O Piɛre fɛɛra bìo wó a Koronɛɛye zĩi
11
Ɓa tonkarowà làa bìa tà a *Krista bìo na wi ho *Zudee yi á ɲá le bìa yínɔń ɓa *zúifùwa á mún tà le Dónbeenì bìo.
2 Bìo ó o Piɛre bĩnía van ho Zeruzalɛɛmu,
á bìa tà a Krista bìo na lé ɓa zúifùwa binbirí á wee zá làa wo:
3 «Lée webio nɔn á fo vannáa bìa yínɔń ɓa zúifùwa cɔ̃́n á páanía dú làa ba?»
4 Ó o Piɛre wã́a lií lá bìo mu wóráa lè mí dà-kéní kéní ɓúenɓúen á fɛɛra nɔn ɓa yi kà síi:
5 «Mu wee wé ká ĩ wi ho Zopee lóhó yi á wee wé ĩ fìoró.
Yìo ɓueé tĩ à bìo ɓúi zéenía míten làa mi.
Mu lée dɛ̀ɛ ɓúi lòn pɔ̃nsò-beenì á ɓa ɓuan ɲi-kã́a bìo náa yi,
na yòó ló ho wáayi á ɓueé lií ɓó miì.
6 Á ĩ lora le yi sese,
á mɔn ɓa naɲuwà laà náa náa sowa,
bìa ho lóhó yi làa bìa hã mana yi,
làa bìa wee várá mí píorà wán,
lè ɓa ɲínzàwa.
7 Á ĩ ɲá tãmu ɓúi sã na wee bío làa mi:
‹Piɛre,
lii hĩ́ní ɓúe ɓa à là.›
8 Ká ĩ màhã́ bía:
‹Ébé,
Ɲúhṹso,
ĩ máa wé mu.
Dĩ́nló na ũ hò yi,
làa hìa tun á ĩ dĩǹ yí dú yí mɔn hùúu.›
9 Á mu tãmu tĩ́n pá bĩnía sã ɲá á bía nɔn miì:
‹Bìo na le Dónbeenì le mu wee ce vó ũnɛ́n yí wé làa bìo na tun.›
10 Mu wó làa bṹn á dɔ̃n hã zen cúa-tĩn.
Bṹn mɔ́n á le dɛ̀ɛ mu dɛ̀ɛnía bĩnía ɓuan yòora ho wáayi.
11 Hón pã̀ahṹ dà-kéní so yi,
à bṹn ɓa nùpua nùwã tĩn ɓúi na ɓa tonkaa á ló ho *Sezaaree yi á ɓueé dɔ̃n le zĩi na á ĩ wi yi.
12 Á le Dónbeenì Hácírí bía le ĩ yí titika,
le ĩ hĩ́ní bè làa ba.
Wàn zàwa nùwã hèzĩ̀n na bò làa mi ɓuara hen,
lé bán lɛ̀ɛnía mi vannáa ho Sezaaree,
á wa vaá páanía zon o Koronɛɛye zĩi.
13 Á wón lá bìo ó o wó wó mɔnnáa ho wáayi tonkaro mí zĩi ká a dĩ̀n wee bío làa wo kà síi:
‹Tonka ɓa nùpua le ɓa va ho Zopee à vaa ve o Simɔn na ɓa le Piɛre le o ɓuen.
14 Hã bíoní na á à kã̀ní ũnɛ́n lè ũ zĩi nùpua ɓúenɓúen lé hɔ̃́n ò o bío á a na foǹ.›
15 «Bìo á ĩ ɓúakáa wee bío à bṹn le Dónbeenì Hácírí lion ɓa wán,
làa bìo le hĩ́a lionnáa warɛ́n wán mu ɲúhṹ ɓúɛɛníi bìo síi.
16 Á ĩ hácírí màhã́ ɓuara bìo ó o Ɲúhṹso hĩ́a bía wán:
‹O Zãn hĩ́a wee bátízé lè mu ɲumu,
ɛ̀ɛ ká minɛ́n bán á à bátízé lè le Dónbeenì Hácírí.›
17 Bìo le Dónbeenì hĩ́a hɔ̃n làa wɛn,
pã̀ahṹ na wa tà a Ɲúhṹso Yeesu Krista yi,
lé bṹn á le mún hɔ̃n lè ɓarɛ́n.
Á ĩnɛ́n lée wée á à pĩ́ bìo le Dónbeenì le mí ì wé.»
18 Bìo ɓa ɲá hɔ̃́n bíoní so,
á ɓa yòó wan tɛ̀ɛn,
á wee khòoní le Dónbeenì kà síi:
«Mu ɓɛ̀ntĩ́n bon.
Le Dónbeenì mún tà nɔn ho wɔ̃hṹ bìa yínɔń ɓa zúifùwa yi à ɓa dàń yèrèmá mí yilera lè mí wárá,
à yí le mukãnì binbirì na máa vé.»
Bìo ho Ãntiosi kèrètĩ́ɛwa kuure ɲúhṹ ɓúakáaráa
19 Bìa tà a *Krista bìo lò beéró na ɓúakáa o Etiɛna ɓúeró pã̀ahṹ lé bṹn nɔn á ɓa saawaaráa.
Ɓa ɓúi wà fúaa ho Fenisii lè ho Siipere kãna,
lè ho Ãntiosi lóhó yi.
Ká ɓa màhã́ vaá yí máa bue le Dónbeenì bíonì à na nì-vio yi,
ká mu yínɔń ɓa *zúifùwa.
20 Ɛ̀ɛ ká bìa tà a Krista bìo nùwã yɛn ɓúi na wee lé ho Siipere lè ho Sirɛɛna yi,
á ló van ho Ãntiosi,
á mún vaá wee bue le Dónbeenì bín-tente na bìo ciran o Ɲúhṹso Yeesu à na bìa yínɔń ɓa zúifùwa yi.
21 O Ɲúhṹso dàńló fù wi làa ba,
á nùpua cɛ̀rɛ̀ɛ á tà yèrèmáa bò a Ɲúhṹso yi.
22 Ho Zeruzalɛɛmu kèrètĩ́ɛwa kuure ɲá mu bìo mu,
á ɓa wã́a tonkaa o Baanabaasi le o va ho Ãntiosi.
23 Bìo ó o vaá dɔ̃n bĩ́n ó o mɔn bìo le Dónbeenì dúɓuaaráa bìa tà a Krista bìo yi,
ó o zã̀makaa mu bìo yi,
ò o henía ɓa ɓúenɓúen sĩa,
à ɓa yí lé o Ɲúhṹso mɔ́n,
ká ɓa tà a bìo mí sĩa yi.
24 Mu bon,
o Baanabaasi ɓɛ̀ntĩ́n fù lée nùpue na se,
á sú lè le Dónbeenì Hácírí,
á dó mí sĩi o Ɲúhṹso yi.
Nùpua cɛ̀rɛ̀ɛ tà nɔn míten o Ɲúhṹso yi.
25 Bṹn mɔ́n ó o Baanabaasi wà van ho Taasi lóhó,
á wà vaá cà a Soole.
26 Bìo ó o vaá yú a,
ó o bò mín làa wo ɓuara ho Ãntiosi yi.
Ɓa mí nùwã ɲun á wó le lúlú-kùure ká ɓa wee páaní kúee mín wán lè ho Ãntiosi kèrètĩ́ɛwa,
á kàránna nùpua cɛ̀rɛ̀ɛ.
Lé ho Ãntiosi yi á ɓa ɓúakáa wee veráa bìa tà a Krista bìo làa kèrètĩ́ɛwa.
27 Mu pã̀ahṹ á le *Dónbeenì ɲi-cúa fɛɛrowà ɓúi ló ho Zeruzalɛɛmu yi á van ho Ãntiosi.
28 Ɓa nì-kéní na ɓa le Akabuusi á le Dónbeenì Hácírí bía nɔn yi,
ó o hĩ́nɔn yòó dĩ̀n ò o bía le hen làa cĩ́inú ká le hĩn-sũmúi á à lé ho tá ɓúenɓúen wán.
Á le ɓɛ̀n ló pã̀ahṹ na ó o Koloode wó ho *Oroomu bá-zàwa bɛ́ɛ yi.
29 Á ɓa nì-kenínia wã̀anía tò,
le mí nì-kéní kéní á a na bìo na mí dà a na á à wé lè le séeníi á à toní ì na bìa tà a Krista bìo ho *Zudee yi.
30 Á bṹn lé bìo ɓa wó,
à ɓa tonkaa o Baanabaasi là a Soole le ɓa ɓua mu vaa na ho Zudee kɔ̃hṹ kèrètĩ́ɛwa kuio ya-díwá yi.