti ń béé m-nyooti. 20 Bi làá dāá cáań ni-nabiyaamu mun kɔkɔ bí bi-ceeyee: bi làá dāá nīn kāń itaamu nì janjatɔrɔkub pu nì tɔrɔkub bin bi bɔ̀b̄ee poon nì imamboon pu nì igutaamu pu kí dāan̄ m-Circir jool pu, Jeerusaleem tiŋkin. Án di dāa sá saraabi bin bi ŋá ki tīī-mee. M làá dāá fōō-bi kii m nín fòol̄ Isirayeel yab nín cāabìń saraabi bin m-diikun bi kā asambil ŋin bí circiree poonee ní. 21 M làá dāá lēē bi-kansikin biba ń nīn sá bisaraaŋaliibi nì Leefii yab.» Ti-Dindaan di lī míǹ.

22 Ti-Dindaan nín sòon̄ puee sɔ̀. Kutagbɔmpɔŋu nì kitimpɔŋ kin m bíi nāantée làá nīn bá m-nimbiin ki pɔ̄ɔ̄. Míǹ mbaantiim ní ni-yiŋŋi nì ni-naantiibi yaŋ làá nīn bí m-nimbiin ki cá jaanjaan.

23 Kí yòon̄ kí nīn cée,

uŋmapɔɔn jiŋaaliu kamaa

nì ŋwiŋŋuŋfikaa kamaayee,

kitiŋ pu nib kɔkɔ làá dāan̄

kí gbàan̄ man bi-Dindaan nimbiin.

24 Binib yaa láa nyēē kitiŋinee,

bi dāa ŋūǹ kí ká bin nìn jáń nì mee nikpiliŋ.

Akoosibil ŋin dāa ŋmóò-ŋee

kaa dāa kúù jaanjaan,

ní ŋŋmi ŋun dāa wù-bee

mun kaa dāa kúù^c.

Án làá dāá nīn cáá

kitiŋ kɔkɔ nib titantan ní.