Hɔɔturmɔɔ hɩɩyɔɔ
13
Kɛɛrɛ bɩ,
mɔɔ hɔturma yɩ an wuti an nɩ bɔm higʊta b'ʊ.
A mɩnnɔ bu,
a mim saanhɩna.
A mɩnnɔ wɔɔ,
firgəro bu nɩ ŋ la.
A minno wɔɔ ra bɩ,
Woso sʊnsɔ tɔ n ta ŋ ma.
2 Hɔturma kʊ mɔɔ yɩ bɩ,
bɔ a kʊ ʊ kan bɔnla kɩ.
A gannɔ n bɔ kʊ ʊ kan *ursi gannɔ kɩ,
a lɛ n bɔ kʊ ʊ kan poozaa hɔ kɩ,
mɩnda bɩ n a paŋŋa ka ʊ kan a cirbəə kɩ,
lɛ gʊta kɩ.
3 A minno wɔɔ deem nɩ yɩrɛ ɩ ʊ,
a sakʊ n y'a ʊ,
k'an ga,
b'a sakʊrɛ maam-maam bɩ nyim bɩ nya.
Durnya haay n a lɛ bɔ ʊ,
ŋnɩ zu a jɛ ʊ.
4 Ŋ n mɩnda bɩ da ʊ,
bala,
a ɩ paŋŋa ka hɔturma b'ʊ,
ŋn'a da ʊ,
ŋ ʊ:
«Nka n'a makra bam kan hɔturma bɩ kɩ?
Nka y'a da ma,
an zoo ba kan kɩ?»
5 N n a da meerbaa ma k'an a lɛ bɔ a ʊ,
k'an Woso sʊnsɔ wʊ.
N lɛ ka ʊ k'an zi ba mom busi a yaa hɩɩya.
6 A n a lɛ gʊ,
an nɩ Woso sʊnsɔ wʊrɛ an n'a tɔ kan a har bɩ kɩ sʊnsɔ wʊrɛ,
kan gʊɔɔ kʊ ŋ nɩ arzana ʊ rɔ wɔɔ kɩ.
7 N lɛ ka ʊ k'an yar ba kan wosogʊɔɔ wɔɔ kɩ,
k'an bʊr ŋ la.
N paŋŋa ka ʊ do y'a hʊnhɔ,
kʊ y'a hʊnhɔ,
lemim y'a hʊnhɔ kan tara y'a hʊnhɔ kɩ burə ʊ.
8 Kʊ durnya gʊɔɔ haay n a da ʊ kan gʊɔɔ niŋŋoo kʊ ŋ n ŋ tɔ gʊrsɩra ba sinnyɛɛm kʊ n y'a zɛ bɩ mɩsɩrbaa ci b'ʊ hal durnya sɩŋŋɩda ma rɔ wɔɔ kɩ.
9 «Gʊaa k'a lɛ n taa bɩ k'an a ma!
10 Kʊ n y'a cɩnta kʊ gʊaa m ta lɔmbaa ʊ,
ta an nawʊm lɔmbaa ʊ.
Kʊ n y'a cɩnta kʊ kargʊ n gʊaa zɛ,
kargʊ n n'a zɛm.
Wosogʊɔɔ tʊntɔʊrɛ wakatɩ m naa kan ŋ sɩrakarɛ kɩ.»
11 Mɔɔ m ya,
m hɔturma vanta yɩ,
an nɩ bɔm tara ʊ.
A mɩnnɔ hɩɩya,
an bɔ kʊ ʊ kan sinnyɛɛm mɩnnɔ kɩ.
A n nɩ meer barɛ am mɩnda bɩ hɔ bɩ m.
12 A n nɩ lɛɛkarɛ hɔturma bɩ paŋŋa m haay,
an nɩ zi bam lɛɛkarɛ hɔturma bɩ mɩm m.
A n a ka durnya kan gʊɔɔ kʊ ŋ nɩ durnya nɔ ʊ rɔ wɔɔ kɩ nɩ lɛɛkarɛ hɔturma kʊ n y'a sakʊ maam-maam,
a nyi m n nya bɩ daŋ ʊ.
13 A ɩ makrarɔ gʊta bam.
A a ka sɛ n'a tom brama sɔ an nɩ zerm tara burə ʊ,
gʊaa haay mɩm ʊ.
14 Bra an n'a bam tara burə gʊɔɔ m kan makrarɔ gʊtɔɔ kʊ n yɩ ŋ ka ʊ k'a nɩ ŋ ba lɛɛkarɛ hɔturma bɩ mɩm ʊ rɔ wɔɔ kɩ.
A a hɩ durnyazannɔ wɔɔ m,
a ʊ,
ŋnɩ hɔturma kʊ n y'a sakʊ kargʊ m,
a nyim n nyɔɔ bɩ bɔkʊrɛ ba.
15 N paŋŋa ka hɔturma hɩɩya hɔ b'ʊ k'an meeyaa ka hɔturma bɩ bɔkʊrɛ b'ʊ,
k'a n'a da ma an meer ba sɔ.
Gʊaa haay k'a bɩr hɔturma bɩ bɔkʊrɛ bɩ daŋ ʊ bɩ,
k'an a ka kʊ ŋ nɩ ŋ zɩnzɛ.
16 Hɔturma b'ɩ paŋŋa bam gʊɔɔ ma,
gʊɔɔ poorero gɛɛ gʊɔɔ gʊtɔɔ,
arzakazannɔ gɛɛ ŋʊazannɔ,
soamɩŋŋaʊzannɔ gɛɛ lɔnnɔ,
an nɩ gʊrsɩra barɛ ŋ bɩsɩ wɔ ma gɛɛ ŋ tusə ma.
17 Gʊaa b'a dam ma an hɔ hɛɛ gɛɛ an hɔ si k'a ba hɔturma bɩ makra m,
a tɔ gɛɛ a tɔ bɩ lɛsarɛnyɩ m a mɛ ma y.
18 Mindɔrɛ bɩncɛ n naa:
Bala,
gʊaa k'a hɔɔn ta ʊ k'an lɛsarɛnyɩ kʊ hɔturma bɩ n ta m bɩ jɩ hɩ.
Gʊaa makra m lɛsarɛnyɩ bɩ m.
Lɛsarɛnyɩ bɩ zɔrsɔddɩ busɔrdɩ yaa sɔrdɩ.