Ilan 19

Unimbɔti nyooti nì u-marab

1 Daafiidi di ŋmàn̄ nlan nee ki tīī bilaŋgaaliibi kpiliu.

2 Yilpu sòoǹ-ti Unimbɔti nyooti pu,

ní kutagbɔŋu lèekī tin u ŋée ki dàkà-ti.

3 Ŋwiin kamaa sòoǹ Unimbɔti nyooti pu

ki nàatī ŋwiin ŋun dī-ŋuee,

ní kunyeeu kamaa mun bùsī kaa gbèentí

ki tùkù kunyeeu kun dī-kuee.

4 An kaa sá isoon poon, kaa tí sá nì anyɔɔbun mun,

ditafal mun kaa tí gbìl̀ bi-nyɔkɔ pu.

5 Ama tin bi lèe bàn̄ kitiŋ kɔkɔ,

ní tibɔti tin bi sòoǹee mun bàn̄ kitiŋgbeennyɔkɔ^a.

Unimbɔti gāā tanti yilpu ki tīī ŋwìiń ŋú nīn kóò.

6 Ŋwìiń nyēē kii unimpucaan cal

nín nyēeń u-diikun kutaafaau puee ní,

a lì kii an nín mɔ̄ǹ un sáń

kpaŋkpakantiku taatandee ú sāǹ puee.

7 Ŋu yíkí kutagbɔŋu gbeennyɔkɔ kiba

ní kí yìiǹ kí tin dòon̄ kin kíǹee,

tiba kaa ŋūǹ kí sāǹ kí nyā ŋu-tuntuŋkun.

8 Ti-Dindaan marab ŋān̄ ní,

bi tìì-ti dimaŋfapɔndi.

Ti ŋūǹ kí nīn máká tin ti-Dindaan sòon̄ ki síiǹee pu,

tíǹ di tìì ugbaan iciin.

9 Ti-Dindaan bɔkpaaŋi tèen̄ ní,

ŋi tìì unil pɔbil mmɔn.

Ti-Dindaan marab wāĺ ní bɔ́iii,

bi tìì unil dinimbiŋubitil ní.

10 An ŋān̄ binib ń nīn jáaḿ ti-Dindaan,

bi làá nīn jáaḿ-u ní kí nīn cá jaanjaan.

Ti-Dindaan marab sá ibaamɔn ní,

marab gbanti kɔkɔ sá deedee marab ní.

11 Ti-Dindaan marab cáá kunyampoou ki jítiǹ sindaariya,

ki jítiǹ gba sindaariyamɔnti tikpil,

ki mɔ̄ ki jítiǹ tisiil,

ki mɔ̄ ki jítiǹ gba kisikampiŋ siiti

tin bi dáá ŋmáaḿee.

12 Kí kūtèe, bíǹ di dàkà man a-tɔntɔnliu.

M yaa ŋúb́-bee, m fòol̄ tiwammɔntiil ní.

13 Ŋma di ŋūǹ kí béé yii u yīntì?

M-Dindaan, dū m-kpitii in pu maa nyée kí pɔ̄-mi.

14 Kàkatī ikpiti in m nyí ki ŋée kí wàatī-mi,

taa yàntī í jī m-pu dibeel.

Niinee maa làá yìntīǹ-si kí fōō dibɔkpil.

15 Yàntī m-nyɔɔbuŋŋi nì m-landɔkɔi ń nīn fáatiǹ-si.

M-Dindaan, sii di sá m-taŋkpanaakooku nì m-fiiliu.