Dinyeel 26

Isaaki nì Abimeeleeki bɔti

1 Abraam yuntiŋu ŋkùm nín nìn nyáń puee, boonee ŋkùm miba nìn gíti nyáń kitiŋ pu. Isaaki nìn cūtì Geeraar tiŋkin ki ká Fiiliistii yab bɔtiu Abimeeleeki. 2 Ní ti-Dindaan nyántì u-ba ki dàkā Isaaki ní ki bí-u yii: «Á taa cù Eejipiti. Nín̄ kā kitiŋ kin m làá dàkà-see poon. 3 Á gbíntí kitiŋee poon, m làá nīn bí a-cee ki làá bìin̄ a-boon, kun puee sii nì a-naantiibi ní m làá dū kitiŋ gbanti kɔkɔ kí tīī. M làá ŋá míǹ kí dàkà yii m nín nìn pōoǹ min ki tīī a-baa Abraamee, maa làá kpántí. 4 M làá yàntī a-naantiibi ń bùtī kii iŋmalbijaa in bí kutaa puee ní kí dū kitiŋ nee kɔkɔ kí tīī-bi. Sii maaliŋu pu ní m làá dī kí bìin̄ duulinya nib kɔkɔ boon, 5 kun puee Abraam pílifì m-nyɔkɔ ki nóó m nín lī puee, nì tin m kpáafì-uee ní ki ŋúb́ m-marab nì m-koobiliŋ.»

6 An pu ní Isaaki gbíntì ki kāl̀ Geeraar tiŋkin. 7 Ní niin yab bālifì-u un ní Reebeeka sée. Ní u kíí-bi yii: «U sá m-niisal ní.» Waa nìn là kí lì yii Reebeeka sá u-nimpuu, kun puee u nìn fàŋkí bí taa kpɔ̀-u u-nimpuu Reebeeka pu, di sá yii u nìn ŋān̄ unimpu tikpil.

8 Isaaki kāl̀ niin an yúntì. Dalbee Fiiliistii yab bɔtiu Abimeeleeki gbóoń tɔkɔla ki kpēēyee, Isaaki di bí ki gbíilíǹ u-nimpuu Reebeekee. 9 Ní u yíiń Isaaki ní ki bí-u yii: «Báà an ŋá pu a-nimpuu dee. Ba pu ní a tùkū-ti yii u sá a-niisal ní?» Ní Isaaki kíí-u yii: «Kun pu m lī mimmee di sá m fāŋkì yii bí taa kpɔ̀-mi u-pu ní.» 10 Ní Abimeeleeki bí-u yii: «Ba pu ní a ŋá-ti míǹ? An kíǹ fiii m-nib kansikin ubɔ ń bàà dòon̄ nì a-nimpuu, ní á bàà yàntī tí kɔ́ tibɔtin.»

11 Niinee ní Abimeeleeki kpáafì u-samaau kɔkɔ ki lī yii: «Un yaa pée gbēē Isaaki nì u-nimpuuee, see bí kpɔ̀ udaan.»

12 Dibindi gbantee Isaaki nìn kùn̄ tijin kitiŋ gbantin ní ki dāa cáń míǹ dilaataal pu, kun puee Unimbɔti nìn bīiǹ u-boon. 13 U nìn kpántì ŋŋmam daan ní u-gaajati mɔ̀tīi kútí ki cá ní u dāa dūu ŋá ugaajakpaan. 14 U nìn cáá tipicaŋkpun nì tiŋɔcaŋkpun nì tinacaŋkpun nì bitɔntɔnliibi kupaau.

Isaaki nì Abimeeleeki pōoǹ tɔb ipoon

An nìn yāntì Fiiliistii yab kíǹ ki ná-u. 15 Ní Fiiliistii yab dū ntam ki gbíŋkì lɔkɔb bin kɔkɔ u-baa Abraam nìn yāntì u-tɔntɔnliibi gbìn̄ ŋyunti ŋun u dáá bée. 16 Ní Abimeeleeki bí Isaaki yii: «A ká mpɔn tikpil ki jítiǹ-ti, míǹ puee yīkì ti-cee.»

17 Ní Isaaki yíkì niin ki cūtìi kíǹ ki kóò Geeraar tantakalin. 18 Ní Isaaki yāntì u-tɔntɔnliibi fātìi kɔ́tì lɔkɔb bin u-baa Abraam nìn dáá bí ki gbìn̄ kin u-kúm boon Fiiliistii yab gbíŋkèe. Ní u fātìi pú lɔkɔb gbanti ayin ŋin u-baa nìn pée yíì-bee.

19 Isaaki tɔntɔnliibi bíi gbì lɔkɔ ditantakalee poonee ní ki tin nyáń nnyimmɔntiim pu. 20 Ní Geeraar yab pikpaaliibi táká Isaaki pikpaaliibi ki lī yii: «Timbi di yì lɔkɔ nee nyim», an pu ní Isaaki pú lɔkɔ gbanti diyindi yii Eeseeki, taapu di sá yii <Bi kpákáǹ-mi.> 21 Ní u-tɔntɔnliibi gíti gbìn̄ lɔkɔ ubɔ ní bi tí dɔ́miń ki táká-bi, ní Isaaki pú lɔkɔ gbanti mun diyindi yii Siitina, taapu di sá yii <Bi jáń nì mi.> 22 Ní bi yíkì niin ki gíti tí cūtìi gbìn̄ laaba, ní baa ti táká-bi. Ní u pú lɔkɔ gbanti úǹ diyindi yii Reewoobooti, ki lī yii: «Ti-Dindaan yāntì ti tɔ́ ti-ba ní an bútì-ti kitiŋ nee poon.»

23 Boonee ní u yíkì niin ki búntì Beerseeba. 24 Kunyeeu gbantee ní ti-Dindaan nyántì u-ba ki dàkā-u ní ki bí-u yii: «Man di sá a-baa Abraam Nimbɔtiu. Á taa fàŋkì, m bí a-cee. M làá bìin̄ a-boon kí bùtī a-maaliŋu m-tɔntɔnliu Abraam pu.» 25 Ní Isaaki máń nsaraafan niin ki jáam̀ ti-Dindaan. Niin mun ní u gāā u-tantiu ní u-tɔntɔnliibi gbìn̄ lɔkɔ.

26 Isaaki bí Beerseeba niinee ní ubɔti Abimeeleeki nì u-bɔɔ Awusati nì u-janjakpiliu Piikool nyáń doooo Geeraar ki cūtì u-cee. 27 Ní Isaaki bí-bi yii: «Naa là m-bɔti ní ki jìn̄-mi ni-tiŋkin, ni gíti nyàab̀ ba m-cee doo?» 28 Ní bi kíí-u yii: «Ti dáań ki ká yii ti-Dindaan bí a-cee. An pu ní ti ká nlandɔkɔ yii an máaǹ ti nì si ń kpāfì kí pùtī kí pòon̄ tɔb, mpèé ń nīn bí ti-kansikin. 29 Á pùtī yii aa làá dāá ŋá-ti tikpitil tiba kii ti mun nín kaa nìn ŋá-si tikpitil tiba puee. Ti nìn ŋá-si tiŋan ní ki yāntì a yíkì ti-cee nì ŋgbansɔŋfi. Kɔŋkɔnnee ti béè yii sii di sá un boon ti-Dindaan bīiǹee.» 30 Niinee ní Isaaki bɔ́ntì jiŋaal ki fōō-bi kucaŋu, ní bi jíń ki nyùn̄. 31 Ku wúntì kutaafaauee ní bi pūtì ki pōoǹ tɔb. Míǹ boonee ní Isaaki nyántì-bi nsanni, ní bi nín kùǹ nì dipɔɔsɔŋkil.

32 Ŋwiin gbanti ní Isaaki tɔntɔnliibi cáań-u lɔkɔ un bi bíi gbèe bɔti ki lī yii: «Ti gbìn̄ ki cíl̀ nnyim pu.» 33 Ní u pú lɔkɔ gbanti diyindi yii Siiba. An pu ní bi gbíntìi yíì kitiŋ gbanti díǹ pu nee yii Beerseeba, taapu di sá yii <dipùtil lɔkɔu.>

Eesayuu nimpucáatam

34 Eesayuu bàn̄ abin imuŋku ilee ní ki cáá Eeti yab sapɔmbi bili, upeepeekaa di sá Beerii bisal Judiiti, ní uliliiti sá Eelɔn bisal Basmaati. 35 Binimpoobi gbanti nìn yāntì Isaaki nì u-nimpuu Reebeeka nyɔmmu túŋkì.