Kristagʊɔɔ lɛɛzannɔ mim
3
Sɩra m,
meerbaa kʊ mɔɔ ʊ kʊ m a ba naa m,
kʊ gʊaa lɛ taa k'a ka wosogʊɔɔ lɛɛ,
zibəə mɩŋŋa a ʊ k'a ba.
2 Bɩ,
kristagʊɔɔ lɛɛzaa a ga m,
an bɩr gʊaa kʊ n bɩ mim yɩrɛ n a hɩ ma y,
a lʊ m bɩr deem,
an bɩr gʊaa k'a a da a mɩŋŋa ma zaa,
hɔɔndamimmazaa,
nyasʊ a mɩŋŋa m zaa,
an bɩr saanɔɔ sim mɩŋŋa a har ʊ,
an n'a dam ma an hɔ dɩnda gʊɔɔ m.
3 A bɩ yɩ bɛɛmirezaa waasɩ y,
a bɩ yɩ wɔkaarɛzaa nyaa bɩncɛ ʊ y,
bɩ k'an yɩ kʊmarɛzaa,
laafɩɩkamazaa,
a bɩ yɩ busooŋʊarɛzaa y.
4 K'an dɩga a har mim ma mɩŋŋa,
an a da a nyɩnɔ ma,
ŋnɩ bɩr zuŋ ʊ,
ŋnɩ bɩr a daŋ ʊ hɔ haay nɔ ʊ.
5 Bala,
kʊ gʊaa n a da ma an nyasʊ a har mim m mɩŋŋa,
a y'a bam lɔ k'a a da ma,
a nyasʊ Woso gʊɔɔ sokʊma nɩ?
6 Kʊ gʊaa k'a yɩ kristagʊɔɔ lɛɛzaa,
a n a ga m,
an yɩ sɩrakarɛzaa daa y,
kʊ m bɛɛ m,
a y'a mɩŋŋa busum,
an dʊdɔyarlɛ kʊ Sʊtaana a yɩ bɩ yɩ.
7 A a ga m sɔ,
k'a kasɛtɩ m bɩr mɩŋŋa gʊɔɔ kʊ ŋ bɩr zum Krista ʊ rɔ wɔɔ zi,
kʊ n b'a da ma,
n a gore bɔ ʊ y,
k'a b'a da Sʊtaana baŋŋa ʊ y.
Daahanzannɔ mim
8 Daahanzannɔ wɔɔ a ga m sɔ,
ŋnɩ yɩ mɩsɩrbaa zore zannɔ,
sɩrazannɔ,
ŋ bɩ yɩ bɛɛmirezannɔ waasɩ y,
ŋ bɩ yɩ zambʊ hɔkamazannɔ y.
9 Ŋ y'a ga m,
ŋnɩ jɩm kɔɔkɔɔ sɩra kʊ sɩrakarɛ a hɩnka bɩ nɔ ʊ,
hɔɔndarɛ mɩŋŋa m.
10 K'a lɛɛ ka a ŋ ka lɛɛ,
a dɩga ŋ ma,
kʊ mim ba ŋ gʊr zi,
k'a bɔkarɛ a ŋ da daahanbaa zibəə b'ʊ.
11 Daahanzannɔ kʊ lannɔ m nɔ wɔɔ a ga m sɔ,
ŋnɩ bɩr mɩsɩrbaa mɩŋŋa m,
ŋ bɩ yɩ meerbaa bʊnyaa ba gʊɔɔ ma zannɔ y,
ŋn'a da a mɩŋŋɔɔ ma,
ŋnɩ yɩ jɩnalɛrazannɔ hɔ haay nɔ ʊ.
12 Daahanzaa biyəə lʊ a ga m an bɩr deem,
an a da a nyɩnɔ ma mɩŋŋa,
an dɩga a har mim ma mɩŋŋa.
13 Bala,
gʊɔɔ kʊ ŋ nɩ daahanbaa zi bam mɩŋŋa rɔ wɔɔ,
ŋ gore daʊrɛ yɩrɛ ŋnɩ heerkoodəbaa gʊta yɩ sɩra ka Krista Yeezuu ʊ zɛkʊra nɔ ʊ.
14 Mɔɔ y'a gɩngam kʊ m bʊr ɩbɩɩ zi zɔɔ,
bɩ naa haay gʊrsɩra mɔɔ ba ɩbɩɩ ma,
k'an bɩr yɩrɛ ɩ ʊ,
15 kʊ mɔɔ bʊr m bɩr zɛm zɔɔ,
k'ɩbɩɩ m mɩsɩrbaa k'a a ga m,
an bɩr bam Woso gʊɔɔ gʊr zi bɩ dɔ.
Wosogʊɔɔ wɔɔ duro,
kristagʊɔɔ sokʊma bɩ m,
Woso k'an mɩsɩr bɩ y'a so ʊ,
sokʊma bɩ do n ta hɔdɩndarɛ k'a m sɩra bɩ m,
an n'a kam gʊɔɔ n'a dɔrɛ.
16 Wɔɔ sɩrakarɛ hɔ gʊta k'a nyaakʊm da Woso n a hɩnka bɩ,
gɔsɩ b'a dam ma an bɩsɩ ka ma y.
A a hɩnka mɛsim nɔ ʊ,
Sɛnt-Ɛspri n a hɩnka gʊaa tɩrga,
malɛɛkarɔ m dɩga a.
N n'a mim pa da do vantɔɔ zi.
Gʊɔɔ sɩra ka ʊ durnya nɔ ʊ jilli.
Woso n a busu an a nyɩnta lɛbɔʊrɛ nɔ ʊ arzana ʊ.