Eesiteer 8

1 Ŋwiin gbanti dal ní ubɔti Asuweerusi dū Juuda yab nannanliu Amaani gaajawanti kɔkɔ ki tīī unimpubɔti Eesiteer. Míǹ boonee ní Eesiteer cáá Maardoosee ki dàkā ubɔti ki tùkū-u yii úǹ di sá u-baa. 2 Ní ubɔti fúutì u-bɔmbiki kin cáá u-daaŋku u nìn fōō Amaani ceeyee ki dūu tīī Maardoosee. Ní unimpubɔti Eesiteer dū Maardoosee ki kāaǹ tigaajawan tin kɔkɔ Amaani nìn cááyee pu.

Ubɔti nyántì mara kí mɔ̄tì Juuda yab pu

3 Ní Eesiteer lítì ubɔti nimbiin nì nnyinnyim ki fātìi sòon̄ nì u ki gbāam̀-u yii ú kpìtī mbusu un Amaani un sá Agaagi naakookunee nìn nyàab̄ kí kɔ́ǹ-bee, nì u nín lēē nsàmbiyaamu mun kí céetí Juuda yabee. 4 Ní ubɔti tāntì u-kpandɔŋu ŋun sá sindaariyee ki túĺ Eesiteer. Niinee ní Eesiteer yíkì kitiŋ ki yúl̀ ubɔti nimbiin 5 ní ki bí-u yii: «Ti-baa ubɔti, m yaa ká diyimɔɔl a-cee, ní an yaa ŋān̄ a-cee m-bɔti fáatì-see, á ŋmà kí kpìtī mara un Ameedata jipɔɔn Amaani un sá Agaagi naakookunee ŋmàn̄ yii bí kpɔ̀ kí céetí Juuda yab bin kɔkɔ kóò a-tinjaŋŋi kɔkɔnee. 6 Mana ní m ŋūǹ kí nīn kā ki kpèé inimɔɔn in bíi jīǹ m-nibulee? Mana ní m ŋūǹ kí nīn kā ki wāĺ bi bíi kù ki céetí m-nabiyaamu?»

7 Ní ubɔti kíí unimpubɔti nì Maardoosee, ujuudaja yii: «Kpèè, m dū Amaani gaajati kɔkɔ ki tīī Eesiteer ní ki yāntì bi lúntì-u ndɔ pu, kun puee u bàà là bí kpɔ̀ Juuda yab. 8 Di sá kugbɔŋu kun bi ŋmàn̄ ubɔti yindi pu, ki dū ubɔti jaliiki ki nyīīyee, nsan kpá ubɔ ń kpìtī tibɔti tin bi ŋmàn̄ee. Míǹ puee, ni mun ŋmàmaan min làá tūtuǹ Juuda yab bí mɔ̄tì bi-ba puee ubɔti yindi pu, kí dū ubɔti jaliiki kí nyīī.» 9 Dicilpu niin ní bi yíiń ubɔti gbaŋŋmaliibi. Uŋmatataati un bi yíì yii Sifanee iwiin mmuŋku nì ita dal ní bi nìn yíiń-bi. Ní Maardoosee tùkū-bi bi nín làá ŋmà tibɔti tiŋyee. Bi nìn ŋmàn̄ tigbɔn ki tīī Juuda yab nì abɔtibil nì gɔminab nì bikàliŋkpilib bin bí ubɔti tinjaŋŋi dilaataal nì mmuŋku nì aluli poonee, kí yòon̄ Indiya tiŋki kí tin cáá sāā Kusa tiŋki. Bi nìn ŋmàn̄ ki tīī kitiŋ kamaa nì ki-ŋmaŋmabiti nì ki-sooŋyi poon ní ki ŋmàn̄ ki tīī Juuda yab mun nì bi-ŋmaŋmabiti nì bi-sooŋyi poon. 10 Bi ŋmàn̄ tigbɔnee ubɔti Asuweerusi yindi pu, ní ki dū u-bɔmbiki kin cáá u-daaŋkuee ki nyīī ní ki dūu tīī bitanjakaliibi, bí yòon̄ ubɔti taamui in sá itammɔntee kí cáá tigbɔnee kí yàkatī. 11 Tin bi ŋmàn̄ tigbɔn gbanti poonee sèé: «Ubɔti pú kinyɔkɔ yii Juuda yab bin bí u-tinjaŋŋi kɔkɔnee ń kpāfì kitiŋ kin poon bi bée kí mɔ̄tì bi-ba pu. Bí kpɔ̀ kí céetí dinibul din kamaa làá bóob́ dikɔ̀ndi kí jáǹ-bee, kí kpɔ̀ kí kpáaǹ bi-nimpoobi nì bi-biyaamu, kí kóoǹ bi-gaajawanti kɔkɔ.» 12 Mara gbantee sá ŋwimbaanti ní an tɔ̄ ditundi ubɔti Asuweerusi tinjaŋŋi kɔkɔn. An dāa sá uŋmal saalaa nì uliliiti poon, Adaar ŋmaliu iwiin saalaa nì ita dal. 13 Tin bi ŋmàn̄ kugbɔŋuee poonee kpántì mara ní bi dūu tīī atinjan kɔkɔ nibuliŋ, án nín làá ŋá pu ní Juuda yab ń bɔ́ntí ŋwiin gbanti yaa láa bāańee, bí tɔ̀ bi-nannanliibi ipɔntoonee. 14 Ubɔti nín pú kinyɔkɔ yii bí cáá tigbɔnee kí yàkatēe ní bitanjakaliibi yōoǹ ubɔti taamui in sá itammɔntee ki búntì malaa malaa ki cáa yākatì. Ní maree gbītì Suusi ditiŋyil kɔkɔn.

15 Niinee Maardoosee nyánní ubɔti dumpu ki pēē dibeebɔkutil din ŋmàl̄ mmam gàaa nì mpimee, ki dū iŋaaman in bí fálfalee bɔkutifɔkɔl ki páaǹ ní ki cíkí sindaariya beefuuliiki kikpaaŋŋi. Suusi yab nìn kūuntí nì dipɔɔpindi ki fàal̀. 16 An nìn sá dipɔɔpindi nì ifaal nì dinyandi ní Juuda yab cee. 17 Atinjan nì ntimu mun kɔkɔ poon ní ubɔti marauee nìn bàn̄ee, an nìn sá dipɔɔpindi nì ifaal nì jiŋaal ní Juuda yab cee. Ní dinyoondi kɔ́ anibul ŋin kɔ kíǹee, ní an yāntì binib tikpil kpántì Juuda yab.