O Poole le ɓa bá-zàwa bɛ́ɛ lé yìa á à cítí mí
25
O Fɛsituusi ɓuenló ho kɔ̃hṹ mu yi wizooní tĩn bṹn mɔ́n,
ó o dĩ̀n ho *Sezaaree yi á vannáa ho Zeruzalɛɛmu.
2 Bìo ó o vaá dɔ̃n bĩ́n,
á le *Dónbeenì yankarowà ɲúnása lè ɓa *zúifùwa ya-díwá á ɓueé bía a Poole wékheró bìo nɔn wo yi.
Ɓa fìora a Fɛsituusi
3 le o ɲìá mí yi ò o na ho wɔ̃hṹ mí yi à mí ɓua a Poole varáa ho Zeruzalɛɛmu.
Yaa ɓa lò a wán,
á wi ɓa ɓúe o ho wɔ̃hṹ wán.
4 Ká a Fɛsituusi màhã́ bía nɔn ɓa yi:
«O Poole wi ho kàsó yi ho Sezaaree yi,
á hen làa cĩ́inú ká ĩnɛ́n ĩ bɛɛre á a bĩní ì va bĩ́n.»
5 Ò o bĩnía bía:
«Hen ká ɓa ɓúi wi mi tĩ́ahṹ á dà vaá zéenía a wékheró,
à bán wã́a le wa bè mín va.»
6 O Fɛsituusi wó hã wizooní bìo hètĩn,
tàá bìo pírú mí dòn làa ba,
bṹn mɔ́n ó o bĩnía van ho Sezaaree.
Mu tá na lée tɔ̃n,
ó o Fɛsituusi lée kará mí cítíi fĩ̀iníi lahó yi,
ò o le ɓa ɓua a Poole ɓuennáa.
7 Ká a Poole ɓueé dɔ̃n,
á ɓa zúifùwa na ló ho Zeruzalɛɛmu yi kĩ́nía wo yi á wee kooní a yi làa bìowa sìíwà cɛ̀rɛ̀ɛ na á ɓarɛ́n mí bɛɛre yàá yí dà máa zéení yara.
8 Ká a Poole màhã́ pã́ ò o fɛɛra ho tũ̀iá léraráa mi ɲúhṹ kà síi:
«Ĩ yí wó bè-kohó ɓúi ɓa zúifùwa làndá lè le *Dónbeenì zĩ-beenì dã́ní yi.
Ĩ mún yí wó yí khon lè ho *Oroomu bɛ́ɛ.»
9 Bìo ó o Fɛsituusi wi ò o wɛɛ́ ɓa zúifùwa sĩa,
ó o wã́a tùara a Poole yi:
«Fo o tà á à va ho Zeruzalɛɛmu á ɓa vaá cítí fo ĩ yìo yi bĩ́n le bíonì mu dã́ní yi le?»
10 Ó o Poole bía:
«Ĩ wi o bɛ́ɛ cítíi fĩ̀iníi,
á le bĩ́n á ĩ ko à ĩ cítí yi.
Ĩ yí wó yí khon lè ɓa zúifùwa.
À ũnɛ́n ũ bɛɛre yàá zũ mu.
11 Ká ĩ ɓuan khon,
á wó mu ɓúi na bìo yi á ɓa ko ɓa ɓúe mi,
á ĩ máa pĩ́ ĩ húmú.
Ká bìo ɓa ɓɛ̀n le ĩ wó khonnáa á yí bon,
á nùpue ɓúi ɓɛ̀n mún yí ko ò o dé mi ɓa níi yi.
O bɛ́ɛ lé yìa á à fɛɛ ĩ tũ̀iá.»
12 Ó o Fɛsituusi lè ɓa nùpua na wee na hã yile-tentewà wo yi mɔn mín.
Bṹn mɔ́n ó o bía:
«O bɛ́ɛ lé yìa á à fɛɛ ũ tũ̀iá làa bìo fo le mu wéráa.»
O Poole dĩ̀n o Akiripaa là a Bereniisi yahó
13 Wizooní bìo yɛn bṹn mɔ́n,
ó o bɛ́ɛ *Akiripaa lè mín hĩ́nló Bereniisi á van ho *Sezaaree á wà vaá tɛ̀ɛnía a Fɛsituusi yi.
14 Ɓa wó hã wizooní bìo yɛn bĩ́n,
ó o Fɛsituusi yú zéenía a Poole bìo là a bɛ́ɛ Akiripaa kà síi:
«Nùpue ɓúi wi hen ó o Felikisi á dó ho kàsó yi día.
15 Pã̀ahṹ na á ĩ van ho Zeruzalɛɛmu,
á ɓa yankarowà ɲúnása lè ɓa *zúifùwa ya-díwá ɓueé bía a nìi mu wékheró bìo nɔn miì,
à ɓa le ĩ bío le o ko ò o ɓúe.
16 Á ĩ bía nɔn ɓa yi le ho Oroomusa yí máa tà síiní nùpue ɲúhṹ kà síi,
ká ɓànso làa bìa le o wó khon yí dĩ̀n mín yara ó o yí mà ho tũ̀iá yí léraráa mi ɲúhṹ bìo ɓa le o wó khon dã́ní yi.
17 Ɓa bò mín làa mi á ɓuara hen,
á ĩ wã́a yí día á mu yí míana,
à mu ɓàn tá na lée tɔ̃n,
à ĩ van le cítíi fĩ̀iníi,
à ĩ le ɓa ɓua a nùpue mu ɓuennáa.
18 Á bìa le o wó khon á ɓuara.
Ká hã wékhewa na á ĩnɛ́n lá wee leéka bìo ɓàn dɛ̀ɛ woon á ɓa yí mà a ɲii.
19 Mu lé ɓarɛ́n kùrú làndá bìo á ɓa làa wo wã̀anía wán,
là a nìi ɓúi na ɓa le Yeesu na húrun ó o Poole wee bío le o yìo wi lua bìo yi.
20 Bìo á ĩ ì wé wé è fáaráa hã tũ̀iáwà mu á ĩ yí zũ.
Lé bṹn nɔn á ĩ tùara a Poole yi le o tà á à va ho Zeruzalɛɛmu á ɓa vaá cítí o ho tũ̀iá mu dã́ní yi le?
21 Ká a Poole màhã́ cà mu le o bɛ́ɛ lé yìa à cítí mí.
Á ĩ wã́a nɔn le ɲii le ɓa día le o wé ho kàsó yi fúaa ká ĩ yú a nɔn o Sezaare yi.»
22 Ó o Akiripaa wã́a bía nɔn o Fɛsituusi yi:
«Mu mún ǹ wé sĩ ĩnɛ́n yi à ĩ ɲí a nìi mu bíoní.»
Ó o Fɛsituusi bía nɔn wo yi:
«Ho yíró ká ũ ɲí hã.»
23 Mu tá na lée tɔ̃n,
ó o Akiripaa là a Bereniisi lè ɓa dásíwá ɲúnása lè ho lóhó nì-beera á bò mín,
á bán dó ho cùkú ɓa yi lɛ̀ɛnía ɓueé zonnáa le cítíi fĩ̀iníi.
Ó o Fɛsituusi nɔn le ɲii le ɓa ɓua a Poole ɓuennáa.
24 Bìo ó o ɓueé dɔ̃n,
ó o Fɛsituusi bía:
«À ũnɛ́n bɛ́ɛ Akiripaa,
lè minɛ́n na làa wɛn páanía wi hen kà ɓúenɓúen,
o nìi na dĩ̀n mi yahó kà lé yìa bìo yi nɔn á ɓa zúifùwa ɓúenɓúen vonnáa mín ĩ cɔ̃́n hen,
lè ho Zeruzalɛɛmu yi,
á wee wãamaka le o ko ò o ɓúe.
25 Ĩnɛ́n cɔ̃́n á ĩ yí mɔn bìo ɓúi na nɔn ó o koráa lè mu húmú.
Ɛ̀ɛ ká bìo ó orɛ́n míten le ɓa bá-zàwa bɛ́ɛ lé yìa ko ò o cítí mí,
á ĩ le bṹn lé bìo á mu wã́a à wéráa.
26 Bìo á ĩ ì túa sese o nìi mu dã́ní yi á à na ɓa bá-zàwa bɛ́ɛ mu yi á mía.
Lé bṹn nɔn á ĩ ɓuan wo á ɓueé dĩ̀nía mi yahó,
sɔ̃̀nkú à ũnɛ́n Akiripaa ũ bɛɛre yahó.
Ká fo tùara a yi,
á ĩ ì yí bìo ɓúi á à túa.
27 Lé bìo mu ɲúhṹ mía ĩ cɔ̃́n à ĩ bío le ɓa ɓua kàsó nìi varáa ho Oroomu ká ĩ yí zéenía o wékheró.»