Ilan 57

Yilpu fɔ́ŋŋŋ Nimbɔtiu ní m yíì

(B. 8-12. kpèè 108.2-6)

1 Daafiidi nín sáǹ ki kɔ́ ntaŋkpalɔkɔn ki ŋmátì Sayuul ŋaanee ní u gāā nlan nee ki tīī bilaŋgaaliibi kpiliu^a.

2 Sɔ̄ m-saai, Unimbɔti sɔ̄ m-saai,

di sá yii sii ní m sáǹ ki kɔ́.

A-feeŋyi booŋŋu taapu ní m sáǹ ki kɔ́

kí nīn cí dinimbinaamandi nee ń jītí.

3 Yilpu fɔ́ŋŋŋ Nimbɔtiu ní m yíì,

Unimbɔti un làá ŋá tikɔkɔ kí tīī-mee.

4 U làá tīiń-mi difiil doooo yilpu,

u làá yàntī icoo ń cúú un kā m-puee.

Unimbɔti làá dàkà-mi u-neeŋkpaandi nì u-deedeeu.

5 M dɔ̄ binib bin bí kii

gbikintib bin ŋmóò binibee kansikin ní.

Bi-nyiŋŋi cɔ́m̀ kii ŋkpamu nì ipiinee ní,

ní bi-limbiliŋ jītí kii bɔlfee.

6 Unimbɔti, a sá ukpaan ki jítiǹ kutagbɔŋu,

yàntī a-nyooti ń gbí kitiŋ kɔkɔ!

7 Bi dū kulaaŋŋu ki píĺ m-saŋŋu pu,

maa ti cáá dimákal.

Bi gbìn̄ mbòó ki píĺ-mi,

ama bíǹ bi-ba di jéetì ŋu-poon.

8 M cáá dimákal, Unimbɔti,

m lafun baasii cáá dimákal ní,

m làá gāā nlan kí nyɔ̄ŋkì-si.

9 M-naŋki, fìntī,

iŋmii saalaa beeku saŋguu, fìntīmaanee,

m làá péeǹ kutaa kí fìntī.

10 Ti-Dindaan, m làá nyɔ̄ŋkì-si anibul kansikin,

m làá gāā ilan kí pàkà-si atimbun kansikin.

11 Di sá yii a-neeŋkpaandi tùutī kutagbɔŋu,

ní a-deedeeu sàatī atagban.

12 Unimbɔti, a sá ukpaan ki jítiǹ kutagbɔŋu,

yàntī a-nyooti ń gbí kitiŋ kɔkɔ!