Tukang ngejalaꞌ payit mangun tukang ngejalaꞌ minisiaꞌ
5
1 Sino togol iri, Yesus ngkiriyod daꞌ ribon danau Genesareta. Daꞌ dino po, sino ulun suang makou nindong ngurumbun So, kiꞌ kidingog atun No wat dagu Allah. 2 Ilong kon Yesus sino dungaiꞌ padau daꞌ ribon danau ino. Tukang ngejalaꞌ payit jatu pongo tumun intad padau maguꞌ jalaꞌ niro. 3 Oyo mudan mai padau Simon injul mancuk Simon nyikog padau atu mai alud kitiꞌ intad ribon. Daꞌ padau itu Oyo ntudung injul ngatun siro. b 4 Pongo gino Oyo maraꞌ daꞌ Simon, “Kenabir mu padau mu no mai janaꞌ an taguꞌ, daꞌ dino kou ngambung jalaꞌ mu no ginoi kou kalap payit.” 5 Sambung kon Simon, “Guruꞌ, pongo kububuat rondom itu ri akai guyum payit, lop kai kalap manaꞌ-manaꞌ,c tapiꞌ karnaꞌ Okou mancuk, makaꞌ aku mayaꞌ dagu Mu.” 6 Pongo gino, oyo mal so, iro pon kalap payit suang, singgaꞌ jalaꞌ niro kitiꞌ urek. d 7 Giri iro nimau dangan niro daꞌ padau bokon intok ngedangan siro. Dangan-dangan niro pon matong, giri iro mbayaꞌ-mbayaꞌ ngudan dungaiꞌ padau niro tu daꞌ payit matong pipis, kitiꞌ koy padau niro tu liminjong. 8 Togol Simon gilong angeno, oyo sujud daꞌ tungkuangan Yesus, dagu kono, “Tuhan, niduꞌ Mu koy aku, sobob aku tu ulun budusaꞌ.” 9 Simon maraꞌ sinino, sobob oyo dangan ulun an mbayaꞌ so tuwiꞌ karnaꞌ iro kalap payit suang. 10 Sinino po dangan no dungaiꞌ kiring itu, Yakobus dangan Yohanes anak Zebedeus mayaꞌ tuwiꞌ. Dagu kon Yesus daꞌ Simon, “Maꞌ alaꞌ! Intad igitutu okou mangun tukang ngejalaꞌ minisiaꞌe.” 11 Pongo gino Simon dangan ulun-ulun tukang ngejalaꞌ payit jatu ngalalat padau niro mai dumud, giri iro ngiduꞌ sariꞌ usaꞌ niro, giri mayaꞌ Yesus.Yesus piga ulun an nakan pukung
12 Sino togol iri Yesus matong daꞌ kutaꞌ. Daꞌ dino sino ulun laki an nakan pukung. Ulun ino gilong daꞌ Yesus, oyo sujud daꞌ tungkuangan No, oyo kitak tulung daꞌ Yesus, “Guruꞌ, gaꞌ Okou guang, piniga Mu aku.” 13 Giri Yesus petampak longon No, daꞌ ulun ino, dagu kon Yesus, “Mou, Aku guang piga diyun, iga nokou!” Togol ino ri po ulun ino iga. 14 Yesus nyungkang ulun an piniga No, supayaꞌ yo lop ntukit so daꞌ ulun bokon. Dagu kon Yesus, “Makou nokou, pinilong mu kiring mu mai imam, intok no pandai gaꞌ okou tu pongo iga, dangan nibit mu persembahan mu mai imam, nggirad an pinirintaꞌ Musa, mangun tetanduꞌ daꞌ ulun suang.”f 15 Tapiꞌ ago wat Yesus ingog daꞌ sariꞌ runuang, singgaꞌ ulun suang matong mai Yesus intok kidingog atun No, dangan iro kitak daꞌ So supayaꞌ iro piniga intad kagui-kagui niro. 16 Giri Yesus makou mai janaꞌ-janaꞌ an londong dan sembayang.
Yesus piga ulun kagui matoi kiring
17 Sino togol iri Yesus katung ngatun daꞌ ulun suang, daꞌ dino sino po tutukuraꞌ ulun Farisi dangan guruꞌ-guruꞌ agama Yahudi ntudung kidingog daꞌ atun No, iro matong intad bemasom-masom kampung, sino an intad runuang Galilea, intad runuang Yudea, dangan kutaꞌ Yerusalem. Kuasaꞌ Tuhan ngembayaꞌ daꞌ Yesus, an mal So kalap piga daꞌ ulun an ngkagui. 18 Giri sino tutukuraꞌ ulun nyangkat ulun an kagui matoi kiring an punuluid daꞌ lunggungan. Iro burusahaꞌ ngibit so mumpos daꞌ dalom baloi dangan iro kiꞌ mului so daꞌ tungkuangan Yesus. 19 Tapiꞌ karnaꞌ iro lop kalap ngibit ulun ino mumpos, karnaꞌ ulun kiliwot suang. Bangun no, iro ngibit ulun matoi kiring ino mai timbou tap baloi, giri iro mungkar tap baloi ino, iro ngulug ulun matoi kiring ino dangan turugan no mai unod-unod ulun suang jatu, pas daꞌ tungkuangan Yesus. 20 Togol Yesus gilong iro tu sayaꞌ laung daꞌ So, dagu kon Yesus daꞌ ulun kagui ino, “U dangan gariꞌ, dusaꞌ mu pongo nampun.” 21 Gilong angeno, ulun-ulun Farisi dangan guruꞌ-guruꞌ agama Yahudi saling mendagu daꞌ antaraꞌ niro, “Si Ulun itu, berani pejajaꞌ daꞌ Allah? Allah koy kaꞌ an kalap ngampun dusaꞌ minisiaꞌ.” 22 Tapiꞌ Yesus pandai dalom kadaꞌ niro tu, giri dagu kon Yesus, “Kon an pinikir muyun dalom kadaꞌ muyun no? 23 Kon an ruwoi tinirimo muyun, Aku maraꞌ, ‘Dusaꞌ mu pongo nampun,’ atau Aku maraꞌ, ‘Mengkakat nokou, ginoi kou makou’? 24 Tapiꞌ Aku pilong daꞌ dimuyun, daꞌ diniaꞌ itu Anak Minisiaꞌ bukuasaꞌ ngampun dusaꞌ.” Pongo gino Oyo maraꞌ daꞌ ulun an matoi kiring ino, “Mengkakat nokou, senangkat mu ampin mu no, makou nokou muliꞌ mai intok mu.” 25 Giri ulun matoi kiring ino langsung mengkakat daꞌ tungkuangan niro, nyangkat ampin atu, giri muliꞌ injul ngumpod Allah. 26 Sariꞌ ulun-ulun an gilong angeno, iro akaiꞌ kumpod, dangan ngumpod Allah. Dangan kadaꞌ alaꞌ, dagu kon niro, “Kon an nilong takau odou itur gang, monong-monong tuwiꞌ laung takau gilong so.”
Lewi tukang tagi pajak mayaꞌ Yesus
27 Pongo gino, togol Yesus mujai, Oyo kilong tukang tagi pajak karan no Lewi an katung ntudung daꞌ intok no ngusaꞌ. Dagu kon Yesus daꞌ so, “Mayaꞌ kou Dakon.” 28 Giri Lewi ngkiriyod ngapung sariꞌ usaꞌ no, giri mayaꞌ Yesus. 29 Lewi mal acaraꞌ ngakan-ngakan namu Yesus tetanduꞌ no manod daꞌ So. Tukang-tukang tagi pajak dangan ulun bokon daꞌ dino mayaꞌ ngakan daꞌ siro. 30 Dagu kon ulun Farisi dan guruꞌ-guruꞌ agama Yahudi, dangan kadaꞌ lop nirimo daꞌ murit-murit Yesus tu, “Pat no, maꞌ kau ngakan nginum mbayaꞌ ulun tukang-tukang tagi pajak dangan ulun an budusaꞌ ino.”g 31 Dagu kon Yesus daꞌ siro, “Lop yo ulun an iga an perlu doktor, tapiꞌ ulun an ngkagui an perlu doktor, 32 Aku matong lop yo intok nimau ulun an nganggop buyag no bonor, tapiꞌ nimau ulun-ulun an budusaꞌ intok niro butubat intad dusaꞌ-dusaꞌ niro.”
Wat puasaꞌ
33 Sino ulun-ulun maraꞌ daꞌ Yesus, “Murit-murit Yohanes sarok puasaꞌ dangan sembayang, sinino po dangan murit-murit ulun Farisi, tapiꞌ murit-murit Mu ngakan dangan nginum.” 34 Sambung kon Yesus daꞌ dagu niro tu, “Pongo kiꞌ akau kilong dangan-dangan pengantin laki-laki benancuk puasaꞌ, sodongkon pengantin laki-laki masi sino mbayaꞌ daꞌ siro? 35 Tapiꞌ, sino togol no mino pengantin laki-laki ino nalap intad siro, ginoi dangan-dangan no puasaꞌ.”
36 Yesus po maraꞌ sulumaꞌ No sinitu, “Lop nogom ulun ngurek lanuꞌ intad kurub an bagu untuk nampol kurub an laid, sobob kurub an bagu ino rusok dan lanuꞌ intok nampol lop gimpilat dangan kurub an laid ino. 37 Sinino po, lop nogom ulun mud timug anggur an bagu mai ubut timug anggur an laid, sobob timug anggur an bagu ino ngurusok ubut timug anggur an laid ino, ubut ano pasut dan timug anggur ino mujai. 38 Pat no timug anggur an bagu ino taman no binud mai ubut an bagu po. 39 Lop nogom ulun guang nginum timug anggur an bagu gaꞌ oyo pongo nginum timug anggur an laid, sobob timug anggur an laid labiꞌ piliꞌ rasaꞌ no intad timug anggur an bagu.”