Tiite 1

Ho vũahṹ na ó o Poole túara nɔn o

Tiite

Le tɛ̀ɛníi

Mu lé ĩnɛ́n Poole á túara ho vũahṹ na kà.

Ĩ lé le Dónbeenì ton-sá là a Yeesu *Krista tonkaro,

bèra a na à bìa le hueekaa à ɓa sĩadéró wíoka fárá tĩn à ɓa zũń ho tũ̀iá poni na à wé á ɓa à ɓua míten á à héha làa bìo sĩ le Dónbeenì yi.

2 Lé bṹn ǹ na á ɓa dà à dé mí sĩa wé è lòoní le mukãnì binbirì na máa vé,

dìo le Dónbeenì dó mí ɲii le mí ì na bìa bìo sã̀ le yi yi ká bìo ɓúi dĩǹ yí léra.

Wa láa mu yi lé bìo wa zũ le le Dónbeenì máa wé fĩ̀ sabéré.

3 Ká bìo le le mí ì wé pã̀ahṹ dɔ̃n,

á le zéenía bìo le dó mi ɲii le mí ì wé wéréwéré lè ɓa nùpua làa bìa le tonkaa le ɓa bue mí bín-tente ɲiní.

Lé hón tonló so á wa kã̀nílo Dónbeenì kàràfáa miì.

4 Mu lé ĩnɛ́n Poole á túara ho vũahṹ mu nɔn ũnɛ́n Tiite yi.

Fo lé ĩ za binbirì wa sĩadéró le Dónbeenì yi bìo yi.

Le wàn Maá Dónbeenì lè wa kã̀nílo Yeesu *Krista à wé mí sãamu làa fo à na ho hɛ́ɛrà foǹ.

Ho tonló na ó o Tiite ko ò o sá ho Kɛrɛɛte yi

5 Ĩ wà à ĩ día fo ho Kɛrɛɛte kɔ̃hṹ yi,

à ũ wíoka bìo á ĩnɛ́n làa fo ɓúa ɲúhṹ à véení,

à mún hueeka ɓa nùpua bàráka hã lórá lè mi dà-kéní kéní na ɓa kèrètĩ́ɛwa wi yi à ɓa dí ɓa yahó.

Liiní ũ hácírí bìo á ĩ henía nɔn foǹ wán.

6 O ya-dí ko ò o wé nùpue na á bè-kohó yèni yí máa ve lɛɛ́ yi.

O ya-dí ko ò o hã́a yà-kéní na ó o yan lé wón mí dòn ò o kã́ɲa yi à yí lé mɔ́n.

O zàwa ko à ɓa dé mi sĩa o Yeesu *Krista yi,

ɓa mún ko à ɓa zũń míten ɓuaró,

bèra a na à bè-kohó bìo yí mì lɛɛ́ ɓa yi,

à ɓa mún yí wé ɓa zà-kã́ania.

7 Lé bìo ɓa kèrètĩ́ɛwa kuure ya-dí lé le Dónbeenì ton-sá,

lé bṹn bìo yi ó o yí ko à bè-kohó yèni ve lɛɛ́ wo yi.

O yí ko ò o wé nùpue na yí máa tà ɲí bìa ká cɔ̃́n,

á sĩi sùwa.

O yí ko ò o wé o nùpue na wee ɲu ho *dìvɛ̃́n dàkhĩína,

á wa hã bíoní.

O yí ko ò o wé o nùpue na sòobáa dó mi sĩi le wárí yi,

á wee cà le làa bìo yínɔń mu.

8 Ɛ̀ɛ ká a màhã́ ko ò o wé o nùpue na wee hɛ́n mí yahó sĩ́ ɓa nùpua.

O ko ò o wań mu bè-tente wéró.

O ko ò o wé o bè-zũńminì ɓànso,

á térénna,

á wee wé bìo sĩ le Dónbeenì yi,

á dà wee ɓua míten sese.

9 Le Dónbeenì bín-tente,

dìo lé ho tũ̀iá poni na kàránna làa wo ó o ko ò o wíoka ɓua sese.

Ká a wee wé kà síi,

o ò dàń wé è hení bìa ká sĩa á ɓa à bè ho kàránló na bìo bon yi,

á mún ǹ dàń ǹ zéení wéréwéré làa bìa le ho kàránló mu bìo yí bon le ɓa wee vĩ́iní míten.

10 Mu bon,

ɓa kèrètĩ́ɛwa cɛ̀rɛ̀ɛ,

sɔ̃̀nkú bìa wee bè ho *kúiiró làndá yi tĩ́ahṹ,

á yí máa ɲí dɛ̀ɛ,

á wee bío hã bín-conconwà à khàráa ɓa nùpua vĩ́iní.

11 Yí día le bánsowa so wé kàrán ɓa nùpua lé bìo ɓa kàránló mu yí bon,

ho wee yáa hã zĩ-ɲún-kùio.

Mu yàá yínɔń bṹn mí dòn,

ɓa wee wé mu à càráa le wárí.

12 Ho Kɛrɛɛte kɔ̃hṹsa nì-kéní ɓúi na ɓarɛ́n wee lá làa ɲi-cúa fɛɛro á bía bìo kà:

«Ho Kɛrɛɛtesa lé ɓa sabín-fũ̀aalowa,

ɓa sũnsũmána lòn zĩ́n-bùaa,

ɓa lé ɓa paríwà,

bìo ɓa wa lé ho dará ɓa dí.»

13 À mu ɓɛ̀n bon,

o nìi mu tũ̀iá sĩ.

Lé bṹn nɔn,

á ũ zá làa ba à mì le sòobɛ́ɛ na ɓa yi à ɓa yèrèmá dé mí sĩa bìo bon yi

14 à yí tà ɓa *zúifùwa hácín-bíoní,

làa bìa pã́ ho tũ̀iá poni làndáwá yi.

15 Yìa wee ce le Dónbeenì yahó,

á làndá yí máa hè làa bìo ɓúi díró.

Ká yìa yí máa ce le Dónbeenì yahó,

á yí dó mí sĩi o Yeesu yi,

wón wárá ɓúenɓúen yí máa ce.

Hàrí o yilera yàá yí máa ce.

O wó bìo yí se à mu nìyio máa dí o.

16 O wee bío wéréwéré le mí zũ le Dónbeenì ɛ̀ɛ ká a wárá hɔ̃́n wee zéení le mu yí bon.

O bìo sũii ló,

o yí máa bè le Dónbeenì bíonì yi,

o yí dà bìo na se máa wé.