Zaa kʊ Woso a sa k'a gʊaa bʊmbɔ
3
Aba!
Galasii zannɔ,
hɔɔnwarzannɔ.
Nka ɩ wɔ ʊ an awɔɔ hɔɔn wusigə ncɩnaaʊ?
A n bɔkarɛ n y'a hɩnka awɔɔ m mɩŋŋa,
a dɔ a ʊ,
Yeezuu Krista ga gɔdarkʊra ma.
2 Kʊ m laaka da a han wa:
Lɛrɔ wɔɔ zuure minto y'a ka Woso n a Ɛspri bɩ ka awɔɔ ʊ ra,
gɛɛ zu k'awɔɔ ʊ sɩrakarɛ lemim b'ʊ bɩ minto nɩ?
3 Bɔ yarmabaa m naa?
Woso zuure bɩ sɩŋŋɩda sa awɔɔ ʊ Woso Ɛspri paŋŋa m,
a bɔkarɛ an n'a ŋʊam kɛɛrɛ k'a nyambʊr a mɛsim paŋŋa m na?
4 Ziro kʊ Woso ŋ ba awɔɔ mɩsɩrbaa nɔ ʊ rɔ wɔɔ,
bɔ ŋ y'a ʊ vam kan awɔɔ kɩ ra?
Mɔɔ y'a gɩngam mɔɔ ʊ,
ŋ bɩ vam kan awɔɔ kɩ sɩɩn!
5 Kʊ Woso y'a Ɛspri karɛ awɔɔ ʊ,
an nɩ hoserlo barɛ awɔɔ bire ʊ,
naa ba an nawʊm lɛrɔ wɔɔ k'awɔɔ nɩ zure ŋ ʊ bɩ tɔ ma ra?
Gɛɛ zu k'awɔɔ ʊ sɩrakarɛ lemim b'ʊ bɩ tɔ ma nɩ?
6 K'a a yo Abraham n sɩra ka Woso ʊ,
Woso n dɩga ma tɩrga a mɩm ʊ bɩ,
7 k'a maam,
k'a dɔ mɩŋŋa a ʊ,
sɩrakənno wɔɔ n Abraham nyɩnɔ.
8 A n ta ʊ sɔ bɩ,
Wosoci bɩ lɛɛ ka an a hɩ hɔɔ a ʊ,
Woso do vantɔɔ gʊɔɔ wɔɔ bam tɩrga a mɩm ʊ ŋ sɩrakarɛ tɔ ma,
bɩ minto m Woso n lemim nyɩnta naa do hɩ Abraham m,
a ʊ:
‹Tara burə gʊɔɔ do haay barka yɩrɛ ɩbɩɩ tɔ ma.›
9 Ncɩnaaʊ nɩ,
gʊɔɔ kʊ sɩrakənno m nɔ wɔɔ nɩ barka yɩm kan sɩrakarɛzaa Abraham kɩ.
10 Bɩ gʊɔɔ kʊ ŋ nɩ yom lɛrɔ wɔɔ ma rɔ wɔɔ,
lerbɔrɛ kʊsɩ ɩ kan ŋ kɩ,
bala,
n y'a gʊrsɩra ba Wosoci b'ʊ,
n ʊ:
‹Gʊaa k'a bɩr hɔ haay kʊ n y'a da lɛrɔ wɔɔ ci bɩ nɔ ʊ bɩ bam tee… bɩ,
lerbɔrɛ kʊsɩ ɩ kan kɩ.›
11 Sɩra nɔ ʊ,
gɔsɩ b'a dam ma an yɩ tɩrga Woso mɩm ʊ,
lɛrɔ wɔɔ zuure tɔ ma y,
bala,
n y'a gʊrsɩra ba,
n ʊ:
‹Gʊaa k'an tɩrga Woso mɩm ʊ sɩrakarɛ tɔ ma bɩ,
a mɩsɩrbaa bam.›
12 Lɛrɔ wɔɔ zaa bɩ y'a hɔ kan sɩrakarɛ zaa bɩ kɩ,
bala,
n ʊ:
‹Gʊaa k'a nɩ zum lɛrɔ wɔɔ ʊ haay bɩ nɩ mɩsɩrbaa yɩm.›
13 Krista a mɩŋŋa ka n a zɛ wɔɔ tɔ ma,
a ba a ʊ maam k'a wɔɔ bʊmbɔ lɛrɔ wɔɔ lerbɔrɛ kʊsɩ nɔ ʊ,
a mɩŋŋa ɩ sompi wɔɔ bɩncɛ ʊ an lerbɔrɛ kʊsɩ bɩ yɩ,
bala,
Wosoci bɩ nɔ ʊ,
n ʊ:
‹Lerbɔrɛ kʊsɩ ɩ kan gʊaa kʊ n y'a zeŋŋə gɔ ma bɩ kɩ.›
14 Nyɩnta ʊ ncɩnaaʊ,
kʊ do vantɔɔ gʊɔɔ wɔɔ m barka kʊ Abraham a yɩ bɩ yɩ Krista Yeezuu nɔ ʊ,
k'an bɩr yɩrɛ ɩ ʊ,
wɔɔ *Sɛnt-Ɛspri kʊ Woso a ler bɔ bɩ yɩ sɩrakarɛ tɔ ma.
Woso lerbɔrɛ kan lɛrɔ wɔɔ kɩ mim
15 M danyɩnɔ,
ʊ makra sa gʊɔɔ minkəm zibəə nɔ ʊ,
kʊ gʊaa a hɔɔnhɔ da ci ʊ an a cɩnta,
amba a a ga m bɩ nɩ,
kʊ n a ba a zɛ kur,
gɔsɩ bɩr hɔ k'a hɩ bɩ zaar barɛ,
b'a bɩr hɔ nam ma sɔ y.
16 A do m bɩ sɔ,
lerbɔrɛrɔ wɔɔ bɔ Woso ʊ Abraham m kan a nyɩ bɩ kɩ m.
N n a hɩ,
n ʊ:
«A nyɩnɔ y,»
ɩ ʊ a hɩ n y'a ʊ nyɩnɔ hɔka ma y,
ayy…,
nyɩ bɩ deem,
bɩ nyɩ bɩ,
Krista m,
bɩ n ʊ,
k'a hɩ ma.
17 Hɔ kʊ mɔɔ ʊ kʊ m a hɩ bɩ ba n nɩ:
Woso lɛɛ ka an a hɔɔnhɔ hɩ an a cɩnta,
dɔɔraa zorsi bukərku kur bɩ,
n nɩ bɔkarɛ n nɩ bɔ lɛrɔ wɔɔ m,
ncɩnaaʊ naa,
lɛrɔ wɔɔ b'a dam ma ŋnɩ hɔ kʊ Woso lɛɛ ka an a hɩ bɩ zaar ba,
ŋnɩ ler kʊ Woso a bɔ bɩ zaar ba sɔ wa.
18 Bala,
kʊ lɛrɔ wɔɔ zuure tɔ ma m gʊaa nɩ hɔjirle yɩm Woso zi,
k'a maam Woso lerbɔrɛ tɔ ma bɛɛ dɔ y.
A n bɔkarɛ ler kʊ Woso a bɔ bɩ y'a ka Woso n a barka ka Abraham ʊ.
19 Kʊ ncɩnaaʊ m lɛrɔ wɔɔ zibəə n bɔ m kɛɛrɛ?
Lɛrɔ wɔɔ ka Woso ʊ kʊ ŋ nɩ bɩr wɔɔ mimbʊnyaarɔ hɩnkam wɔɔ m,
kʊ nyɩ kʊ Woso ler bɩ bɔ a tɔ ma bɩ n tolle ba an yɩ.
Malɛɛkarɔ ɩ bʊr lɛrɔ wɔɔ m,
gʊaa deem ɩ nyɩnta malɛɛkarɔ wɔɔ kan zɩɩfʊrɔ wɔɔ kɩ bire ʊ.
20 Lɛrɔ wɔɔ karɛ bɩncɛ ʊ,
a yɩ pakra kʊ gʊaa n nyɩnta ʊ ŋ karɛ ma,
bɩ ler bɩ bɔrɛ bɩncɛ ʊ,
Woso mɩŋŋa mim m bɩ a deem.
21 Naa k'a hɩ a ʊ,
lɔ?
Lɛrɔ wɔɔ bɩsɩ ŋn'a kam Woso lerbɔrɛrɔ wɔɔ ma ra?
Ayy…,
a bɛɛ m naa y.
Bala,
kʊ yɩ an nawʊrɛ ɩ ʊ,
lɛ niŋŋə n ta ʊ,
gʊɔɔ n'a dam ma ŋnɩ mɩsɩrbaa yɩ a tɔ ma,
k'a maam lɛ bɩ do n'a kam gʊɔɔ n yɩ tɩrga Woso mɩm ʊ sɔ.
22 Bɩ,
Wosoci b'a hɩ a ʊ,
mimbʊnyaa paŋŋa y'a so durnya gʊɔɔ ʊ jilli.
Maam bɩ,
gʊɔɔ kʊ ŋ sɩra ka rɔ wɔɔ hɔ kʊ Woso a ler bɔ bɩ yɩ,
sɩra kʊ ŋ y'a ka Yeezuu Krista ʊ bɩ tɔ ma.
23 Dɔmɩm kʊ sɩrakarɛ zaa bɩ n bʊr cɩna bɩ,
Moyiisi lɛrɔ wɔɔ ɩ wɔɔ ba a lɔnnɔ ŋn'ɩ dɔm wɔɔ ma,
kʊ Woso n tolle ba an sɩrakarɛ zaa bɩ hɩnka.
24 Ncɩnaaʊ bɩ,
lɛrɔ wɔɔ,
dɔ ŋ y'a ʊ wɔɔ ma,
kʊ Krista n tolle ba an bʊr,
kʊ Woso n wɔɔ ba tɩrga a mɩm ʊ sɩrakarɛ tɔ ma.
25 Bɩ,
kɛɛrɛ naa,
sɩra ka Krista ʊ dɔmɩm m,
lɛrɔ wɔɔ kʊ ŋ nyɩnta ŋn'ɩ dɔm wɔɔ ma bɩ,
ŋ bɛɛ y'a so wɔɔ ʊ dɔ y.
26 Bala,
awɔɔ woo… naa,
Woso nyɩnɔ n'awɔɔ m,
sɩra k'awɔɔ ka Krista Yeezuu ʊ bɩ tɔ ma.
27 Denter m,
awɔɔ haay k'a batɛm si Krista nɔ ʊ bɩ,
a mɩsɩrbaa n n'awɔɔ mɩsɩrbaa ʊ jilli.
28 Naa tɔ ma kɛɛrɛ bɩ,
kʊ zɩɩfʊ n'ɩ mɩ,
gɛɛ do vanta gʊaa n'ɩ mɩ,
minsi bɛɛ n bɩ y,
kʊ lɔ n'ɩ mɩ,
gɛɛ soamɩŋŋaʊzaa n'ɩ mɩ,
minsi bɛɛ n bɩ sɔ y,
kʊ yar n'ɩ mɩ,
gɛɛ lʊ n'ɩ mɩ minsi bɛɛ sɔ y.
Bala,
awɔɔ woo… naa,
awɔɔ a ba deem Krista Yeezuu nɔ ʊ.
29 Kʊ Krista y'a so awɔɔ ʊ bɩ,
k'a maam Abraham nyɩnɔ n'awɔɔ m,
awɔɔ nɩ hɔjirle kʊ Woso a ler bɔ bɩ yɩm.