Lemim kʊ Pol a pa da Korɛntɩ ʊ
2
M danyɩnɔ,
bʊr kʊ mɔɔ ʊ awɔɔ zi bɩ,
mɔɔ n bʊr lɛmindɔrɛ m gɛɛ mindɔrɛ m kʊ m bɩ Woso kasɛtɩ bɩ ka awɔɔ ʊ y.
2 Bala,
mɔɔ hɔɔn bɔ ʊ,
kʊ m bɩ hɔsɩ mim dɩnda awɔɔ zi b'ʊ,
kʊ Yeezuu Krista mim bɛɛ y,
an lɛ da bɩ a wɔ kʊ n y'a ʊ gɔdarkʊra ma bɩ mim m.
3 Ncɩnaaʊ nɩ,
mɔɔ n nyɩnta awɔɔ bire ʊ,
paŋŋawar nɔ ʊ,
dabɔʊ nɔ ʊ,
kan mɛhinkəre kɩ.
4 Mɔɔ meerbaa kan mɔɔ pa bɩ darɛ kɩ n nyɩnta lɛmindɔrɛ meerbaa nɔ ʊ y,
bɩ nyɩnta ʊ Sɛnt-Ɛspri paŋŋa zibəə hɩnkarɛ nɔ ʊ.
5 Nyɩnta a ʊ ncɩnaaʊ k'awɔɔ sɩrakarɛ bɩ bɩ yo gʊɔɔ mindɔrɛ ma y,
bɩ k'an yo Woso paŋŋa ma.
Woso mindɔrɛ
6 A n bɔkarɛ,
mindɔrɛ paan… wɔɔ n'a dɩndam kristagʊɔɔ kʊ ŋ sɩrakarɛ yaa ka rɔ wɔɔ m.
Mindɔrɛ naa do n a to durnya naa do nɔ ʊ,
b'a n a to durnya paŋŋazannɔ kʊ ŋ nɩ b'a zaar bam nɔ wɔɔ zi y.
7 Woso mindɔrɛ wɔɔ n'a dɩndam,
hɔ k'a n dɔ biisi m,
n n a nyaakʊm da,
Woso mɩŋŋa ɩ nyɩnta an a cɩnta,
bɩ ma bɩ durnya ba ʊ y,
kʊ wɔɔ n bɩ nyɩnta a lɛbɔʊrɛ nɔ ʊ.
8 Durnya naa do paŋŋazannɔ gɔsɩ n nyɩnta an a dɔ y,
bala,
k'a dɔ ŋ y'a ʊ,
ŋ bɩ Zuuba k'a a so lɛbɔʊrɛ ʊ bɩ wɔm gɔdarkʊra ma y.
9 Bɩ,
amba n y'a gʊrsɩra ba Wosoci ʊ,
n ʊ:
«Hɔ kʊ gʊaa mɩm n a yɩ cɩna y,
a tʊr n a ma cɩna y,
hɔ kʊ gʊaa n a hɔɔn da ma cɩna y,
hɔ bɩ do haay Woso a cɩnta gʊɔɔ kʊ ŋ n'a ŋʊam nɔ wɔɔ m.»
10 Denter m,
wɔɔ,
Woso hɔ bɩ do hɩnka wɔɔ m Sɛnt-Ɛspri nɔ ʊ.
Bala,
Sɛnt-Ɛspri ɩ hɔ haay taa zɛm,
baa hɔ kʊ Woso a nyaakʊm da paan… haay,
a y'a taa zɛm sɔ.
11 Nka m nɩ gʊɔɔ barla,
an gʊɔɔ mim dɔ?
K'a maam,
hɔɔn k'a nɩ kan kɩ bɩ m.
Maam sɔ bɩ,
hɔ k'a nɩ Woso gʊr zi bɩ,
gɔsɩ b'a dam ma an a dɔ kʊ Woso Ɛspri bɛɛ y.
12 Kʊ wɔɔ nɩ,
wɔɔ n durnya ɛspri yɩ y,
bɩ,
Woso Ɛspri wɔɔ yɩ,
kʊ wɔɔ n'ʊ da ma ʊ Woso barka ganwʊrɛrɔ wɔɔ dɔ.
13 Bɩ,
kʊ wɔɔ yɩ ŋ mim dɩndam,
wɔɔ bɩr a dɩndam gʊaa mindɔrɛ nɩ y,
bɩ,
a dɩnda wɔɔ nawʊm Sɛnt-Ɛspri mindɔrɛ m,
ʊ nɩ Woso hɔɔ jɩ dɩndam,
Sɛnt-Ɛspri hɔdɩndarɛ m.
14 Gʊaa k'a nɩ mɛsim hɔɔn m bala bɩ,
a bɩr yɛm hɔ k'a a to Woso Ɛspri zi bɩ ma y.
Hɔɔzaabaa m kan kɩ,
a b'a dam ma an a jɩ ma y,
bala,
Woso Ɛspri n'a dam ma an a ka gʊaa n a dɔ.
15 Bɩ gʊaa k'a nɩ Woso Ɛspri m bɩ,
a ɩ hɔ haay dʊdɔ kam bɩ gɔsɩ b'a dʊdɔ karɛ y.
16 Bala,
n y'a da Wosoci ʊ,
n ʊ:
«Nka ɩ Woso hɔɔndarɛ dɔ,
k'a hɔ dɩnda nɩ?»
A n bɔkarɛ,
wɔɔ,
Krista hɔɔndarɛ wɔɔ n ta m.