Lɛɛkarɛ kʊsɩrɛrɔ sɔrdɩrɔ wɔɔ hʊnhʊrlɛ
6
Kʊ sinnyɛɛm bɩ lɛɛkarɛ kʊsɩrɛ bɩ hʊr saanhɩnarɔ wɔɔ bar la bɩ,
mɔɔ yɩ,
m a ma hɔɔmɩsɩɩrɔ siro wɔɔ lɛɛkarɛzaa bɩ həən si bramahəənsire m,
a ʊ:
«Bʊr!»
2 Bɩ,
mɔɔ sisi fu yɩ.
Gʊaa k'a da ʊ bɩ n sa nyasʊ a wɔ ʊ.
N n cirbəə firgə ka ʊ,
an ta k'a yaa yar ba,
a ɩ dama m,
b'a dama yɩm.
3 K'a kʊsɩrɛ hɩɩya hɔ bɩ hʊr bɩ,
mɔɔ ma hɔmɩsɩr hɩɩya hɔ bɩ n həən si,
a ʊ:
«Bʊr!»
4 Sisi vanta n a hɩnka piin…:
N lɛ ka gʊaa k'a da ʊ b'ʊ k'an laafɩɩ bɔ durnya ʊ kʊ gʊɔɔ n bɩr kʊ zɩnzɛm,
n kargʊ jintə ka ʊ sɔ.
5 K'a kʊsɩrɛ kaakʊ hɔ bɩ hʊr bɩ,
mɔɔ ma,
hɔmɩsɩr kaakʊ hɔ bɩ həən si,
a ʊ:
«Bʊr!»
Bɩ,
mɔɔ sisi kundə yɩ.
Gʊaa k'a da ʊ bɩ nɩ hɔ kʊ n nɩ mɔr gore makra bam nɩ bɩ n'a wɔ ʊ.
6 Bɩ,
mɔɔ hɔ niŋŋə ma an bɔ kʊ ʊ kan leer kɩ hɔɔmɩsɩɩrɔ siro wɔɔ bire ʊ,
an n'a hɩrɛ,
a ʊ:
«Yɩryaa makra ba deem,
hindeem zibəə busoo ma,
naanyaa makra kaakʊ,
hindeem zibəə busoo ma.
K'a gɔɔta nyɔɔ bɩ ma kan dɩvɛn bɩ kɩ,
ɩ b'ɩ wɔ da ma y.»
7 K'a kʊsɩrɛ si hɔ bɩ hʊr bɩ,
mɔɔ ma hɔmɩsɩr si hɔ bɩ m həən si,
a ʊ:
«Bʊr!»
8 Bɩ,
mɔɔ sisi vɔnnɩmɛzaa yɩ.
Gʊaa k'a da ʊ bɩ bir n nawʊm «zɛ» gəənokʊ n zu a jɛ ʊ.
Ŋ paŋŋa ka ŋ ʊ kʊ ŋ n'a so tara burə zɛkumbir si kər bɩ deem ʊ,
kʊ ŋ nɩ gʊɔɔ zɩnzɛ kargʊ m,
nɔ m,
yaaba bʊnyaa m kan poohɔɔ kɩ m.
9 K'a kʊsɩrɛ soor hɔ bɩ hʊr bɩ,
mɔɔ gʊɔɔ kʊ ŋ yɩ ŋ zɩnzɛ Woso lemim kan kasɛtɩ kʊ ŋ y'a ka bɩ minto rɔ wɔɔ nyiro yɩ,
mannɩduu bɩ lɛtaa.
10 Ŋ n'ɩ zee dam kan paŋŋa kɩ,
ŋ ʊ:
«Zuuba mɩŋŋa,
sɩrazaa,
ɩbɩɩ maasɩrɛ barɛ an ta an dɔmɩm kara ku k'ɩ bɔkarɛ ɩ dʊdɔ ka,
ɩ wɔɔ ma bɩ zɩm bɔ durnyazannɔ ma?»
11 N n huu fu ka ŋ gʊaa biyəə ʊ,
n n a hɩ ŋ nɩ,
kʊ ŋ n'a ya,
ŋnɩ bʊr a ma poore,
k'an ta,
an ŋ zibəəkɔɔnrɔ kan ŋ danyɩnɔ kʊ ŋ nɩ zɛm bɩ ŋ zɩnzɛ am ŋ hɔ bɩ m nɔ wɔɔ lɛzerle dɔmɩm ku.
12 Bɩ,
k'a kʊsɩrɛ sɔrdɩ hɔ bɩ hʊr bɩ,
mɔɔ taranyiŋŋəre gʊta yɩ.
Woso n a ba kundə ɩ ʊ pɛɛra kʊ n y'a ba hɔmɩsɩr ka kundə m,
mom bɩ jilli n a ba ɩ ʊ ma m.
13 Monyaarɔ n sur tara ʊ,
ɩ ʊ,
hɩnhɛr gandaara ɩ sɔɔn jɩngɩr sur.
14 Brama n a gʊr ɩ ʊ,
wʊtaa n y'a gʊr.
Ciro haay kan tararɔ kʊ ŋ nɩ hi bire ʊ rɔ wɔɔ kɩ n'a gaa a bɩncɛrɔ ʊ.
15 Tara burə cinno,
gʊɔɔ gʊtɔɔ,
yarbənno cinno,
arzakazannɔ kan paŋŋazannɔ kɩ,
lɔnnɔ kan soamɩŋŋaʊzannɔ kɩ,
ŋ haay,
a nyaakʊm dɩnda ciyaarɔ kan cigəəziro kɩ ʊ.
16 Ŋ n a hɩ ciro kan jaarɔ wɔɔ kɩ m,
ŋ ʊ:
«K'a dɩnda wɔɔ ra,
k'a wɔɔ nyaakʊm da laatʊ gʊaa k'a nɩ nyɩntam cirbəəduu burə ʊ bɩ meer ma,
kan sinnyɛɛm bɩ nɔmaa kɩ.
17 Bala,
ŋ nɔmaa dɔmɩm gʊta ɩ bʊr,
nka n n'a dam ma an bɔlɛ nɩ?»