Ilan 4

Unimbɔti, pīlifì m-wimmeem

1 Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu.

2 M yaa kúuǹ ki yíiń-see, á fōō m-wimmeem,

Unimbɔti, sii di sòoǹ ki pɔ̀-mi!

Ŋyunti ŋun dinimbinaamandi jéetì m-puee, sii di nyántì-mi.

Sɔ̄ m-saai kí fōō m-wimmeem.

3 Oo, nimbi binib nee,

ni làá nīn sòoǹ ki bíiĺ-mi yéè

kí tin cáá sāā ŋyunti ŋulɔŋu ní?

Nimbi bin néeń ki kɔ́kɔĺ-mi fám

ki sòoǹ tinyimɔmbɔtee?

4 Ama ní béémaan yii ti-Dindaan lēē

bin bí deedeeyee bí nīn sá u-yab.

M yaa kúuǹ ki yíiń ti-Dindaanee, u pílifíǹ-mi.

5 Ni yaa gíí diŋuulee, ní taa ŋá ikpiti^a.

Ni yaa dɔ̄ ni-dooŋu pu kunyeeuee,

ní dàkafì kí ŋmīĺ díkí diki.

6 Ní ŋá saraabi min an máaǹee,

ní kí nīn máká ti-Dindaan pu.

7 Binib bí ki bàlifī bi-ba yii:

«Ŋma di ŋūǹ kí yàntī tí ká nnaam dee?

Ti-Dindaan, dàkà-ti a-laŋŋaŋfitiiku.»

8 A gbéeǹ m-pɔbil mmɔn,

mmɔn gbanti jítiǹ bi nín yaa cáń bi-kpaajinti

ki nyùn̄ bi-dafii bi bí mmɔn ŋun poonee.

9 Ŋgbansɔŋfi poon ní m dòontí ní kí pùtīí kpáàa gèeǹ,

di sá yii sii m-Dindaan baba pu ní maa fàŋkí tiba.