Ilan 7

Ti-Dindaan, sòoǹ kí pɔ̀-mi

1 Daafiidi di gāā kunimbaau laŋŋu nee. Kuusi un sá Beenjameen naakookunee pu ní u nìn gāā-ŋu ki tīī ti-Dindaan.

2 Ti-Dindaan m-Nimbɔtiu, sii ní m sáǹ ki kɔ́,

jòoń-mi kí fīī-mi kí nyāntí bin jì-mee ŋaan.

3 An yaa kaa sá mimmee,

kii gbikinti nín cútí kuwaŋkuluu puee,

míǹ ní bi làá cúú-mi kí cáá búntí

kí tɔ̀ntī laakin ubɔ kaa ti ŋūǹ kí fīī-mee.

4 Ti-Dindaan m-Nimbɔtiu, m yaa ŋá tin kaa ŋān̄ee,

m yaa ŋá ubɔ ikpiti,

5 m yaa nyáń m-bɔɔ boon,

àá m yaa fúkúl̀ un di ná-mi an kaa cáá taapuee,

6 á yàntī m-nannanliu ń jà kí cúú-mi,

kí tāā-mi kí kpɔ̀,

ní kí tāā-mi kí ŋmàliŋkì ntamin.

7 Ti-Dindaan, yīkì nì a-ŋuul poon!

M-nannanliibi díkíi gbí, yīkìi já nì bi,

sii un là bí sòoǹ tibɔti nì ibaamɔnee, tūtuǹ-mi.

8 Kóoǹ binib kɔkɔ kí kpāfì bí màntīí tū-si,

kàl̄ a-beejal pu yilpu kí jī bi-pu dibeel.

9 Ti-Dindaan, sii di sòoǹ dinibul kamaa bɔti,

sòoǹ m-bɔti kí pɔ̀-mi,

kun puee m sí deedee ní kaa ŋá tikpitil tiba mun.

10 Sii un di sá deedee Nimbɔtiuee,

sii un di nyí unil landɔkɔŋu nì kun kā u-pɔbilinee,

kúntí bikpitiŋaliibi tuŋkpitiŋ

kí yàntī án bútí deedeedaan^a.

11 Unimbɔti di sá m-gbampɔɔl,

úǹ di fìil̄ bin pɔbil bí diba nì uee.

12 Unimbɔti sá un sòoǹ binib bɔti nì ibaamɔnee,

ní ki ŋūǹ kí dàkà u-ŋuul baabadal.

13 Binikpitib yaa kaa kpántì bi-bee,

Unimbɔti làá lòon̄ u-tàataajiki,

ní kí píĺ u-tɔbu kí cīití-bi.

14 U bɔ́ntì u-janjawanti tin kùee,

ní ki dū u-piiŋyi in fòol̄ ŋŋmi lìblibee ki páaǹ.

15 Unikpiti nāantí isan in pu u làá dī kí ŋá ikpitee,

ní kí cáá u nín làá ŋá pu kí ŋá digaŋgamee pool,

ní kí dāá màal̀ inyimɔn.

16 U gbìn̄ mbòó ki bàà píĺ kí sàl̄ bin kíǹee

ní an dūu sàl̄ úǹ u-ba.

17 Úǹ u-ba tuŋkpitiŋ fātìi gítì u-pu,

tipɔmbɔti tin u bàà bɔ́ntì ki cíitì bibee fātìi lítì u-pu.

18 M làá jāam̀ ti-Dindaan kun puee u sá deedeedaan,

m làá gāā ilan kí nyɔ̄ŋkì ti-Dindaan, Yilpu Fɔ́ŋŋŋ Nimbɔtiu.