Ci lɛɛkarɛ hɔ kʊ
PƖYƐƐR
a ba
Pɩyɛɛr ɩ yaa dam kristagʊɔɔ m
1
Mɔɔ mɩŋŋa Pɩyɛɛr nɩ ci bɩ bam,
Yeezuu Krista zibəəzaa m mɔɔ m.
A ba mɔɔ nawʊm awɔɔ kʊ Woso a bɔ ʊ k'a yɩ a gʊɔɔ a hɩsɩga da,
a m saanɔɔ Pɔn kʊ ʊ kan Galasii kʊ kɩ ʊ,
Kapadɔs kʊ kɩ ʊ,
Azii kan Bitinii kʊrɔ kɩ ʊ rɔ wɔɔ ma.
2 Zɩ Woso y'awɔɔ bɔ ʊ,
amba a lɛɛ ka an a cɩnta a hɔɔnhɔ nɔ ʊ k'a ba bɩ tɔ ma,
a y'a so awɔɔ ʊ,
a Ɛspri k'a a ka awɔɔ ʊ bɩ tɔ ma,
k'awɔɔ n yɛ Yeezuu Krista ma,
k'a ma bɩ n'awɔɔ hu bɔ.
A yɛ mɔɔ nawʊm,
kʊ Woso n a barka,
kan a laafɩɩ kɩ ka awɔɔ ʊ gʊta.
Woso barka darɛ bʊmbɔrɛ bɩ tɔ ma
3 Ʊ ʊ lɛ bɔ Woso ʊ,
wɔɔ Zuuba Yeezuu Krista Zɩ bɩ,
bala,
a cicirzɛrɛ gʊta bɩ nɔ ʊ,
a a ka wɔɔ n yɩrɛdaa yɩ,
k'ʊ taaheerlɛ paan… yɩ,
Yeezuu Krista k'a a mɩm bɔ ʊ gəəno bire ʊ bɩ tɔ ma.
4 A ba a ʊ maam kʊ wɔɔ n hɔjirle k'a b'a dam ma an vɔn gɛɛ an dintim ka,
gɛɛ a paŋŋa n a bɔ ʊ yɩ,
hɔjirle bɩ do Woso a cɩnta awɔɔ m arzana ʊ.
5 Awɔɔ kʊ Woso paŋŋa nɩ dɔrɛ a ma sɩrakarɛ tɔ ma,
k'awɔɔ n bɩ bʊmbɔrɛ k'an b'a hɩnkam lɛɛm jɛ dɔmɩm ʊ bɩ yɩ.
6 Bɩ tɔ ma m,
awɔɔ n'a heer nyɔɔm gʊta,
baa kʊ pakra m k'awɔɔ n fɩr yɩ dɩɩtaa,
makrarɔ y'a hʊnhɔ kʊ ŋ n'awɔɔ heer zarm dɔmɩm poorero nɔɔn duro nɔ ʊ.
7 Fɩr bɩ yɩrɛ bɩ,
awɔɔ sɩrakarɛ makra an n'a bam,
kʊ sɩrakarɛ paan… m gɛ.
Awɔɔ sɩrakarɛ bɩ mɩŋŋabaa lɛ da sarma m,
hɔcenlezaa m bɩ,
an bɔkarɛ n tɩr a makra ba sɛ ʊ,
k'a mɩŋŋabaa dɔ.
Ncɩnaaʊ bɩ,
awɔɔ sɩrakarɛ bɩ makra jɛ ʊ,
awɔɔ lɛbɔʊrɛ kan cirbəə kɩ,
daʊrɛ kɩ yɩm dɔmɩm kʊ Yeezuu Krista n b'a hɩnkaŋ ʊ b'ʊ.
8 Awɔɔ ɩ Yeezuu Krista mɩŋŋa ŋʊam b'awɔɔ n a yɩ a mɩm nɩ y,
awɔɔ sɩra ka ʊ,
b'awɔɔ n a yɩ cɩna y.
Naa tɔ ma m,
awɔɔ n'a heer nyɔɔm heernyɔɔ gandaa ʊ m,
gɔsɩ b'a dam ma an heernyɔɔ gʊta bɩ do dɔ an a hɩ y.
9 K'awɔɔ nɩ zɛm b'a nyiro wɔɔ bʊmbɔrɛ yɩ bɩ,
bɩ y'a ka Woso ʊ awɔɔ n sɩra ka.
Hɔ kʊ Sɛnt-Ɛspri a ba Krista tɔ ma biisi
10 Wosolɛsinnɩsorazannɔ kʊ ŋ nyɩnta biisi ŋnɩ so Woso lɛ ra,
ŋnɩ barka kʊ Woso ʊ k'a ka awɔɔ ʊ bɩ mim hɩ bɩ,
ŋ bʊmbɔrɛ k'awɔɔ n nɩ zɛm b'a yɩ bɩ daasɩ ŋn'a a ka.
11 A ka ŋ y'a ʊ ma,
k'a minno kʊ Krista Ɛspri b'a hɩnka ŋ nɩ bɩ kʊyɩrɛ dɔmɩm kan ŋ zaarɔ kɩ dɔ,
bala,
Ɛspri bɩ do k'a nyɩnta kan ŋ kɩ bɩ lɛɛ ka an fɩryɩrɛrɔ kʊ Krista n'a yɩm bɩ mim hɩ,
kan lɛbɔʊrɛ k'a n'a yɩm,
fɩr bɩ yɩrɛ jɛ ʊ bɩ kɩ.
12 Bɩ,
Woso a hɩnka a lɛsinnɩsorazannɔ wɔɔ duro m,
a ʊ,
lemim k'a ka kʊ ŋ nɩ so ra bɩ,
a n a ka ŋ bɔɔm tɔ ma y,
awɔɔ hɔ m.
Lemim nyɩnta bɩ do padənno wɔɔ a hɩ awɔɔ m,
bɩ,
a pa ŋ y'a da awɔɔ m *Sɛnt-Ɛspri paŋŋa kʊ Woso a ka ŋ ʊ bɩ m.
Malɛɛkarɔ mɩŋŋɔɔ n lɛ taa k'a lemim bɩ do dɔ gʊta.
Mɩsɩrbaa zore barɛ mim
13 Naa tɔ ma bɩ,
k'a a banka,
k'a ta lɛɛ kan zibəə kɩ,
a b'a zu a ʊ y,
k'a barka kʊ Woso n'a karɛ awɔɔ ʊ Yeezuu Krista hɩnkarɛ ma bɩ ta a heer lɛ kɔɔkɔɔ.
14 Amba nyɩnɔ nɩ yɛrɛ a zɩrɔ ma bɩ,
k'a yɛ Woso ma,
a b'a ya a zu lɛtaamarɔ bʊnyaarɔ k'awɔɔ n ta ŋ nɩ biisi badɔ nɔ ʊ rɔ wɔɔ ʊ y.
15 Bɩ,
amba Woso k'awɔɔ bir bɩ n mɩŋŋa bɩ,
awɔɔ sɔ k'a bɩr mɩsɩrbaa mɩŋŋa bam a tarɛ haay nɔ ʊ.
16 Bala,
Woso a hɩ a ci b'ʊ,
a ʊ:
«K'a yɩ mɩŋŋa,
bala,
mɔɔ mɩŋŋa.»
17 Woso k'a nɩ gʊɔɔ dʊdɔ kam b'a bɩr ŋ jirə bɔm bɩ,
awɔɔ nɩ yaa dam nɩ a ʊ,
a Zɩ m,
gʊaa biyəə dʊdɔ an n'a kam amba a zaa zibəə a ga m bɩ m.
Bɩ tɔ ma bɩ,
k'a mɩsɩrbaa k'a gɔɔta awɔɔ m,
awɔɔ n'a bam tara burə ʊ bɩ ba,
Woso mɩŋŋa daʊrɛ kan a nyibəə kɩ nɔ ʊ.
18 Awɔɔ dɔ a ʊ,
mɩsɩrbaa k'a nyɔɔdʊ ba ʊ,
awɔɔ zɩrɔ n a to awɔɔ m bɩ,
Woso awɔɔ yɔ b'ʊ.
Bɩ,
hɔ k'a n'a zaar bam,
gɛɛ wanzurfu gɛɛ sarma bɛɛ a a sa,
an awɔɔ yɔ nɩ y.
19 Awɔɔ yɔ a ʊ,
Krista ma kʊ n b'a dam ma n a lɛ hɩ bɩ m,
bɔ b'ʊ kʊ ʊ kan sinnyɛɛm k'a m mɩŋŋa,
hɔ bʊnyaa sɩ ba ma bɩ kɩ.
20 Woso lɛɛ ka an a bɔ ʊ,
bɩ ma bɩ,
durnya ba ʊ y.
Kɛɛrɛ naa,
a a hɩnka jɛ dɔmɩnnɔ ʊ,
awɔɔ daahan tɔ ma.
21 A tɔ ma m,
awɔɔ n sɩra ka Woso ʊ,
bɩ y'a mɩm bɔ ʊ gəəno bire ʊ,
an lɛbɔʊrɛ ka ʊ,
yɩ a ʊ ncɩnaaʊ,
k'awɔɔ sɩrakarɛ kan awɔɔ taaheerlɛ kɩ n yo Woso ma.
K'a mɩsɩrbaa ba ŋʊarɛ nɔ ʊ
22 Yɛ k'awɔɔ ʊ sɩra ma b'a ka,
awɔɔ nyiro wɔɔ hu n bɔ,
k'a a da ma,
a kʊ ŋʊa paan… danyɩbaa nɔ ʊ.
K'a kʊ ŋʊa gʊta noom hu m.
23 Bala,
yɩrɛdaa awɔɔ yɩ,
b'a n a to gʊaa zi y,
gʊaa ɩ gam,
bɩ Woso y'awɔɔ yɩ,
a garɛ ba ʊ y.
A lemim k'an mɩsɩr a cenle ba ʊ b'a sa an awɔɔ yɩ m.
24 Amba Wosoci n'a hɩm bɩ m bɩ:
Gʊɔɔ haay bɔ kʊ ʊ kan bur kɩ,
lɛbɔʊrɛ kʊ ŋ nɩ tam haay bɩ
bɔ kʊ ʊ kan burvu kɩ,
kʊ bur bɩ ga,
b'a vu bɩ sur.
25 Bɩ Zuuba lemim b'ɩ gɔɔtam
dɔmɩm haay.
Bɩ,
lemim bɩ do bɩ,
lemim nyɩnta kʊ n y'a pa da awɔɔ m bɩ m.