Laaga saanhɩnarɔ
16
Mɔɔ leer gʊta ma an a to Wosocɛ bɩ zeezi,
an n'a hɩm malɛɛka saanhɩnarɔ wɔɔ m,
a ʊ:
«K'a ta,
a Woso nɔmaa k'a nɩ laaga saanhɩnarɔ wɔɔ ʊ rɔ wɔɔ lo tara burə ʊ!»
2 Lɛɛkarɛ malɛɛka bɩ n ta,
an aa a laaga hɔ bɩ lo tara burə ʊ.
Nyim bʊnyaa k'a nɩ busum gʊta y'a da gʊɔɔ kʊ ŋ nɩ hɔturma bɩ makra m,
ŋn'a bɔkʊrɛ bɩ daŋ ʊ rɔ wɔɔ ʊ.
3 Malɛɛka hɩɩya hɔ bɩ n a laaga hɔ bɩ lo higʊta burə ʊ.
Hi bɩ n a ba am gər ma hɔ bɩ m.
Hɔɔmɩsɩɩrɔ kʊ ŋ nɩ hi bɩ nɔ ʊ rɔ wɔɔ n gɩnga.
4 Malɛɛka kaakʊ hɔ bɩ n a laaga hɔ bɩ lo kɔyaarɔ ʊ,
himinyaarɔ kɩ ʊ,
ŋn'a ba ma.
5 Mɔɔ malɛɛka k'a so hi ʊ bɩ leer ma,
an n'a hɩrɛ,
a ʊ:
«Ɩbɩɩ k'ɩ n ta ʊ,
ɩ nyɩnta ʊ bɩ,
ɩbɩɩ tɩrga.
Ɩbɩɩ mɩŋŋa,
bala,
ɩbɩɩ ɩ dʊdɔ ka kan tɩrgabaa kɩ.
6 Kʊ ŋ y'a ka wosogʊɔɔ ma n bra kan ɩ lɛsinnɩsorazannɔ hɔ kɩ bɩ,
kɛɛrɛ bɩ,
ɩbɩɩ ma ka ŋ ʊ kʊ ŋ n'a mi sɔ,
naa ŋ y'a ga m.»
7 Mɔɔ ma mannɩjaa bɩ n'a hɩrɛ,
a ʊ:
«Sɩra m,
Zuuba Woso paŋŋa k'a jire ba ʊ zaa,
ɩbɩɩ dʊdɔkarɛrɔ wɔɔ sɩra m,
bɩ ŋ tɩrga sɔ.»
8 Malɛɛka si hɔ bɩ n a laaga hɔ bɩ lo wosogure burə ʊ.
N n paŋŋa ka ʊ k'a sɛ n gʊɔɔ bɩ.
9 Fɩnfɩr gandaara n na gʊɔɔ wɔɔ ma.
Ŋ n Woso k'a so kʊsɩrɔ nɔɔn duro ʊ bɩ sʊnsɔ wʊ.
Ŋ lɛ baa k'a bɔ a taam,
k'a a lɛ bɔ Woso ʊ y.
10 Malɛɛka soor hɔ bɩ n a laaga hɔ bɩ lo hɔturma bɩ cirbəəduu bɩ ra.
A cirbəə bɩncɛ bɩ n a ba monsigə bimm….
Gʊɔɔ n'a nɛɛm sʊm fɩryɩrɛ nɔ ʊ.
11 Ŋ n arzana Woso bɩ sʊnsɔ wʊ,
ŋ fɩryɩrɛ kan ŋ nyinno wɔɔ kɩ minto,
bɩ ŋ heer n a lʊr a zibəə bʊnyaarɔ wɔɔ minto y.
12 Malɛɛka sɔrdɩ hɔ bɩ n a laaga hɔ bɩ lo Efratɩ kɔ gʊta b'ʊ.
Hi bɩ n gaan k'a zaa to cinno kʊ ŋ n'a tom dɔjɩr ʊ rɔ wɔɔ cenle minto.
13 Bɩ jɛ ʊ bɩ,
mɔɔ zinəro yɩ kaakʊ,
ŋnɩ bɔ kʊ ʊ kan ŋʊɩɩkannɔ kɩ,
ŋnɩ bɔ mɩnda bɩ lɛ ʊ kan hɔturma bɩ lɛ kɩ,
ŋʊaarlɛsinnɩsorazaa lɛ kɩ.
14 Zinəro wɔɔ duro nɩ hoserlo barɛ.
Ta ŋ nawʊm durnya haay cinno wɔɔ zi k'a yaa ŋ so kʊ ma yar k'a nɩ nyɩntaŋ ʊ Woso paŋŋa k'a jire ba ʊ zaa dɔmɩm gʊta hinni ʊ bɩ tɔ ma.
15 «Ba n na:
Zɛ mɔɔ nawʊrɛ,
am koor hɔ bɩ m.
Mimbirenyɩntazaa m gʊaa k'a nɩ dɔrɛ a huuro ma,
a n a zu a ʊ y,
a yaa ta dɩgɩ,
a a nyannɩ hɩnka bɩ m.»
16 Zinəro wɔɔ cinno wɔɔ so kʊ ma bɩncɛ kʊ n n'a birm *ebree lemim m Armagedɔn b'ʊ.
17 Malɛɛka saanhɩna hɔ bɩ n a laaga hɔ bɩ lo hɩnhɛr nɔ ʊ.
Leer paŋŋazaa n a to cirbəəduu bɩ zeezi Wosocɛ ʊ b'ʊ,
an n'a hɩrɛ,
a ʊ:
«A ba an nya!»
18 Kɛɛrɛ bɩ,
bramanyakɩrɔ,
leerlo kan bramahəənsirero kɩ,
taranyiŋŋəre paŋŋazaa kɩ nyɩnta ʊ.
Hɔ kʊ gʊaa bʊr durnya ʊ,
taranyiŋŋəre naa do lɔɔ n nyɩnta ʊ cɩna y.
19 Kʊnɔ gʊta bɩ n a zɛ kumbir lɛ kaakʊ,
tararɔ kʊnɔrɔ n wurgə.
Woso *Babɩlɔnnɩ gʊta bɩ tɔ da a nɔ ʊ,
k'a nɔmaa dɩvɛn laaga k'a nɩ hirm bɩ kɩnka ma.
20 Kʊrɔ kʊ hi bɩr ŋ ma rɔ wɔɔ haay n nyaam,
n n a ya,
n n ciro yɩ sɔ y.
21 Lajaa gandaarɔ ŋ cilo n a zɔ busi-busi ma n a to brama,
ŋnɩ b'a da gʊɔɔ wɔɔ ra.
Gʊɔɔ wɔɔ n Woso sʊnsɔ wʊ,
kʊsɩ lajaa k'a nyɔɔ bɩ minto,
bala,
kʊsɩ m,
a paŋŋa n ta ʊ gʊta.