Ilan 2

Ubɔti un Unimbɔti lēēyee pɔŋŋu

1 Ba ŋá ní atimbun kpilib bíi bɔ́ntí

kí já nì Unimbɔti nì ubɔti un u lēēyee míǹ^a?

Bi nín bíi bɔ́ntí puee sá fám ní.

2 Kitiŋ pu bɔtiibi bíi bōob̀ dikɔ̀ndi,

biyidambi bíi sòoǹ kí kpāfì kinyɔkɔ

kí já nì Unimbɔti nì ubɔti un u lēēyee.

3 Bi bí ki lì yii:

«Yàntīmaan tí tìfī ikusaka in bi dūu bóob́-tee,

kí lēē bi-baaŋi kí fá!»

4 Ama ti-Dindaan un kā yilpu u-beejal puee bí ki lāā-bi,

ti-Dindaan bí ki bèel̄-bi.

5 Niinee ní u sòon̄ nì bi u-ŋuul poon,

ní ki fōō bi-pu mbum ní bi-wunti bíi jìkì.

6 Unimbɔti lī yii: «Siiyɔn m-circir jool pu

ní m kāaǹ ubɔti un m lēēyee.»

7 M làá lì tin ti-Dindaan sòon̄ee,

u tùkū-mi yii:

«Sii ubɔti, a sá m-jipɔɔn ní.

Díǹ nee man di màl̄-si^b.

8 A yaa bālifì-mi,

m làá dū atimbun ŋin kɔkɔ bí kitiŋ puee

kí tīī-si á nīn kíǹ ki yì,

ní kitiŋ kɔkɔwoooo ń kpántí a-yaka.

9 Mpɔn ŋun a làá nīn cáa kpòotī-bee dāa pɔ̄ɔ̄ kii tikútee ní,

ní á dāá nà-bi dúsi dusi kii diboolee^c.»

10 Kɔŋkɔnnee bibɔtiibi, nín̄ sámaan binib bin cáá iciinee!

Kitiŋ pu kpootiliibi, ní yàntīmaan bí sāŋkì-ni.

11 Ní jāam̀maan ti-Dindaan nì kufaaŋŋu poon,

nín̄ fàal̀maan nì dijinjikil.

12 Ní gbàam̄maan u-nimbiin,

an yaa kaa sá míǹ u làá gíí diŋuul,

ní kí nàan̄-ni dicilpu niin!

Ama bin kɔkɔ sáǹ ki kɔ́-uee bí mmɔnneeee!