Ɓa zúifùwa làa bìa yínɔń ɓa à bìo sã̀ a Ɲúhṹso yi
10
Wàn zàwa lè wàn hĩ́nni,
bìo wi ĩ sĩi yi làa sòobɛ́ɛ na á ĩ wee fìo le Dónbeenì cɔ̃́n ɓa *zúifùwa dã́ní yi,
lé ɓa kã̀níló bìo.
2 Mu bon,
ĩ dà à bío mu ɓa ɲii le ɓa ɓɛ̀ntĩ́n henía le Dónbeenì bìo làa sòobɛ́ɛ,
ɛ̀ɛ ká mu yara binbirì á ɓa yí zũ.
3 Bìo le Dónbeenì wee wé ò o nùpue térén le yahó á ɓa yí zũ,
á ɓarɛ́n míten wi ɓa cà bìo ɓa à wé ká ɓa à térén le yahó.
Lé kà síi á ɓa pã́náa bìo wee wé ò o nùpue térén le Dónbeenì yahó.
4 Mu bon,
lé o *Krista nɔn ó o *Mɔyiize làndá bèró bìo ɲii súráa,
bèra a na à bìa ɓúenɓúen na wee dé mí sĩa o Krista mu yi,
à bán térén le Dónbeenì yahó.
5 Bìo ó o Mɔyiize bía ho làndá na wee wé ò o nùpue térén le Dónbeenì yahó dã́ní yi lé bìo kà:
«Yìa wee wé bìo ho làndá bò henía wón yìo á à wé lua ho pànká yi.»a
6 Le sĩidéró o Krista yi dã́ní yi na wee wé ò o nùpue térén le Dónbeenì yahó á bìo kà lé bìo bía:
Yí bío ũ sĩi yi le «lé o yɛ́n á à yòo ho wáayi?»
Mu wee zéení le lé o yɛ́n á yòó wé ó o Krista ɓueé lii.
7 Mún yí bío ũ sĩi yi le «lé o yɛ́n á à lii ho nì-hɔ̃́nbó-lóhó yi?»
Mu wee zéení le lé o yɛ́n á lií vèení a Krista ɓa nì-hía tĩ́ahṹ.
8 Ká bìo kà lé bìo bía:
«Le bíonì ɓueé ɓó foǹ.
Dén bíonì so lé dìo wee zéení le sĩidéró o Krista yi bìo.»b
Lé lerɛ́n bíonì mu á wa wee bue.
9 Ká fo tà bía wéréwéré le o Yeesu lé o Ɲúhṹso,
ká fo dó ũ sĩi binbirì le le Dónbeenì vèenía wo léra ɓa nì-hía tĩ́ahṹ,
á fo ò fen.
10 Mu bon,
le sĩi na wee dé le Dónbeenì yi binbirì lé bìo wee wé ò o nùpue térén le yahó.
Yìa bía mí sĩidéró o *Krista yi bìo wéréwéré,
wón ɓànso á le Dónbeenì á à fení.
11 Mu bon,
bìo kà lé bìo túara le Dónbeenì bíonì vũahṹ yi:
«Nùpue lée nùpue na dó mí sĩi le Dónbeenì yi wón máa nìyi.»c
12 Ɓa *zúifùwa làa bìa yínɔń ɓa zúifùwa á hueekaró mía yi.
Ɓa ɓúenɓúen lɛɛ́ra o Ɲúhṹso nì-kéní yi,
wón na wee wé mu tentemu làa bìa ɓúenɓúen na wee fìo mu o cɔ̃́n.
13 Mu bon,
bìo kà lé bìo túara le Dónbeenì bíonì vũahṹ yi:
«Nùpue lée nùpue na à ve o Ɲúhṹso,
ó ò kã̀ní.»d
14 Ɛ̀ɛ ká ɓa so dà à ve o Ɲúhṹso ká ɓa yí dó mí sĩa wo yi le?
Á ɓa so dà à dé mí sĩa wo yi ká a ɓúi yí zéenía o bìo á ɓa yí ɲá le?
Á ɓa so dà à ɲí mu ká a ɓúi yí buera mu le?
15 Á mu so dà à bue ká a ɓúi yí tonkaa mu bìo yi le?
Làa bìo mu túararáa le Dónbeenì bíonì vũahṹ yi kà síi:
«Bìa wee ɓuen lè hã bín-tentewà á miló sĩ-wɛɛ ɓɛ̀ntĩ́n wi làa sòobɛ́ɛ.»e
16 Ká ɓa ɓúenɓúen màhã́ yí bò le Dónbeenì bín-tente yi.
Mu bon,
bìo kà lé bìo ó o *Ezayii bía:
«Ɲúhṹso,
lé o yɛ́n yàá dó mí sĩi le bín-tente na wa wee bue yi?»f
17 Lé kà síi á le sĩidéró le Dónbeenì yi wee lé le bíonì na ó o nùpue wee ɲí yi,
á le bíonì mu lé o Krista bìo bueró.
18 Àwa,
le ĩ tùa mia:
O *Isirayɛɛle nìpomu á yí ɲá le bín-tente mu le?
Ɓa ɲá le.
Bìo kà lé bìo túara le Dónbeenì bíonì vũahṹ yi:
«Le Dónbeenì bín-tente
á bɛ̀nbɛ́ra hã lùa ɓúenɓúen.
Le buera nɔn
ho dĩ́míɲá nùpua ɓúenɓúen yi.»g
19 Le ĩ wíoka tùa mia:
Á lé o Isirayɛɛle nìpomu yí zũna mu kúará le?
Àwa,
á bìo kà lé bìo ó o *Mɔyiize fèra bía mu dã́ní yi:
«Ĩ ì wé á bìa yínɔń ĩ nìpomu
á mi ì dí lè le yandee.
Ĩ ì wé á mi sĩa á à cĩ̀
mu nìpomu na hácírí mía yi.»h
20 Le *Dónbeenì ɲi-cúa fɛɛro Ezayii yàá henía mí sĩi ò o bía bìo kà:
«Bìa lá yí máa cà mi
á yú mi.
Bìa lá yí máa fìo dɛ̀ɛ ĩ cɔ̃́n
á ĩ zéenía lè ĩten.»i
21 Ká a Isirayɛɛle nìpomu dã́ní yi,
á le Dónbeenì ɲi-cúa fɛɛro Ezayii pá bĩnía le le Dónbeenì bía bìo kà:
«Làa wizooní ɓúenɓúen ká ĩ wee dá ĩ níi ve o Isirayɛɛle nìpomu na yí máa bè ĩ bíonì yi,
à ɓa kã́a.»j