O Yeesu vèeró
16
Bìo ho *Sabaa khĩína,
ó o Makadala Mari là a Zaaki ɓàn nu Mari là a Salomɛɛ á yà ho ɲiló na sãmu sĩ le mí vaá khìi làa Yeesu sãnía.
2 Ho dimaasi zoǹ yìnbíi bùirìi,
le wii hàró pã̀ahṹ,
á ɓa hĩ́nɔn wà ɲɔn le búure.
3 Ɓa wee bío mín yi:
«Lé wée yàá vaá bĩ̀iní le hue-beenì na pon le búure ɲii á à na wɛn coon?»
4 Ká bìo ɓa vaá dɔ̃n,
á ɓa le mí ì loń,
à le hue-be-beenì bĩ̀inía ló le búure ɲii á khíi día le nìsã́ní.
5 Á ɓa wà vaá zon le yi,
á zoó mɔn yàrónza ɓúi ò o kará lè le nín-tĩánì,
á zã́ ho báká poni na túee.
Á ɓa zã́na.
6 Ká a yàrónza mu màhã́ bía nɔn ɓa yi:
«Mi yí zɔ̃́n.
Ĩ zũ le lé o Nazarɛɛte nìi Yeesu na ɓa ɓúaa ho *kùrùwá wán á mi wee cà.
O mía hen,
o vèera.
Mi loń.
Lé ho lahó na kà á ɓa lá bàrá a yi.
7 Mi lɛ́n vaa bío mu na a Piɛre là a Yeesu mu nì-kenínia na ká yi le o dú ɓa yahó van ho Kalilee kɔ̃hṹ.
Lé bĩ́n ɓa vaá mi a yi làa bìo ó o bíaráa mu.»
8 Á ɓa yilera lùnkaa,
á ɓa wee zà.
Á ɓa ló á lée lùwa wà.
Ɓa yí bía dɛ̀ɛ yí nɔn nùpue yi lé bìo ɓa zã́na.
O Yeesu zéenía míten lè mí nì-kenínia
9 [O Yeesu vèeró mɔ́n ho dimaasi zoǹ yìnbíi á mu nín-yání,
ó o zéenía míten là a Makadala Mari,
wón na ó o hĩ́a ɲɔn ɓa cĩ́náwa bùaa hèɲun léra yi.
10 Ó o Mari wà van bìa là a Yeesu lá páanía wi cɔ̃́n,
á vaá yú ɓa à ɓa yara sò á wee wá,
ó o bía làa ba le mí mɔn o Yeesu.
11 Ká bìo ɓa ɲá bìo ó o Mari bía le o Yeesu vèera,
ó o mún mɔn wo,
á ɓa yí tà mu.
12 Bṹn mɔ́n ó o Yeesu zéenía míten làa sìí veere lè mí nì-kenínia nùwã ɲun ká ɓa ɲɔn hã mana.
13 Á ɓa bĩnía ɓueé bía mu lè ɓa nì-kenínia na ká á bán mún yí tà mu yi.
14 Mu ɓàn mɔ́n,
ó o Yeesu zéenía míten lè ɓa nì-kenínia pírú dòn ká ɓa wee dí.
O zá làa ba bìo ɓa yí dó mí sĩa wo yi,
làa bìo ɓa tun mí yiwa á yí tà bìa bía le mí mɔn wo ò o vèera bìo.
15 Ó o wã́a bía nɔn ɓa yi:
«Mi lɛ́n va ho dĩ́míɲá lùa ɓúenɓúen yi à vaa bue le Dónbeenì bín-tente na ɓa nùpua ɓúenɓúen yi.
16 Yìa á à dé mí sĩi le yi,
á ɓa à bátízé,
wón á à fen.
Ká yìa yí dó mí sĩi le yi,
wón ɲúhṹ á à sí.
17 Bìa dó mí sĩa le yi wé è wé mu yéréké bìowa na wee zéení le Dónbeenì pànká:
Ɓa à ɲa ɓa cĩ́náwa á à lén bìa ɓa wi yi lè ĩ yèni;
ɓa a bío hã sìí-viò bíoní;
18 yìa wé ɓuan háa yi,
tàá ká a ɲun bè-ɲunii ɓúi na dà a ɓúe nùpue,
á dɛ̀ɛ woon máa wé ɓànso;
ɓa à bè mí níní ɓa vánvárowà wán á bán á à wa.»
19 Bìo ó o bía bṹn vó,
ó o Ɲúhṹso Yeesu ɓuan yòora ho wáayi á yòó kará le Dónbeenì nín-tĩánì.
20 Á ɓa nì-kenínia wà vaá wee bue le bín-tente hã lùa ɓúenɓúen yi.
O Ɲúhṹso wee séení ɓa,
á ɓa wee wé mu yéréké bìowa na wee zéení le Dónbeenì pànká à zéení le bìo ɓa wee bío á lée tũ̀iá poni.]