Luki 16

O ton-sá kohó na hácírí wi wàhiire

Bṹn mɔ́n ó o Yeesu wee bío lè mí nì-kenínia:

«Nàfòró ɓànso ɓúi hĩ́a lá nùpue ɓúi bàrá mí tonni ɲúhṹ wán.

Wizonle ɓúi á ɓa ɓueé bía nɔn wo yi le o ton-sá mu wee yáa o níi bìo dàkhĩína.

2 Ó o von wo ɓueé wee bíoráa:

‹Bìo á ĩ ɲá ũ dã́ní yi á so bon le?

Wã́a wa lá bìo á ũ wó ɓúenɓúen ɓàn càtíi,

bṹn mɔ́n á wa à kúia mín.

À ũ tonló vó ĩ cɔ̃́n zuia.›

3 Ó o nìi wee bío mí yi:

‹Éee!

Ĩ ɲúhṹso wã́a léra mi mí tonni sáró yi á ĩ ì wé kaka?

Bìo ho vàró á ĩ yí dà bìo,

á ho hɛ́ɛ fìo mún nìyio wi miì.

4 Àwa,

ĩ wã́a zũ bìo á ĩ wé ká ĩ tonló yáara á ĩ pá à yí ɓa ɓúi na à ɓua mi.›

5 Á bìa ɓúenɓúen na ɓa ɲúhṹso kení wi yi ó o von lè mí nì-kéní kéní.

Á yìa ɓuara ho yahó ó o tùara yi:

‹Ĩ ɲúhṹso kee na wi foǹ lé le yɛ́n?›

6 Á wón bía:

‹Lée oliivewa bia ɲiló bàrìkónwa khĩmàni.›

Ó o bía nɔn wo yi:

‹Lii kɛɛní fùafùa.

Fé ũ kee vũahṹ à ũ túa:

Ɲiló bàrìkónwa ɓúará-ɲun làa pírú.›

7 Ó o bĩnía tùara a ɓúi yi:

‹À ũnɛ́n ɓɛ̀n kee lé le yɛ́n?›

Á wón bía:

‹Lée dĩ́nló pórókówá khĩá-hònú.›

Ó o bía nɔn wo yi:

‹Fé ũ kee vũahṹ à ũ túa:

Dĩ́nló pórókówá khĩá-náa.›

8 Bìo ó o ton-sá mu yí térénna ká ɓa ɲúhṹso màhã́ pá khòonía wo hã hénní na ó o yú bìo yi.

Lé bìo á ho dĩ́míɲá na kà nùpua zũ mín ɓuaró á po mu khoomu nùpua.»

9 Ó o Yeesu mu bĩnía bía:

«Le ĩ bío mu na mia:

Mi wé yú ho dĩ́míɲá nàfòró à mi wé wé bìo mi ì yíráa ɓa bɔ̃́nlowà làa ho,

ká ho khíi vó mi cɔ̃́n,

á ɓa à fé mia á à zoráa le mukãnì na máa vé lahó yi.

10 Yìa yú mu bìo na cĩ́inú ó o zũna mu ɓuaró,

wón ɓa nɔn bìo boo yi ó o mún ǹ zũń mu ɓuaró.

Yìa yí térénna mu bìo na cĩ́inú yi,

ó o mún máa térén mu bè-beera yi.

11 Ká mi yú ho dĩ́míɲá nàfòró á mi yí zũna hón ɓuaró,

á lée wée á à tá à na ho nàfòró tente mia?

12 O nì-veere bìo na ɓa kàràfáa mia á mi yí zũna ɓuaró,

á mi kùrú bìo á ɓa mún máa na mia.

(Matiye 6.24)

13 «Ton-sá woon yí dà máa sá máa na ɲúnása nùwã ɲun yi.

O ò ɲin o nì-kéní,

ká a wań yìa so.

O wé è ɲí a nì-kéní bíonì,

ká yìa so ó o máa kɔ̃̀nbi.

Mi yí dà máa sá máa na le Dónbeenì yi ká mi mún pá henía le wárí càró bìo.»

14 Bìo ɓa *Farizĩɛwa ɲá hã bíoní mu,

á ɓa wee yáa mí ɲiní yi na a Yeesu yi,

lé bìo á ɓa dó mí sĩa le wárí càró yi dàkhĩína.

15 Ká a Yeesu màhã́ bía nɔn ɓa yi:

«Minɛ́n wee wé míten lè ɓa nì-tentewà ɓa nùpua yahó,

ɛ̀ɛ ká le Dónbeenì dén zũ bìo wi mi yiwa,

lé bìo á bìo ɓa nùpua wee mi à wé lè mu bè-beenì á le Dónbeenì yí máa tà yi.

Ho làndá lè le Dónbeenì bɛ́ɛnì bìo

(Matiye 11.12-13)

16 «O *Mɔyiize làndá lè le *Dónbeenì ɲi-cúa fɛɛrowà vɔ̃nna á pã̀ahṹ wà fɛ́ɛɛ ɓueé ɓó a Zãn Batiisi ɓuenló yi.

Wón ɓuenló ɲii lé bṹn á le *Dónbeenì bɛ́ɛnì bìo bueró ɲúhṹ ɓúa yi,

á ɓa nùpua lè mí nì-kéní kéní wee ɲàa mín le bɛ́ɛnì mu zoró yi wán.

(Matiye 5.18)

17 «Ho wáayi lè ho tá véró á wayi po ho làndá bín-za dɛ̀ɛ na cĩ́inú vĩ́ló.

(Matiye 5.32)

18 «Báa na día mín hã́a ò o bĩnía fó hã́-veere yan lée hã́-fé.

Á yìa fó a hã́a na ɓàn báa día wo á yan mún lé o hã́-fé.»

O nàfòró ɓànso là a Lazaare wàhiire

19 Bṹn mɔ́n ó o Yeesu pá bĩnía bía bìo kà:

«Nùpue ɓúi hĩ́a wi bĩ́n á nàfòró wi á wee zĩ́ hã sĩ̀-sení na yàwá here.

Wizooní ɓúenɓúen lée sã́nú díró o cɔ̃́n.

20 Nì-khenii ɓúi na yèni ɓa le Lazaare,

na sãnía ɓúenɓúen vó lè hã dokuaa á hĩ́a wee ɓuee da a nàfòró ɓànso mu khũuhũ.

21 O sĩi yàá wee wé vá a nìi mu dĩ́nló na wee kùenka lii kúia yi lè ho díró.

À bè bṹn wán,

á ɓa booní wee wé ɓuee dɛnka a dokuaa.

22 Wizonle ɓúi ó o nì-khenii mu húrun,

á le Dónbeenì wáayi tonkarowà ɓueé lií lá a yòó bàrá a *Abarahaamu nìsã́ní.

Bṹn mɔ́n ó o nàfòró ɓànso mún húrun á ɓa nùuna.

23 Bìo ó o wi ho nì-hɔ̃́nbó-lóhó yi,

ó o lò wee be dàkhĩína.

Ó o hóonía mí yahó le mí ì loń,

ó o khɛ̀ra mɔn o Abarahaamu ò o Lazaare kará a nìsã́ní.

24 «Ó o von wo pɔ̃́npɔ̃́n:

‹Wàn ɓùaa Abarahaamu,

loń ĩ màkárí yi à ũ tonka a Lazaare le o dé mí nín-kíza ɲúhṹ mu ɲumu yi,

à ɓuee wɛɛ́ lè ĩ dɛnle,

lé bìo á ĩ lò ɓɛ̀ntĩ́n wee be ho dɔ̃hṹ na kà yi dàkhĩína.›

25 Ká a Abarahaamu màhã́ bía nɔn wo yi:

‹Ĩ za,

le ũ yi,

bìo á ũ yìo fù lua á ũ yú mu bè-sení cɛ̀rɛ̀ɛ á wɛɛ́ra lè ũ sĩi,

ò o Lazaare bìo wó hã yinyio.

Ho zuia á wón yú mí lònbee cũ̀nú à ũnɛ́n ɓɛ̀n yú le lònbee.

26 Bṹn pá níi ló,

á ho kã-be-beenì wi warɛ́n làa mia pã̀ahṹ,

bèra a na ká bìa le mí ì lé hen á à khí mí cɔ̃́n à ɓa yí dàń mu.

Á nùpue mún yí dà máa lé hen na á ũ khíi wi yi máa ɓuen wa cɔ̃́n.›

27 «Ó o nàfòró ɓànso bía nɔn wo yi:

‹Ĩ pá à bĩní ì fìo fo.

Sábéré à ũ tonka a Lazaare mu ò o lii wàn maá zĩi.

28 Wàn zàwa nùwã hònú lií wi bĩ́n,

ò o lii ɲì ɓa zeǹ wán à bán wã́a yí ɓuee zo le lònbe-beenì na kà lahó yi.›

29 Ó o Abarahaamu bía nɔn wo yi:

‹O *Mɔyiize làndá lè le *Dónbeenì ɲi-cúa fɛɛrowà bíoní wi bĩ́n,

le mìn zàwa mu wé ɲí hɔ̃́n.›

30 Ó o nàfòró ɓànso bía:

‹Wàn ɓùaa Abarahaamu,

bṹn pá máa yí ɓa.

Hen ká bìa húrun nì-kéní ɓúi lá ló lion ɓa cɔ̃́n á ɓa à yèrèmá wárá.›

31 Ká a Abarahaamu màhã́ bía nɔn wo yi:

‹Ká ɓa yí máa ɲí a Mɔyiize lè le Dónbeenì ɲi-cúa fɛɛrowà cɔ̃́n,

á hàrí à nì-hío ɓúi vèe,

á ɓa pá máa tà.›»