Ilan 132

Siiyɔn, ti-Dindaan kɔŋkooŋŋu

132

1 Bi yaa cá Jeerusaleem kí jāam̀ Unimbɔtee ní bi gà nlan nee.

Ti-Dindaan, téetí Daafiidi,

nì u-gìŋ́ŋi kɔkɔ pu.

2 Daafiidi di nìn pūtì ki pōoǹ ti-Dindaan,

Jaakɔb Nimbɔtikpaaŋwu yii:

3 «M kpá kí kɔ́ m-diikun,

m kpá kí dòon̄ m-dooŋu pu,

4 m kpá kí yàntī ŋgeem ń cúú-mi,

m kpá kí púkuń,

5 kin tin sāā ŋyunti ŋun m làá ká mpaan kí tīī ti-Dindaan,

kí ká ŋkɔŋkoon ki tīī Jaakɔb Nimbɔtikpaaŋwuee!»

6 Ti nìn gbìl̄ Dipoondi Dakaau pu Eefiraata tiŋkin,

ti nìn ká-u Yaari satin.

7 Tí kɔ́maan ti-Dindaan kɔŋkooŋŋun,

tí gbàan̄ u-beejal taapu!

8 Yīkìm̄, ti-Dindaan, dāan̄ a-ŋuŋfil paaŋŋu pu,

sii nì Dakaa un poon ní a-pɔŋŋu bée!

9 A-saraaŋaliibi ń dū ibaamɔn kí pèen̄ kii tiwampeeŋkaalee,

bin yú nì si deedeeyee ń nīn fàal̀!

10 A-tɔntɔnliu Daafiidi puee,

taa fàtī a-boon kí tīī ubɔti un ní a lēēyee^a.

11 Ti-Dindaan nìn pōoǹ Daafiidi dipoondi nee.

Ibaamɔn pu u kpá kí nyā dipoondi gbanti boon:

«A-naantiibi kansikin ubɔ ní m làá dāá lēē

kí kàan̄ a-beejal pu.

12 A-jipɔmbi yaa ŋúb́ m-poondi

nì abɔkpaa ŋin m tīī-bee,

bi mun jipɔmbi

làá dāá kàl̄ a-beejal pu

kí nīn cá jaanjaan^b.»

13 Di sá ti-Dindaan lafun lēē Siiyɔn jool,

ki là dí nīn sá u-kɔŋkooŋŋu.

14 U nìn lī yii: «M-ŋuŋfil paaŋŋu sèé kí nīn cáa cá jaanjaan.

Doo ní m là kí nīn kóò.

15 M làá bìin̄ Siiyɔn tiŋki boon kí tīī-kì tin kɔkɔ kì nyàab̀ee,

m làá tīī bisoodambi bin kóò ki-nee tijin bí jī kí báĺ.

16 M làá dū difiil kí pèen̄ ki-saraaŋaliibi,

ní deedeedambi bin kóò ki-nee ń nīn fàal̀.

17 M làá lēē Daafiidi naantiiu ubɔ Siiyɔn tiŋkin niin

ú nīn cáá mpɔŋkpaan.

Udaan làá nīn bí kii fitila un kaa kúù jaanjaanee ní^c.

18 M làá dāá dū icoo kí pèen̄ u-nannanliibi,

ama ní úǹ beefuuliiki ń nīn jìl̀ u-yil pu.»