Ci kan sinnyɛɛm kɩ
5
Mɔɔ ci yɩ gʊaa k'a nɩ nyɩntam duu bɩ ra bɩ bɩsɩ wɔ ʊ,
n n a gʊrsɩra ba a nɔ ʊ kan a burə kɩ,
n n a kʊsɩ kʊsɩrɛ saanhɩna m.
2 Mɔɔ malɛɛka paŋŋazaa yɩ,
an n'a hɩm kan paŋŋa kɩ,
a ʊ:
Nka y'a ga m,
an ci bɩ gʊ,
an a kʊsɩrɛrɔ wɔɔ cincer?
3 Bɩ gʊaa ba ʊ an nɩ brama gɛɛ,
tara burə ʊ gɛɛ,
tara noom ʊ,
an n'a dam ma,
an ci bɩ gʊ,
gɛɛ an dɩga a y.
4 Bɩ,
mɔɔ heer a zar kʊ n n gʊaa yɩ an a ga m an ci bɩ gʊ,
gɛɛ,
an dɩga a bɩ tɔ ma.
5 Gʊɔɔgusinno wɔɔ gʊaa deem n a hɩ mɔɔ m,
a ʊ:
Ɩ b'ɩ heer zar y.
Ba n nɩ,
Ziida do poozaa k'an Davɩd yaŋŋa bɩ,
k'a yɩ damazaa bɩ,
an nɩ ci bɩ gʊm kan a kʊsɩrɛrɔ saanhɩnarɔ wɔɔ kɩ.
6 Kɛɛrɛ bɩ,
mɔɔ sinnyɛɛm yɩ an jɩm,
ɩ ʊ,
a zɛ n y'a ʊ,
duu bɩ bire ʊ,
hɔɔmɩsɩɩrɔ wɔɔ kan gʊɔɔgusinno wɔɔ kɩ m bɩr ma.
A mɩnnɔ saanhɩna kan a mɩnyaarɔ kɩ saanhɩna,
ŋ mɩŋŋɔɔ n Woso ɛspri saanhɩnarɔ k'a ŋ nyɔɔ tara burə ʊ rɔ wɔɔ.
7 A a zɔ k'a ci bɩ si bɔ nɩ nyɩntam duu bɩ burə ʊ bɩ bɩsɩ wɔ ʊ.
8 K'a ci bɩ si bɩ,
hɔɔmɩsɩɩrɔ si rɔ wɔɔ kan gʊɔɔgusinno buhɩra yaa si rɔ wɔɔ kɩ kukurə zɛ sinnyɛɛm bɩ taa.
Gʊaa biyəə nɩ kɔnnɩ m kan sarma laagarɔ kɩ,
tidəər nyisi nɩ ŋ hɩnhan.
Wosogʊɔɔ yaadarɛ m.
9 Ŋ nɩ laa daa lɔrɛ,
ŋ ʊ:
«Ɩbɩɩ y'ɩ ga m ɩ ci bɩ si,
ɩ kʊsɩrɛrɔ wɔɔ cincer,
bala,
n y'ɩbɩɩ zɛ ɩbɩɩ n gʊɔɔ bʊmbɔ do haay nɔ ʊ,
lemim biyəə nɔ ʊ,
kʊrɔ y'a hʊnhɔ kɩ nɔ ʊ,
tara y'a hʊnhɔ ɩ ma bɩ m,
ɩ ŋ ka Woso ʊ.
10 Ɩbɩɩ ŋ ba cinno,
mannɩbənno wɔɔ Woso minto,
bɩ ŋ cirbəə bɩm tara burə ʊ.»
11 Mɔɔ dɩga,
m malɛɛkarɔ cir leer ma,
ŋ lɛ tisi-tisi kan tisi-tisi k'a lɛ ba ʊ y,
ŋnɩ bɩr duu bɩ ma kan hɔɔmɩsɩɩrɔ kɩ,
gʊɔɔgusinno kɩ.
12 Ŋ n a leer busu kan paŋŋa kɩ,
ŋn'a hɩrɛ,
ŋ ʊ:
«Sinnyɛɛm kʊ ŋ y'a zɛ b'a ga m an paŋŋa yɩ kan arzaka kɩ,
mindɔrɛ kɩ,
kan dama kɩ,
daʊrɛ kɩ,
cirbəə kɩ,
lɛbɔʊrɛ kɩ.»
13 Hɔɔdarɛ haay k'a nɩ brama,
an nɩ tara burə ʊ,
tara noom ʊ kan hi burə kɩ hɔɔmɩsɩɩrɔ haay kʊ ŋ nɩ ta ŋ ʊ rɔ wɔɔ,
mɔɔ ma ŋn'a hɩrɛ,
ŋ ʊ:
«Bɔ nɩ duu burə ʊ kan sinnyɛɛm bɩ kɩ m lɛbɔʊrɛ,
daʊrɛ,
cirbəə kan paŋŋa kɩ yɩ dɔɔraa k'a nyarɛ ba ʊ nɔ ʊ.»
14 Hɔɔmɩsɩɩrɔ siro wɔɔ n'a hɩrɛ,
ŋ ʊ:
«Amina!»
Gʊɔɔgusinno wɔɔ n kukurə zɛ,
ŋn'a daŋ ʊ.