Sinnyɛɛm kan gʊɔɔ kʊ ŋ bʊmbɔrɛ yɩ rɔ kɩ
14
Bɩ,
mɔɔ m ya,
m dɩga,
m sinnyɛɛm bɩ yɩ,
an jɩm *Siyɔn ci bɩ burə ʊ,
gʊaa tisi-tisi zɔrɔ busi a yaa siro kʊ ŋ y'a tɔ kan a zɩ tɔ kɩ gʊrsɩra ba ŋ tusə ma rɔ wɔɔ nɩ kan kɩ.
2 Mɔɔ leer ma,
an a to brama an bɔ kʊ ʊ kan higʊtɔɔ susur bɩncɛ kɩ,
an bɔ kʊ ʊ kan bramahəənsire paŋŋazaa kɩ.
Bɩ,
leer kʊ mɔɔ ma bɩ,
bɔ a kʊ ʊ kan kɔnnɩ zenno kʊ ŋ n'a kɔnnɩ zɛm nɔ laa leer kɩ.
3 Ŋ n'ɩ laa daa lɔrɛ cirbəəduu kan hɔɔmɩsɩɩrɔ siro wɔɔ kɩ,
gʊɔɔgusinno wɔɔ kɩ taa.
Bɩ gʊaa ba ʊ,
an b'a dam ma an laa bɩ do dɩnda kʊ gʊaa tisi-tisi zɔrɔ busi a yaa siro kʊ ŋ bʊmbɔrɛ yɩ tara burə ʊ rɔ wɔɔ bɛɛ y.
4 Gʊɔɔ m,
ŋ n a mɩŋŋɔɔ zar kan lannɔ kɩ y,
ŋ n dintim zi ba kan lannɔ kɩ y.
Zu ŋ nawʊm kʊ ʊ kan sinnyɛɛm bɩ kɩ bɩncɛ haay k'a nɩ taŋ ʊ b'ʊ.
Ŋ bʊmbɔrɛ yɩ gʊɔɔ bire ʊ,
ŋnɩ lɛɛkarɛ gʊɔɔ,
n nɩ ŋ ka Woso ʊ kan sinnyɛɛm bɩ kɩ ʊ.
5 Ŋʊaar n nyɩnta ŋ lɛ ʊ y,
bala,
kʊrɔma ba ŋ gʊr zi y.
Malɛɛka kaakʊrɔ lemim
6 Mɔɔ malɛɛka vanta yɩ an wer brama yaa ʊ,
an nɩ lemim nyɩnta k'a nyarɛ ba ʊ bɩ m,
k'a pa da gʊɔɔ kʊ ŋ nɩ tara burə ʊ rɔ wɔɔ m,
tara y'a hʊnhɔ kɩ,
do y'a hʊnhɔ kɩ,
lemim y'a hʊnhɔ kɩ,
kʊ y'a hʊnhɔ kɩ m.
7 A n n'a hɩm leer paŋŋazaa m,
a ʊ:
«K'a nyi ba Woso m,
k'a a lɛ bɔ ʊ,
bala,
a dʊdɔkarɛ wakatɩ a ku.
K'a bɔ ɩ brama da kan tara kɩ,
higʊta kan himinyaarɔ kɩ bɩ da ʊ!»
8 Malɛɛka vanta n zu lɛɛkarɛzaa bɩ jɛ ʊ,
an n'a hɩrɛ,
a ʊ:
«A a da!
A a da!
*Babɩlɔnnɩ kʊ gʊta b'a da!
A y'a ka tararɔ haay n a jaandarɛ bʊnyaabaa dɩvɛn bɩ mi!»
9 Malɛɛka kaakʊ hɔ n zu malɛɛka hɩɩyɔɔ wɔɔ jɛ ʊ,
an n'a hɩrɛ kan leer paŋŋazaa kɩ,
a ʊ:
«Kʊ gʊaa hɔturma bɩ bɔkʊrɛ bɩ da ʊ kan a mɩŋŋa kɩ,
k'a a makra bɩ yɩ a tusə ma gɛɛ a wɔ ma,
10 a zaa Woso nɔmaa dɩvɛn bɩ mire.
A heerbusu dɩvɛn paan…,
dɩvɛn k'a a tɔ nɔmaa laaga ʊ bɩ,
a bɩ mim sɔ.
B'a fɩryɩrɛ dɔm sɛ ʊ kan kidibir sɛ kɩ malɛɛkarɔ mɩŋŋɔɔ wɔɔ kan sinnyɛɛm bɩ kɩ mɩm ʊ.
11 Ŋ fɩryɩrɛ sɛ siŋŋə bɩ derm dɔɔraa k'a nyarɛ ba ʊ nɔ ʊ.
Bɩ,
gʊɔɔ kʊ ŋ hɔturma bɩ da ʊ kan a bɔkʊrɛ bɩ kɩ,
ŋnɩ yɛ a tɔ makra ma rɔ wɔɔ bɩ mɛnyɔɔ yɩm sinuu ʊ kan a gunuu ʊ kɩ y.»
12 Gʊɔɔ kʊ ŋ nɩ zum Woso lɛrɔ ʊ,
ŋnɩ sɩra ka Yeezuu ʊ rɔ wɔɔ tʊntɔʊrɛ dɔmɩm m naa.
13 Mɔɔ leer ma brama,
an n'a hɩrɛ,
a ʊ:
naa gʊrsɩra ba:
«Mimbirenyɩntazannɔ m gʊɔɔ kʊ ŋ gɩnga Zuuba zaa zuure nɔ ʊ rɔ wɔɔ m dɩɩtaa.»
«Sɛnt-Ɛspri a hɩ,
a ʊ:
sɩra m,
kʊ ŋ n a kɔrɛ mɛnyɔɔ da.
Bala,
ŋ zibəəro mɩŋŋɔɔ wɔɔ ɩ zure ŋ jɛ ʊ.»
Hɔdarɛ durnya ʊ
14 Mɔɔ m ya,
m warkʊ yɩ fu.
Warkʊ bɩ burə ʊ bɩ,
gʊaa nɩ nyɩntam,
an bɔ kʊ ʊ kan gʊaa nyɩ kɩ.
Sarma firgə n'a mim ma,
gore lɛzaa n'a wɔ ʊ.
15 Bɩ jɛ ʊ bɩ,
malɛɛka vanta n bɔ Wosocɛ ʊ b'ʊ,
an a leer busu,
an a hɩ gʊaa k'a nɩ nyɩntam warkʊ burə ʊ bɩ m,
a ʊ:
«Ɩ gore bɩ sa,
ɩ hɔ dam,
bala,
hɔdarɛ dɔmɩm y'a ku.
Bala,
hɔ ma tara burə ʊ.»
16 Gʊaa k'a nɩ warkʊ burə ʊ bɩ n a gore bɩ sa,
an a nyɔɔ tara burə ʊ,
an hɔ k'a nɩ tara burə ʊ bɩ da.
17 Mɔɔ m ya,
m malɛɛka deem yɩ,
an bɔ Wosocɛ ʊ arzana ʊ.
Guere lɛzaa n'a wɔ ʊ sɔ.
18 Malɛɛka vanta n a ya,
an bɔ mannɩjaa bɩ bɩncɛ ʊ.
A paŋŋa n bʊr sɛ ra.
A n a leer busu kan paŋŋa kɩ an a hɩ malɛɛka k'a nɩ gore lɛzaa bɩ m,
a ʊ:
«Ɩ gore lɛzaa bɩ nyɔɔ,
ɩ tara burə dɩvɛn gɔ bɩ nyɩ bɩ nɔ m.
Bala,
a nyɩ bɩ ma.»
19 Malɛɛka bɩ n a gore bɩ sa,
an a nyɔɔ tara burə ʊ,
an tara burə dɩvɛn gɔ nyɩ bɩ nɔ m,
an a nyɔɔ an a zar Woso nɔmaa mɔr gʊta ʊ.
20 N n tʊntɔ ra mɔr gʊta b'ʊ kʊ bɩ toore ma.
Ma n bɔ an der an b'a dam ma an sisi mom an a sarbɩr ku,
an bra,
an yar an a zɔ cilo zɔɔhɩra bunɛɛhʊ ma.