O Pioza làa bìa le Dónbeenì yà bìo
14
Á ĩ bĩnía le ĩ loń à lée Pioza na le ɓúee na ɓa le Sion ɓúee wán.
Ɓa nùpua muaaseé ɓúará-hèɲun,
làa muaaseé náa páanía wi le wán làa wo.
Ɓa nùpua mu ó o Pioza lè mín maá yènnáa túara ɓuráa wán.
2 Á ĩ ɲá tãmu ɓúi sã ho wáayi lòn ɲun-beenì vã̀náló.
Mu sã mún wee ɲí lòn viohó na wee nàmaka lè mí pànká.
Mu sã wee ɲí lòn kòncówá na ɓa wee ɓúa.
3 Ɓa nùpua mu ɓúenɓúen dĩ̀n mu bá-zàmu kanmúiní,
lè ɓa bùaa bùaa náa,
lè ɓa nì-kĩ́a yahó à ɓa wee sío le len-fĩnle.
Nùpue na dà le leni mu á à sío mía ká mu yínɔń ɓa nùpua muaaseé ɓúará-hèɲun làa muaaseé náa mu na le Dónbeenì yà ho dĩ́míɲá nùpua tĩ́ahṹ.
4 Bán á yí páanía làa hã́awa yí mɔn hùúu á ɓa wee ce le Dónbeenì yahó.
Ɓa wee bè o Pioza yi à varáa hã lùa ɓúenɓúen na á wón wee va yi.
Ho dĩ́míɲá nùpua tĩ́ahṹ á ɓarɛ́n lé bìa le Dónbeenì yà á ɓa bìo sã̀ lerɛ́n là a Pioza yi lòn bè-yáa bìo síi.
5 Ɓa yí fã̀ sabéré yí mɔn hàrí lòn wizoǹ-kéní.
Wékheró bìo yí dà máa mì máa lɛɛ́ ɓa yi.
Ho wáayi tonkaro ɓúi wee bío le Dónbeenì cítíi bìo
6 Á ĩ bĩnía le ĩ loń á ĩ mɔn wáayi tonkaro ɓúi ò o yòó wee dɛ́ɛ ho wáayi fírìcírìi.
O wà ɓueé bue le bín-tente na wi bĩ́n fɛ́ɛɛ á ɲii mía á à na ho dĩ́míɲá kãna nùpua lè mí sìíwà ɓúenɓúen yi,
hàrí ɓa kɛń lùe lée lùe,
hàrí ɓa bío bíonì lée bíonì.
7 O wee bío bìo kà pɔ̃́npɔ̃́n:
«Mi wé kɔ̃̀nbi le Dónbeenì à lén le yèni.
Lé bìo le Dónbeenì cítíi fĩ̀ló pã̀ahṹ dɔ̃n.
Mi wé ɓùaaní le Dónbeenì na léra ho wáayi,
lè ho tá,
lè mu ɲumu ɓúenɓúen.»
8 Ó o ɲun níi wáayi tonkaro na bò a nín-yání tonkaro mɔ́n,
á wee bío bìo kà:
«Ho *Babiloona beenì bìo yáara loo!
Ho bìo yáara!
Ho dɛ̀ɛ́ra ho dĩ́míɲá nùpua ɓúenɓúen lè ho bá-fénló lè ho hã́-fénló lè mí sìíwà làa sòobɛ́ɛ lòn *dìvɛ̃́n na ho ɲuiína làa ba.»
9 Bṹn mɔ́n ó o tĩn níi wáayi tonkaro na bò a ɲun níi mɔ́n,
á bía bìo kà pɔ̃́npɔ̃́n:
«Yìa wé è ɓùaaní a yìa na ló mu yámú ɲumu yi lè mí kansi,
ká ɓànso ó o yìa mu fĩ̀iminì wi ɓuure tàá o níi wán,
10 á wón le Dónbeenì sĩi á à cĩ̀ yi làa sòobɛ́ɛ.
Mu ù wé lòn dìvɛ̃́n na here á le Dónbeenì ɲuiína lè ɓànso.
O lò á à be làa sòobɛ́ɛ ho kìríbì na wee cĩ̀ yi ɓa tonkarowà na bìo sã̀ le Dónbeenì yi là a Pioza yahó.
11 Á ho dɔ̃hṹ na wee beé o lò á máa hí máa mi.
Ho yiìní wé è lé fɛ́ɛɛ hã lúlúio na ɲii mía yi.
Mu bon,
bán na wé è ɓùaaní a yìa lè mí kansi,
na ɓa à bè o yìa mu fĩ̀iminì wán,
bán lò khíi wé è be le wisoni lè ho tĩ́nàahṹ fɛ́ɛɛ.»
12 Lé bṹn á bìa bìo sã̀ le Dónbeenì yi,
bìa wee bè bìo le bò henía yi á yí bĩnía o Yeesu mɔ́n,
á ko ɓa hĩ̀ mí sĩa yi.
13 Ĩ ɲá tãmu ɓúi sã ho wáayi,
à mu bía:
«Túa bìo kà:
Bìa wee hí ká ɓa páanía là a Ɲúhṹso bán ɲúná sĩ bìo kà wán.»
Á le Dónbeenì Hácírí le ũuu le bán ɲúná sĩ.
Le ɓa à vũń le lònbee na ɓa lá bìo yi.
Ɓa bè-wénia wee zéení le ɓa tonló sá se.
Lé mu bìo khèró pã̀ahṹ wã́a dɔ̃n
14 Á ĩ bĩnía le ĩ loń à lée dùndúure dà-poni na,
ò o ɓúi lòn nùpue kará le wán.
O ɓúra mu bá-zàmu khɔ̃̀nlúee na wó lè ho sã́nú,
á ɓuan le khɔ̃́nle na ɲia wi.
15 Ó o tonkaro ɓúi zoó ló le *Dónbeenì zĩ-beenì na ho wáayi yi á wee bío pɔ̃́npɔ̃́n làa yìa kará le dùndúure wán:
«Lá ũ khɔ̃́nle à ũ khè mu bìo ho tá wán,
mu khèró pã̀ahṹ dɔ̃n.»
16 Á yìa kará le dùndúure wán wã́a khò mu bìo ho tá wán ɓúenɓúen véenía.
17 Ó o tonkaro ɓúi bĩnía zoó ló le Dónbeenì zĩ-beenì yi ho wáayi,
á mún ɓuan le khɔ̃́nle na ɲia wi.
18 Ó o tonkaro ɓúi na wee loń le muinì yɛɛníi dɔ̃hṹ bìo á zoó ló ho *ã́nsã́n cĩ̀íníi lùe yi.
O wee bío bìo kà pɔ̃́npɔ̃́n làa yìa ɓuan le khɔ̃́nle na ɲia wi:
«Lá ũ khɔ̃́nle à ũ lii khé ho èrézɛ̃́n na ho tá wán ɓúenɓúen,
ho wã́a bon.»
19-20 Ó o wáayi tonkaro mu lií khó ho èrézɛ̃́n ɓúenɓúen á lée kúaa le dà-beenì na ɓa wee ɲaa ho yi ho donkĩ́ahṹ.
Le dà-beenì na ho èrézɛ̃́n wee ɲaa yi á wee zéení le Dónbeenì sĩ-cĩ̀ílè bìo.
Ɓa lée ɲaana ho èrézɛ̃́n mu,
á mu wó le cãni vã̀náa yú hã kilomɛɛterewa khĩá-tĩn síi,
ká le booró wee dé o cúa à ká a ɲúhṹ.