Lɛrɔ wɔɔ bɛɛ y'a so wɔɔ ʊ dɔ y
4
Hɔ kʊ mɔɔ ʊ kʊ m a hɩ bɩ ba n nɩ:
Nyɩ k'a nɩ zɛm b'a so a zɩ hɔnyɩ ʊ bɩ,
a nyɩbaa dɔmɩm ʊ,
bɔ a ʊ kʊ ʊ kan lɔ kɩ,
an bɔkarɛ a y'a so hɔnyɩ b'ʊ jilli.
2 A nyɩbaa dɔmɩm ʊ,
gʊɔɔ nɩ nyasʊm nɩ,
ŋnɩ dɩgarɛ a mim woo… ma,
kʊ dɔmɩm k'a zɩ b'a cɩnta k'an a so a hɔnyɩ b'ʊ bɩ n tolle ba an a ku.
3 A do m bɩ sɔ kan wɔɔ kɩ,
dɔmɩm kʊ wɔɔ n Krista dɔ cɩna bɩ,
bɔ wɔɔ ʊ kʊ ʊ kan nyɩnɔ kɩ,
dɔmɩm bɩ do ʊ bɩ,
durnya paŋŋazannɔ kʊ gʊaa bɩr ŋ yɩm nɔ wɔɔ y'a so wɔɔ ʊ,
ŋnɩ wɔɔ ba lɔnnɔ.
4 Bɩ,
dɔmɩm kʊ Woso a cɩnta bɩ k'a b'a ku bɩ,
a a Nyɩ bɩ nyɔɔ,
lʊ y'a yɩ.
Yɩ a ʊ,
dɔmɩm kʊ Israyɛl gʊɔɔ wɔɔ nɩ lɛrɔ wɔɔ zuure nɔ ʊ bɩ ma.
5 K'a a da ma a gʊɔɔ kʊ lɔnnɔ m lɛrɔ wɔɔ minto rɔ wɔɔ yɔ,
kʊ Woso n wɔɔ ba a nyɩnɔ.
6 Kʊ Woso nyɩnɔ m wɔɔ m bɩ y'a ka,
an a Nyɩ bɩ Ɛspri bɩ zer wɔɔ heerlɔ ʊ,
wɔɔ n'ʊ dam ma Ɛspri bɩ tɔ ma,
ʊ nɩ Woso birm,
ʊ ʊ:
«Ʊ Zɩ.»
7 Ncɩnaaʊ bɩ,
lɔnnɔ bɛɛ n'awɔɔ m dɔ y,
Woso nyɩnɔ n'awɔɔ m,
bɩ k'a nyɩnɔ n'awɔɔ m bɩ,
awɔɔ n nɩ zɛm b'a so a hɔjirle b'ʊ,
Woso n nɩ naa barɛ.
Pol hɔɔn ɩ kɔm Galasii zannɔ minto
8 Nyɩnta k'awɔɔ ʊ biisi awɔɔ n Woso dɔ bɩ,
zu awɔɔ nawʊm hɔɔ kʊ n n'a hɩrɛ ŋ ma wosoro,
a a ba ŋ lɔnnɔ,
bɩ hɔɔ wɔɔ duro,
Woso bɛɛ nɩ ŋ mɩ y.
9 Bɩ,
kɛɛrɛ naa,
awɔɔ Woso dɔ,
an lɛ da bɩ,
Woso awɔɔ dɔ,
b'a a ba lɔ kɛɛrɛ,
a a ya,
a a bɔ k'a zu durnya paŋŋazannɔ kʊ gʊaa bɩr ŋ yɩm nɔ wɔɔ ʊ,
k'a a ya,
a a ba ŋ lɔnnɔ?
Bɩ hɔɔ nɩbɩɩrɔ nɩ ŋ mɩ,
ŋ ba paŋŋa nɩ y.
10 Awɔɔ ɩ dɩgam dɔmɩnnɔ niŋŋoo ma dɔmɩm wɩsɩrɔ a yaadarɛ nɔ ʊ,
an n'a bam maam sɔ kan monno niŋŋoo kɩ,
hɔɔ niŋŋoo dɔmɩm kɩ,
dɔɔraarɔ kɩ.
11 Awɔɔ mim naa ɩ mɔɔ da bɔŋ ʊ,
ɩ b'a ka zi mɔɔ ba awɔɔ minto vam wa?
12 M danyɩnɔ,
a yɛ mɔɔ n nawʊrɛ awɔɔ han gʊta,
amba mɔɔ m ba awɔɔ gʊaa deem bɩ,
k'a mɔɔ hɔbaa sa sɔ.
A zar bɛɛ awɔɔ ʊ mɔɔ ma y.
13 Awɔɔ dɔ mɩŋŋa a ʊ,
mɔɔ yaaba zɛrɛ sabaabʊ y'a ka mɔɔ n lemim nyɩnta pa da awɔɔ m,
m lɛɛkarɛ zɛrɛ ma awɔɔ zi b'ʊ.
14 K'awɔɔ bɩ to a kɔ mɔɔ yaaba bɩ tɔ ma bɩ,
awɔɔ n mɔɔ bɔ ʊ y,
b'awɔɔ n a si mɔɔ lɛɛ y.
Bɩ mɔɔ si awɔɔ ʊ mɩŋŋa ɩ ʊ,
Woso malɛɛka deem awɔɔ si,
ɩ ʊ,
Krista Yeezuu mɩŋŋa awɔɔ si.
15 Heernyɔɔ k'awɔɔ n ta m biisi b'ɩ ka?
Mɔɔ dɔ mɩŋŋa m ʊ,
k'awɔɔ n'a dam ma,
awɔɔ y'a mɩnyaarɔ waaŋ ʊ a ŋ ka mɔɔ ʊ dɔmɩm bɩ do ʊ.
16 Bɩ kɛɛrɛ naa,
m ba mɔɔ ʊ awɔɔ jɩm sɩra kʊ mɔɔ n'a hɩrɛ awɔɔ m bɩ minto ra?
17 Gʊɔɔ kʊ ŋ nɩ ŋʊaar hɔ dɩndam nɔ wɔɔ,
tʊntɔʊrɛ kʊ ŋ nɩ ta m kan awɔɔ kɩ naa,
tʊntɔʊrɛ paan… bɛɛ y,
a ka ŋ nawʊm ma k'a awɔɔ gʊ mɔɔ ma,
k'awɔɔ n a tɔ ʊ kan a kɩ.
18 A mɩŋŋa kʊ gʊɔɔ n bɩr ta tʊntɔʊrɛ m hɔ mɩŋŋa tɔ ma,
b'a ga a ʊ m kʊ tʊntɔʊrɛ bɩ do n bɩr tam lɛɛ tee…,
baa kʊ mɔɔ ɩ kan awɔɔ kɩ,
gɛɛ kʊ mɔɔ ba kan awɔɔ kɩ b'ʊ y.
19 Mɔɔ nyɩnɔ n'awɔɔ m,
mɔɔ m ya m nɩ fɩr yɩm paan… m heer ʊ awɔɔ tɔ ma,
m nɩ nyoosi bam am lʊ jɩsɩzaa hɔ bɩ m,
kʊ m a ka k'awɔɔ n Krista mɩsɩrbaa yɩ paan….
20 A ŋʊa mɔɔ nawʊm paan… kʊ m bɩr awɔɔ bire ʊ b'ʊ dɩɩtaa,
kʊ m m meerbaa bɩ lʊr m a ba,
bala,
mɔɔ n a dɔ kʊ mɔɔ meer bɩ bam kan awɔɔ kɩ lʊnlɔ y.
Gʊaasɩbabaa hɩɩyɔɔ wɔɔ gʊɔɔ mim
21 Awɔɔ k'a n'a ŋʊam kʊ lɛrɔ wɔɔ n a so a ʊ rɔ wɔɔ,
k'a hɩ m m wa.
Awɔɔ n hɔ kʊ lɛrɔ wɔɔ a hɩ bɩ ma ra?
22 N y'a gʊrsɩra ba Wosoci b'ʊ,
n ʊ,
Abraham nyɩnɔ yɩ hɩɩya,
deem yɩ a ʊ kan Agaar kɩ,
lɔ m bɩ,
an deem yɩ kan Saara kɩ soamɩŋŋaʊzaa m bɩ.
23 Bɩ lʊ kʊ lɔ m bɩ nyɩ bɩ,
yɩ b'ʊ amba gʊaa haay nɩ yɩm bɩ m,
an bɔkarɛ,
nyɩ kʊ soamɩŋŋaʊzaa b'a yɩ bɩ,
Woso ɩ lɛɛ ka an a yɩrɛ ler bɔ.
24 Mim naa do naa,
hɔ a ʊ k'a dɩnda wɔɔ m,
a ba n nɩ:
Lannɔ hɩɩyɔɔ wɔɔ,
gʊaasɩbabaa hɩɩyɔɔ kʊ Woso ŋ da rɔ wɔɔ makra nɩ ŋ mɩ.
Lɛɛkarɛ gʊaasɩbabaa makra m Agaar m.
Gʊaasɩbabaa kʊ Woso a da Sinayii ci burə ʊ bɩ m,
gʊɔɔ kʊ gʊaasɩbabaa bɩ do a so ŋ ʊ rɔ wɔɔ,
lɔnnɔ nɩ ŋ mɩ.
25 Bala,
Agaar bɩ,
bɔ a ʊ kʊ ʊ,
ɩ ʊ,
Sinayii ci bɩ m,
Araabɩrɔ kʊ ci bɩ do n ta ʊ,
a bɔ kʊ ʊ sɔ ɩ ʊ,
Zerizalɛm kʊnɔ k'an ta ʊ her-her naa m,
bala,
a ɩ lɔmbaa nɔ ʊ kan a gʊɔɔ wɔɔ kɩ sɔ.
26 Bɩ arzana Zerizalɛm bɩ,
soamɩŋŋaʊzaa m bɩ,
wɔɔ kʊnɔ bɩ m bɩ,
bɔ a ʊ kʊ ʊ,
ɩ ʊ,
wɔɔ da m.
27 Bala,
n y'a gʊrsɩra ba Wosoci ʊ,
n ʊ:
Ɩbɩɩ k'ɩ n cɩna bɩ,
ɩ heer nyɔɔ,
bala,
ɩbɩɩ bɩr nyɩnɔ yɩm biisi y,
heernyɔɔ zee da,
ɩbɩɩ k'ɩ n nyoosibarɛ fɩr yɩ biisi bɩ,
bala,
lʊ kʊ n kaanm m bɩ nyɩnɔ yɩm gʊta,
an lɛ da lʊ k'a zim n ta ʊ bɩ nyɩnɔ ra.
28 B'awɔɔ,
m danyɩnɔ,
amba Izakkɩ m bɩ,
ler kʊ Woso a bɔ bɩ nyɩnɔ n'awɔɔ m.
29 Biisi bɩ,
amba nyɩ k'a yɩ am gʊaa haay hɔ bɩ m bɩ nɩ fɩr kam nyɩ kʊ Woso Ɛspri a ka an yɩ bɩ ma bɩ,
her sɔ naa,
a maam sɔ.
30 Bɩ,
bɔ n y'a hɩ Wosoci b'ʊ?
N ʊ:
‹La lʊ kʊ lɔ m bɩ ra kan a nyɩ bɩ kɩ,
bala,
a n a ga m kʊ lɔ bɩ nyɩ bɩ n hɔjirle yɩ kan soamɩŋŋaʊzaa bɩ nyɩ bɩ kɩ y.›
31 Ncɩnaaʊ bɩ,
m danyɩnɔ,
lɔ bɩ nyɩnɔ bɛɛ m wɔɔ nɩ y,
lʊ kʊ soamɩŋŋaʊzaa n bɩ nyɩnɔ m wɔɔ m.