Sɛnt-Ɛspri kan zinə k'a nɩ Krista jɩnnɔ ʊ bɩ kɩ
4
M gʊaasɩbɔɔ,
a bɩ sɩra ka gʊɔɔ haay kʊ ŋ ʊ,
a ɩ Sɛnt-Ɛspri m nɔ wɔɔ ʊ y.
K'a ŋ ka a lɛɛ a dɩga ŋ ma,
kʊ Sɛnt-Ɛspri ŋ nɩ ta m paan… gɛɛ hɔ vanta m gɛ.
Bala,
ŋʊaarlɛsinnɩsorazannɔ gʊta y'a kərgu durnya ra.
2 Hɔ niŋŋə k'a n'a karɛ awɔɔ m Sɛnt-Ɛspri bɩ dɔ bɩ ba n nɩ:
Gʊaa k'a bɔ a lɛ ma,
a ʊ,
Yeezuu Krista a ba gʊaa bɩ,
a ɩ Sɛnt-Ɛspri m.
3 Bɩ gʊaa haay k'a bɩr Yeezuu Krista kasɛtɩ karɛ ncɩnaaʊ bɩ,
bɩ zaa b'a Sɛnt-Ɛspri nɩ y.
Zinə k'a nɩ Krista jɩm nɔ ʊ bɩ m,
awɔɔ n a ma,
n n'a hɩrɛ n ʊ,
a ɩ zɛm bɩ.
B'a lee ku durnya nɔ ʊ kaka.
4 Awɔɔ kʊ Woso nyɩnɔ n'awɔɔ m bɩ,
m nyɩnɔ ŋʊarɛrɔ,
awɔɔ paŋŋa bʊr ŋʊaarlɛsinnɩsorazannɔ wɔɔ duro ra.
Bala,
Sɛnt-Ɛspri k'a nɩ kan awɔɔ kɩ bɩ paŋŋa lɛ da zinə k'a nɩ kan durnyazannɔ kɩ bɩ ra.
5 Durnyazannɔ n ŋ mɩ,
ŋn'ɩ durnya mim dɩndam,
durnya n'a tʊr karɛ ŋ ma.
6 Wɔɔ,
Woso gʊɔɔ m wɔɔ m.
Gʊaa k'a Woso dɔ bɩ,
a tʊr an n'a kam wɔɔ ma.
Gʊaa kʊ Woso gʊaa bɛɛ bɩ bɩr a tʊr kam wɔɔ ma y.
Bɩ,
wɔɔ nɩ Sɛnt-Ɛspri k'an sɩra bɩ dɔm ma kan zinə k'a nɩ Krista jɩm nɔ ʊ,
an nɩ ŋʊaar bam bɩ kɩ.
Ŋʊarɛ bɩ, a to a ʊ Woso zi
7 M gʊaasɩbɔɔ,
ʊ kʊ ŋʊa,
bala,
ŋʊarɛ bɩ,
a to a ʊ Woso zi.
Gʊaa niŋŋə haay k'a a mim ŋʊa Woso y'a yɩ,
a Woso dɔ.
8 Gʊaa k'a bɩr a mim ŋʊarɛ,
a n Woso dɔ y,
bala,
Woso bɩ ŋʊarɛzaa m.
9 Woso ŋʊarɛ k'a hɩnka wɔɔ bire ʊ bɩ ba n nɩ:
Woso a Nyɩ deem nyɔɔ durnya ʊ,
kʊ wɔɔ n mɩsɩrbaa ba a minto.
10 Ba a ŋʊarɛ bɩ n na:
Wɔɔ bɛɛ ɩ Woso ŋʊa y,
a ɩ wɔɔ ŋʊa.
A y'a Nyɩ nyɔɔ,
k'an bɩ nyɩnta mannɩhɔ wɔɔ mimbʊnyaarɔ minto.
11 M gʊaasɩbɔɔ,
kʊ Woso wɔɔ ŋʊa ncɩnaaʊ,
wɔɔ sɔ,
wɔɔ ʊ ga m,
ʊ kʊ ŋʊa.
12 Gɔsɩ n Woso yɩ cɩna y.
Kʊ wɔɔ kʊ ŋʊa,
Woso ɩ kan wɔɔ kɩ,
b'a ŋʊarɛ b'ɩ kan wɔɔ kɩ paan….
13 Sɛnt-Ɛspri k'a a ka wɔɔ ʊ bɩ minto,
wɔɔ dɔ wɔɔ ʊ,
wɔɔ ɩ kan kɩ,
an nɩ kan wɔɔ kɩ.
14 Bɩ wɔɔ yɩ,
wɔɔ n'a kasɛtɩ karɛ,
wɔɔ ʊ,
Woso a Nyɩ bɩ nyɔɔ k'an bɩ yɩ durnya bʊmbɔrɛzaa.
15 Gʊaa niŋŋə haay k'a bɔ a lɛ ma,
a ʊ,
Yeezuu Krista bɩ Woso Nyɩ nɩ,
Woso ɩ gɔɔtam kan kɩ,
an nɩ kan Woso kɩ.
16 Bɩ wɔɔ,
wɔɔ Woso ŋʊarɛ k'an ta m wɔɔ minto bɩ dɔ,
wɔɔ sɩra ka naa ʊ sɔ.
Woso bɩ,
ŋʊarɛzaa m.
Gʊaa k'a gɔɔta ŋʊarɛ nɔ ʊ,
a zaa ɩ gɔɔtam kan Woso kɩ,
Woso nɩ gɔɔtam kan kɩ.
17 Bɩ minto y'a ka,
ŋʊarɛ nɩ wɔɔ nɔ ʊ paan…,
wɔɔ n n'ʊ dam ma,
ʊ heerkoodəbaa yɩ dʊdɔkarɛ hinni ʊ.
Bala,
Yeezuu k'an hɔ niŋŋə bɩ,
wɔɔ maam sɔ durnya naa do nɔ ʊ.
18 Dabɔʊ ba ŋʊarɛ nɔ ʊ y.
Bɩ ŋʊarɛ paan… ɩ lam nyibəə ra.
Bala,
nyibəə ɩ kan booti fɩryɩrɛ kɩ.
Bɩ,
gʊaa k'a nɩ nyi barɛ,
ŋʊarɛ paan… b'a nɔ ʊ y.
19 Kʊ wɔɔ nɩ,
wɔɔ ɩ kʊ ŋʊam,
bala,
Woso ɩ lɛɛ ka an wɔɔ ŋʊa.
20 Kʊ gʊaa a hɩ a ʊ:
«Mɔɔ ɩ Woso ŋʊam»,
an bɔkarɛ,
an sɔ a danyɩ m,
ŋʊaarzaa m.
Sɩra m,
gʊaa k'a bɩr a danyɩ k'a n'a yɩm bɩ ŋʊarɛ,
a b'a dam ma,
an Woso k'a bɩr a yɩm bɩ ŋʊa y.
21 Ba lɛ kʊ Krista a ka wɔɔ ʊ bɩ n na:
Gʊaa k'a nɩ Woso ŋʊam,
k'an a danyɩ ŋʊa sɔ.