Bè-sànkanii 13

O yìa na ló mu yámú ɲumu yi bìo

Á ĩ bĩnía le ĩ loń á ĩ mɔn yìa ɓúi ò o ló mu yámú ɲumu yi.

O ɲúná lée bìo hèɲun,

á wã́a lée bìo pírú.

Hã wã́a mu mí bìo pírú zĩ́inía lè mu bá-zàmu khɔ̃̀nlúe-zàwa.

Hã ɲúná mu á ɓa túara hã yènnáa wán á là lè le Dónbeenì.

2 O yìa mu ka lòn manɔ̀n mùindaa.

O nín-khonna ka lòn ɓúe-khá nín-khonna,

á ɲii ka lòn kúden ɲii.

Ó o ɲìa be-beenì á nɔn mí pànká ɓàn síi wo yi,

á nɔn mí bá-zàmu ɓàn síi wo yi.

3 O yìa mu ɲúhṹ dà-kéní ka lè ɓa hà ho ó o lá à hí.

Ɛ̀ɛ ká ho màhã́ bĩnía wan.

Bìo mu wó kà á ho dĩ́míɲá nìpomu ɓúenɓúen wó coon mu bìo yi,

á ɓa tà a yìa mu bìo.

4 Á ɓa wee ɓùaaní a ɲìa be-beenì lé bìo ó o nɔn mí pànká ɓàn síi wo yi.

Ɓa mún wee ɓùaaní a yìa mu ká ɓa à bío:

«Yìa á à tèé là a yìa mu wón mía.

Yìa dà a mía.»

5 O yú le níi ò o wé yáa mí ɲii yi ká a là le Dónbeenì.

Bṹn ɓàn wéró níi nɔn wo yi hã pĩina ɓúará-ɲun làa bìo ɲun yi.

6 Ó o wee bío hã bín-kora lɛɛ́ le Dónbeenì yi ká a là le yèni,

làa hen na le wi yi,

làa bìa wi ho wáayi.

7 O yú le níi o ò fi làa bìa bìo sã̀ le Dónbeenì yi à dàń ɓa.

O yú ho pànká ho dĩ́míɲá kãna nùpua lè mí sìíwà ɓúenɓúen wán,

hàrí ɓa kɛń lùe lée lùe,

hàrí ɓa bío bíonì lée bíonì.

8 Ho dĩ́míɲá nùpua ɓúenɓúen á à ɓùaaní a.

Bán na yènnáa yí túara hàrí ho dĩ́míɲá ɲúhṹ ɓúɛɛníi bìa yú le mukãnì binbirì yènnáa vũahṹ yi,

hìa ó o Pioza na ɓa ɓó te,

lé bán á à ɓùaaní a.

9 Yìa wee ɲí bìo,

à ɓànso ɲí bìo á à bío:

10 Yìa ho kàsó zoró sã̀ yi,

wón ǹ zo ho.

Á yìa ho khà-tóní húmú sã̀ yi,

wón ɓa à ɓúe làa ho.

Lé bṹn á bìa bìo sã̀ le Dónbeenì yi ko ɓa hĩ̀ mí sĩa yi,

à wíoka dé mí sĩa le Dónbeenì yi.

O yìa na ló ho tá yi bìo

11 Á ĩ bĩnía le ĩ loń á ĩ tĩ́n mɔn yìa ɓúi ò o lií ló ho tá yi.

O wã́a lé mu bìo ɲun á ka lòn Pioza wã́a.

Ká a màhã́ wee bío là a ɲìa be-beenì bìo síi.

12 O nín-yání yìa pànká ɓàn síi ó o yú bèra a na ò o wé sá a yahó.

O wee kĩ̀kã́ ho dĩ́míɲá nùpua ɓúenɓúen yi à ɓa ɓùaaní a nín-yání yìa na ɓa hà ó o lá à hí ká a màhã́ bĩnía wan.

13 O wee wé mu yéréké bè-beera.

O yàá wee wé à ho dɔ̃hṹ lé ho wáayi lii à ɓa nùpua ɓúenɓúen mi.

14 O wee vĩ́iní ho dĩ́míɲá nùpua lé bìo ó o yú le níi à wéráa bṹn yéréké bìowa so o yìa na ló mu yámú ɲumu yi yahó.

O wee bío le o yìa na ɓa hà lè ho khà-tóní ó o yí húrun,

à ɓa mí ɓàn kansi à déráa ho cùkú wo yi.

15 O yú ho pànká ò o dé le mukãnì o kansi mu yi ò o wé dàń bío,

ò o mún dàń ɓúe bìa ɓúenɓúen na le mí máa ɓùaaní a kansi mu.

16 Bìa bìo ɲúhṹ wi làa bìa bìo ɲúhṹ mía,

ho nàfòró ɓànsowà lè ɓa nì-khenia,

ɓa nùpua na wi míten lè ɓa wobáaní,

bán ɓúenɓúen ó o yìa mu wee kĩ̀kã́ yi à ɓa bè le fĩ̀iminì mí nín-tĩánì níní wán tàá mí ɓuráa wán.

17 Ká le fĩ̀iminì mu mía nùpue wán,

á ɓànso yí dà bìo máa yà,

ó o mún yí dà bìo máa yɛ̀ɛ́.

Le fĩ̀iminì mu lé o nín-yání yìa yèni,

tàá ho mìló ɲii na màa lè le yèni mu.

18 Ɓa nùpua ko ɓa le mí yiwa hen sese:

Yìa zũ mu bìo,

á ɓànso dà à zũń o yìa mu yèni mìló ɲii ɓàn kúará.

Mu wee zéení a nùpue bìo.

Hã ɲii lée 666.