Hebere 1

Hebere vũahṹ

Le Dónbeenì dĩ̀n mí Za wán wee bíoráa

Le Dónbeenì yánkaa dĩ̀n ɓa ɲi-cúa fɛɛrowà wán á bíaráa lè wàn ɓùaawa.

Le wó mu pɔ̃̀nna cɛ̀rɛ̀ɛ yi,

á le bíoró làa ba mún sìíwà boo.

2 Ɛ̀ɛ ká hã laà na kà wán hã pɔ̃̀nna vaa véeníi,

á le dĩ̀n mí Za wán wee bíoráa làa wɛn.

Lé le Za mu le dĩ̀n wán á léraráa mu bìo ɓúenɓúen.

Lé orɛ́n le wã́a dó mu bìo ɓúenɓúen níi yi.

3 Orɛ́n lé yìa le Dónbeenì cùkú beenì wee mi yi.

Bìo á le Dónbeenì karáa lé bṹn ó orɛ́n mún karáa.

O ɓuan mu bìowa ɓúenɓúen dĩ̀nía lè mí bíonì na pànká wi.

Lé orɛ́n le Dónbeenì dĩ̀n wán á sɛ́raráa ɓa nùpua bè-kora día,

á ɓa wee ce le yahó.

Bṹn mɔ́n ó o yòó kará ho wáayi le Dónbeenì nín-tĩánì,

dén na po mu bìo ɓúenɓúen.

Le Dónbeenì Za po ho wáayi tonkarowà

4 Làa bìo le Dónbeenì Za po poráa ho wáayi tonkarowà,

lé kà síi á le yèni na le wee ve làa wo mún po poráa ɓa yèni.

5 Le Dónbeenì dĩǹ yí bía làa wáayi tonkaro ɓúi le:

«Fo lé ĩ Za.

Ho zuia ɲii wán á ĩ lé mìn Maá.»^a

Le mún dĩǹ yí bía bìo kà là a ɓúi:

«Ĩnɛ́n á à wé ɓàn Maá,

ó orɛ́n á à wé ĩ Za.»^b

6 Ká pã̀ahṹ na le Dónbeenì tonkaa mí Za kĩ́nleso ho dĩ́míɲá yi,

á le bía bìo kà:

«Ho wáayi tonkarowà ɓúenɓúen ko ɓa wé ɓùaaní a.»^c

7 À le ɓɛ̀n bía ho wáayi tonkarowà dã́ní yi le:

«Le Dónbeenì wee wé à le tonkarowà kɛń lòn pinpiró,

le wee wé à le ton-sáwá mu kɛń lòn dɔ̃hṹ dɛnní.»^d

8 Ká le màhã́ bía bìo kà mí Za dã́ní yi:

«Ũnɛ́n Dónbeenì,

ũ bɛ́ɛnì díró ɲii máa fĩ̀ máa mi.

Fo ò pa ũ nìpomu bìo lè ho térénló.

9 Fo wa bìo térénna,

fo ɲina mu bè-kora.

Lé bṹn nɔn á ĩnɛ́n na lé ũ Dónbeenì á kúaa ho ɲiló ũ ɲúhṹ wán

à zéení le ĩ tà ũ bìo.

Lé bṹn wɛɛ́ra ũ sĩi.

Ĩ dó ho cùkú foǹ á po mi ninzàwa na ká.»^e

10 Le pá bĩnía bía bìo kà mí Za mu dã́ní yi:

«Mu ɲúhṹ ɓúakáníi ká bìo ɓúi dĩǹ yí léra,

á ũnɛ́n Ɲúhṹso lé fo léra ho tá,

á lé fo mún léra ho wáayi.

11 Bṹn bè-lénnia so ɓúenɓúen khíi vé,

ká ũnɛ́n á à kɛń bĩ́n fɛ́ɛɛ.

Ho wáayi lè ho tá wé è khè lòn sĩ̀-zĩ́nia.

12 Fo ò bi mu lòn báká beenì á à bàrá,

mu ù yèrèmá lòn sĩ̀-zĩ́nia,

ká ũnɛ́n á à dĩ̀n làa bìo fo karáa,

fo ò kɛń bĩ́n fɛ́ɛɛ.»^f

13 Le Dónbeenì dĩǹ yí bía làa wáayi tonkaro ɓúi le:

«Ɓuee kɛɛní ĩ nín-tĩánì,

fúaa ká ĩ ɓúrá ũ zúkúsa ũ tá

á ũ bò ũ zení wán.»^g

14 Á ɓa tonkarowà na wee lé ho wáayi ɓɛ̀n lé ɓa yɛ́n?

Ɓa lé le Dónbeenì ton-sáwá.

Le wee tonka ɓa à ɓa ɓuee séení bìa á à yí ho kã̀níló le Dónbeenì cɔ̃́n.