Woso nyɩnɔ
3
K'a dɩga ŋʊarɛ gʊta kʊ Woso a ka wɔɔ ʊ,
an nɩ wɔɔ birm a nyɩnɔ bɩ ma.
Bɩ,
sɩra m,
Woso nyɩnɔ m wɔɔ m.
Bɩ y'a ka,
durnya b'a dam ma,
an wɔɔ dɔ y.
Bala,
durnyazannɔ wɔɔ n Woso dɔ y.
2 M gʊaasɩbɔɔ,
naa ma kɛɛrɛ bɩ,
Woso nyɩnɔ m wɔɔ m.
Bɩ,
nyɩnta kʊ wɔɔ n nɩ zɛm b'a ʊ hɔ niŋŋə bɩ,
bɩ n a hɩnka cɩna y.
Wɔɔ dɔ wɔɔ ʊ,
k'a b'a hɩnka,
wɔɔ zɛm bɩ bɔ kʊ ʊ kan kɩ.
Bala,
k'a lɔ,
wɔɔ y'a yɩrɛ.
3 Gʊaa niŋŋə k'an ta taaheerlɛ naa do m Krista nɔ ʊ bɩ,
a ɩ dintim gʊrɛ a ma,
k'a yɩ mɩŋŋa amba Yeezuu m mɩŋŋa bɩ m.
4 Gʊaa niŋŋə haay k'a mimbʊnyaa ba,
kaanm a nawʊm Woso lɛ m,
bala,
mimbʊnyaa bɩ,
kaanm lɛ m m.
5 Awɔɔ dɔ a ʊ,
Yeezuu bʊr k'a bɩ mimbʊnyaarɔ gʊngʊ wɔɔ ma,
bɩ mimbʊnyaa ba ma y.
6 Gʊaa niŋŋə haay k'a gɔɔta kan kɩ,
a bɩr mimbʊnyaa bam dʊntɔ y.
Gʊaa niŋŋə haay k'a nɩ mimbʊnyaa bam,
a n a yɩ,
b'a n a dɔ sɔ y.
7 M nyɩnɔ ŋʊarɛrɔ,
k'a bɩ yɛ kʊ gɔsɩ n'awɔɔ nyʊnnyɔɔ y.
Gʊaa k'a nɩ tɩrgabaa zi bam bɩ tɩrga,
amba Yeezuu n tɩrga bɩ m.
8 Gʊaa k'a nɩ mimbʊnyaa bam,
Sʊtaana gʊaa m.
Bala,
mimbʊnyaabər m Sʊtaana m a sɩŋŋɩda ʊ.
Bɩ minto y'a ka Woso Nyɩ bɩ n bʊr k'a bɩ Sʊtaana zibəəro zaar ba.
9 Gʊaa niŋŋə haay kʊ Woso a yɩ bɩ bɩr mimbʊnyaa bam dʊntɔ y,
a mɩsɩrbaa hɔdo bɩ y'a nɔ ʊ,
a b'a dam ma,
an mimbʊnyaa ba dʊntɔ y,
bala Woso y'a yɩ.
10 Naa minto y'a ka n nɩ Woso nyɩnɔ dɔ,
n nɩ ŋ bɔ kʊ zi kan Sʊtaana hɔɔ kɩ.
Gʊaa k'a bɩr tɩrgabaa zi barɛ y,
b'a bɩr a danyɩ ŋʊam sɔ y,
Woso gʊaa bɛɛ y.
Muno ŋʊarɛ
11 Kʊ sɩra m,
lemim niŋŋə k'awɔɔ ma a sɩŋŋɩda ma bɩ n naa:
Ʊ kʊ ŋʊa.
12 A b'a ba am Kayɛn hɔ bɩ nɩ y,
kʊ *Bʊnyaabarɛzaa gʊaa m bɩ,
a a danyɩ zɛ gər.
Bɩ,
bɔ minto an a zɛ?
K'a zibəəro wɔɔ nyɩnta bʊnyaa,
a danyɩ bɩ zibəəro wɔɔ n nyɩnta tɩrga bɩ m.
13 Kʊ durnya sɔ awɔɔ m,
m danyɩnɔ,
a bɩ zɛ kədə y.
14 Wɔɔ dɔ wɔɔ ʊ,
bɔ wɔɔ ʊ zɛ nɔ ʊ,
ʊ bʊr mɩsɩrbaa nɔ ʊ,
kʊ wɔɔ ʊ danyɩnɔ ŋʊa bɩ minto.
Gʊaa k'a bɩr a danyɩ ŋʊam bɩ gɔɔta zɛ nɔ ʊ.
15 Gʊaa niŋŋə haay k'a sɔ a danyɩ m bɩ,
gərzer m.
B'awɔɔ dɔ a ʊ,
gərzer deem taan… ba mɩsɩrbaa k'a nyarɛ ba ʊ bɩ nɩ a zi y.
16 Hɔ k'a a ka wɔɔ n ŋʊarɛ k'an hɔ niŋŋə bɩ dɔ ba n nɩ:
Yeezuu a mɩsɩrbaa ka wɔɔ minto.
A a ga m sɔ,
wɔɔ n ʊ mɩsɩrbaa ka,
ʊ danyɩnɔ minto.
17 Kʊ gʊaa ɩ durnya naa do arzakarɔ m,
an a danyɩ yɩ cicir nɔ ʊ,
b'a n a da han y,
Woso ŋʊarɛ bɩ y'a bam lɔ k'a bɩr a zaa ʊ?
18 M nyɩnɔ ŋʊarɛrɔ,
ʊ bɩ ŋʊarɛ ba lɛmindɔ m kan meerbaa kɩ nɔ ʊ y.
Ʊ kʊ ŋʊa,
zibəə barɛ kan sɩra kɩ nɔ ʊ.
19 Naa minto,
wɔɔ y'a dɔrɛ ʊ ʊ,
ʊ ɩ sɩra nɔ ʊ,
bɩ wɔɔ heerkoodəbaa yɩm zi.
20 Bala,
kʊ wɔɔ heer ɩ mim kam wɔɔ ra,
Woso gʊtabaa lɛ da wɔɔ heer la,
a hɔ haay dɔ.
21 M gʊaasɩbɔɔ,
kʊ wɔɔ heer bɩr mim kam wɔɔ ra,
wɔɔ heer koodə Woso zi.
22 Kʊ wɔɔ hɔ yɛ han,
wɔɔ y'a yɩrɛ,
bala,
wɔɔ a lɛrɔ wɔɔ si,
ʊ nɩ hɔ k'a nɔ yɩ bɩ barɛ.
23 Ba a lɛ n na:
K'ʊ sɩra ka a Nyɩ Yeezuu Krista bɩ tɔ ʊ,
k'ʊ kʊ ŋʊa amba a lɛ ka wɔɔ ʊ bɩ m.
24 Gʊaa k'a n'a lɛrɔ wɔɔ sire,
a ɩ kan Woso kɩ,
Woso nɩ kan kɩ sɔ.
Wɔɔ dɔ wɔɔ ʊ,
a ɩ kan wɔɔ kɩ,
Sɛnt-Ɛspri k'a ka wɔɔ ʊ bɩ minto.