Dinyeel 23

Abraam dá kitiŋ ki síb́ u-nimpuu Saara

1 Saara ŋá abin dilaataal nì mmuŋku nì abin aluli ní ki nín kpíì. 2 U kpíì Kiiriyati-Ariba, an dàkà yii Eebrɔn, Kanaan yab tiŋkin. Ní Abraam dɔ́miń ki yáliŋkì ki súń u-nimpuu Saara kpool. 3 Abraam súń ki dóòyee ní ki yíkì u-nimpuu utaŋkpiil cee ki cūtì ki ká Eeti yab ki bí-bi yii: 4 «M sá unicaan ní ki kóò ni-kansikin doo. Ní pɔ̄maan-mi kuceeu ḿ síb́ m-nimpuu^a.» 5 Ní Eeti yab kíí-u yii: 6 «Pīlifiǹ-ti, ukpil! A sá Unimbɔti niliu ubɔ ní ki kóò ti-kansikin. Lēē ti-taŋkpiifalii poon ŋun pée ŋān̄ a-ceeyee kí síb́ a-nimpuu. Báà ubɔ ti-kansikin kaa làá yíí yii á taa síb́ a-niliu u-taŋkpiifaliŋu poon.»

7 Ní Abraam yíkì ki gbāaǹ Eeti tiŋki yab nimbiin, 8 ní ki bí-bi yii: «Ni yaa lafun kíí tiŋman yii ḿ síb́ m-nimpuuee, ní gbàam̀ Soowaar jipɔɔn Eefrɔn, 9 ú tīī-mi u-taŋkpalɔkɔŋu^b ŋun bí Makipeelee. U-taŋkpalɔkɔŋu gbanti bí u-kpaabukuŋu. Ú dū-ŋu kí nyāfiǹ-mi ni-kɔkɔ nimbiin án kpántí mpaan ŋun m làá nīn síb̀ m-nib ni-kansikinee. M làá pà-u ŋu-nyampooku nín sá puee deedee.» 10 Eefrɔn gbanti nìn kā u-nabiyaamu Eeti yab kansikin, ní ki nìn kíí Abraam, Eeti yab bin kɔkɔ nìn dɔ́miń ki kā bi-tiŋki punyɔkɔpuee nimbiin yii: 11 «Aayee, ukpil! Pīlifiǹ-mi, maa làá nyāfiǹ-si kusaau nì ntaŋkpalɔkɔ ŋun bí ku-poonee. M làá dūú pɔ̄-si ní m-nabiyaamu kɔkɔ nimbiin, á cù kí síb́ a-nimpuu.»

12 Ní Abraam fātìi tí gbāaǹ binib gbanti nimbiin 13 ní ki bí Eefrɔn, samaa kɔkɔ nimbiin yii: «M gbāam̀-si, gbìl̄ kí tīiǹ-mi. Yàntī ḿ dā kusaau gbanti kí pà-si ku-daaku nín sá puee, á fōō ḿ ŋmā kí síb́ m-nimpuu niin.» 14 Ní Eefrɔn kíí Abraam yii: 15 «Ukpil, kusaau gbanti nimbiŋmiiku jitɔmbi alaataa anaa kaa ŋūǹ kí nīn sá tiba man nì si kansikin, cáá a-nimpuu kí síb́.»

16 Niinee ní Abraam gbìl̄ ki tīī nì Eefrɔn ní ki ŋmāntì kusaauee daaku nimbiliŋ jitɔmbi alaataa anaa, kii bi nín nìn pée kpántí puee ki tīī-u, ki nóó nì u nín nìn lī pu Eeti yab kɔkɔ nimbiinee. 17 An nín dī pu ní Eefrɔn saaku kun bí Makipeela, Mamiree nyɔkɔpuee nì ntaŋkpalɔkɔ ŋun nìn bí kusaau gbanti poonee nì isufi in kɔkɔ nìn yú ku-poonee 18 dūu kpántì Abraam wantee dee. Eeti yab nì bin kɔkɔ nìn kpáfì kitiŋ gbanti punyɔkɔpuee nimbiin ní tíǹ gbanti kɔkɔ nìn jítì.

19 Míǹ boonee ní Abraam cáá u-nimpuu Saara ki síb́ ntaŋkpalɔkɔ gbanti poon, Makipeela saakun Mamiree caŋin, an dàkà yii Eebrɔn, Kanaan yab tiŋkin. 20 Ki yōoǹ yaadal wiiŋŋu ní Eeti yab dū kusaauee nì ntaŋkpalɔkɔ ŋun bí ku-poonee ki nyáfiǹ Abraam ní an kpántì u-wanti, u dūu ŋá kuceeu ki síb̀ u-yab.